ନୂଆଦିଲ୍ଲୀ: ନ୍ୟୁଜିଲାଣ୍ଡ ବିପକ୍ଷ ପାଞ୍ଚମ ତଥା ଅନ୍ତିମ ଟି-୨୦ ମୁକାବିଲାରେ ଭାରତୀୟ ଦଳ ପରାଜୟର ସାମ୍ନା କରିଥିଲେ ମଧ୍ୟ ସିରିଜ୍ ୩-୨ ବ୍ୟବଧାନରେ ନିଜ ନାମରେ କରିଛି । ଏହି ସିରିଜ୍ ବିଜୟ ପରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ (କୋଚ୍) ଗୌତମ ଗମ୍ଭୀର ସମାଲୋଚକମାନଙ୍କୁ କଡା ଜବାବ ଦେଇଛନ୍ତି । ଦଳର ପ୍ରଦର୍ଶନ ଏବଂ କ୍ରମାଗତ ଚାପ ସମ୍ପର୍କରେ ପଚରାଯାଇଥିବା ଏକ ପ୍ରଶ୍ନର ଜବାବ ଦେଇ କୋଚ୍ ଗମ୍ଭୀର ସ୍ପଷ୍ଟ ଭାବେ କହିଛନ୍ତି ଯେ, “ମୋ ଡିକ୍ସନାରୀରେ ‘ଡର’ ନାମକ କୌଣସି ଶବ୍ଦ ନାହିଁ ।” ସେ ଆହୁରି ମଧ୍ୟ କହିଛନ୍ତି ଯେ, ଯେତେବେଳେ ଆପଣ ଦେଶ ପାଇଁ ଖେଳୁଛନ୍ତି କିମ୍ବା କୋଚିଂ ଦେଉଛନ୍ତି, ସେତେବେଳେ ଚାପ ଏବଂ ବିଭିନ୍ନ ଆହ୍ୱାନର ସାମ୍ନା କରିବା ହିଁ ଆପଣଙ୍କ ମୁଖ୍ୟ ଦାୟିତ୍ୱ ଅଟେ ।
ବିଦେଶୀ ମାଟିରେ ଅଲଗା ପ୍ରକାରର ପରିସ୍ଥିତିର ସାମ୍ନା କରିବାକୁ ପଡ଼ିଥାଏ । ପଞ୍ଚମ ମ୍ୟାଚ୍ରେ ଦଳ ହାରିଯାଇଥିଲେ ହେଁ, ପ୍ରଥମ ତିନୋଟି ମ୍ୟାଚ୍ କ୍ରମାଗତ ଭାବେ ଜିତି ଭାରତ ପୂର୍ବରୁ ହିଁ ସିରିଜ୍ କବ୍ଜା କରିସାରିଥିବା କଥା ସେ ମନେ ପକାଇ ଦେଇଛନ୍ତି । ଦଳର ସାମୂହିକ ପ୍ରଦର୍ଶନକୁ ପ୍ରଶଂସା କରି ସେ କହିଛନ୍ତି ଯେ ଆମେ ଏକ ଟିମ୍ ଭାବେ ଜିତିଛୁ । ଏହି ସିରିଜ୍ରୁ ଦଳକୁ ଅନେକ ଭଲ ଶିକ୍ଷା ମିଳିଛି ଏବଂ ଆଗାମୀ ଦିନରେ ଫିଲ୍ଡିଂ ତଥା ଅନ୍ୟାନ୍ୟ କ୍ଷେତ୍ରରେ ଆହୁରି ଅଧିକ ଉନ୍ନତି କରାଯିବ ବୋଲି ସେ ମତ ଦେଇଛନ୍ତି ।
