ଭୁବନେଶ୍ୱର: ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ସୁବୁଦ୍ଧିପୁର ‘ଏକାମ୍ର ରେସିଡେନ୍ସି’ ଆବାସିକ ପ୍ରକଳ୍ପର ଅନଲାଇନ୍ ଆବେଦନ ଶେଷ ତାରିଖକୁ ନଭେମ୍ବର ୩୦ ପର୍ଯ୍ୟନ୍ତ ବଢ଼ାଇଛି।ପୂର୍ବରୁ ଏହି ତାରିଖ ଅକ୍ଟୋବର ୩୧ ଥିଲା।
ଏହି ନିଷ୍ପତ୍ତି ଫଳରେ ଘର କିଣିବାକୁ ଇଚ୍ଛୁକ ଲୋକମାନେ ଆଉ ଏକ ମାସ ଅଧିକ ସମୟ ପାଇବେ ବୋଲି ବିଡିଏ ପକ୍ଷରୁ କୁହାଯାଇଛି। ପ୍ରାୟ ୭.୩୪ ଏକର ଜମିରେ ନିର୍ମିତ ଏକାମ୍ର ରେସିଡେନ୍ସି ଏକ ଆଧୁନିକ ଆବାସିକ ପ୍ରକଳ୍ପ। ଏଠାରେ ୨ ବେଡରୁମ୍ ଏବଂ ୨ ବେଡରୁମ୍ ସହ ଷ୍ଟଡି ରୁମ୍ ଥିବା ଆପାର୍ଟମେଣ୍ଟ ରହିଛି।
ବର୍ତ୍ତମାନ ବିଡିଏ ଦୁଇଟି ବ୍ଲକରେ ଥିବା ମୋଟ ୪୯୬ ଫ୍ଲାଟ ପାଇଁ ଆବେଦନ ଗ୍ରହଣ କରୁଛି। ଏଥିରେ ୨୮୮ଟି ୨ ବେଡରୁମ୍ ସହ ଷ୍ଟଡି ରୁମ୍ ଥିବା ଆପାର୍ଟମେଣ୍ଟ ଏବଂ ୨୦୮ଟି କେବଳ ୨ ବେଡରୁମ୍ ଆପାର୍ଟମେଣ୍ଟ ରହିଛି ।
ଯୋଗ୍ୟ ଆବେଦନକାରୀଙ୍କ ଚୟନ ସ୍ଵଚ୍ଛ ଓ ସୁବ୍ୟବସ୍ଥିତ ହେବା ପାଇଁ ଆପାର୍ଟମେଣ୍ଟ ଆବଣ୍ଟନ ଲଟେରୀ ମାଧ୍ୟମରେ କରାଯିବ।ବିଡିଏ କହିଛି ଯେ ୧୦,୦୦୦ ଟଙ୍କାର ଆବେଦନ ଶୁଳ୍କକୁ ଫ୍ଲାଟର ଚୂଡ଼ାନ୍ତ ଦାମ ସହିତ ଯୋଡ଼ାଯିବ। ଯେଉଁ ଆବେଦନକାରୀମାନେ ଆବଣ୍ଟନ ପାଇବେ ନାହିଁ, ସେମାନଙ୍କୁ ଜମା କରାଯାଇଥିବା ୨.୧ ଲକ୍ଷ ଟଙ୍କା ସମ୍ପୂର୍ଣ୍ଣ ଭାବେ ଫେରସ୍ତ କରାଯିବ।
ଏଥିରେ ଜିଏସ୍ଟିରୁ ସମ୍ପୂର୍ଣ୍ଣ ଛାଡ଼ ଏବଂ ଷ୍ଟାମ୍ପ ଡ୍ୟୁଟି ଉପରେ ୫ ପ୍ରତିଶତ ଛାଡ଼ ରହିବ। ଏହି ଆପାର୍ଟମେଣ୍ଟଗୁଡ଼ିକ ରହିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ହୋଇସାରିଛି। ସେଗୁଡ଼ିକ ଫ୍ରି-ହୋଲ୍ଡ ଆଧାରରେ ଆବଣ୍ଟନ କରାଯିବ ଏବଂ ଏକ ବର୍ଷ ପାଇଁ ମାଗଣା ରକ୍ଷଣା ବେକ୍ଷଣ ସୁବିଧା ମଧ୍ୟ ମିଳିବ। ସଫଳ ଆବଣ୍ଟନକାରୀମାନେ ବିଭିନ୍ନ ଲାଭ ପାଇବେ।
ଏହି ଆବାସିକ ପ୍ରକଳ୍ପ ଭୂମିକମ୍ପ-ପ୍ରତିରୋଧୀ ବ୍ୟବସ୍ଥା ରହିଥିବାବେଳେ ସୁଇମିଂ ପୁଲ୍, ଜିମ୍, ସ୍ୱେରେଜ୍ ଟ୍ରିଟମେଣ୍ଟ ପ୍ଲାଣ୍ଟ, ଜଳ ରିଚାର୍ଜ ବ୍ୟବସ୍ଥା ଏବଂ ୨୪ ଘଣ୍ଟା ସିସିଟିଭି ନିରୀକ୍ଷଣ ଭଳି ଆଧୁନିକ ସୁବିଧା ମଧ୍ୟ ରହିଛି ।
ଆବେଦନକାରୀମାନଙ୍କୁ ପ୍ରଥମେ ଏକ ୟୁନିକ୍ ଆକାଉଣ୍ଟ ନମ୍ବର (ୟୁଏଏନ୍) କରିବାକୁ ହେବ। ବିଡିଏର ସମ୍ପତ୍ତି ଆବଣ୍ଟନ ବ୍ୟବସ୍ଥାରେ କାରବାର କରିବା ପାଇଁ ଏହା ବାଧ୍ୟତାମୂଳକ। ପଞ୍ଜୀକରଣ ସମୟରେ ଜନ୍ମ ତାରିଖ ଏବଂ ବାସସ୍ଥାନର ଠିକଣା ପ୍ରମାଣ ପାଇଁ ଉପଯୁକ୍ତ ଦସ୍ତାବିଜ ଦେବାକୁ ହେବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି।