ନୂଆଦିଲ୍ଲୀ: ଜାପାନର ଆଇଚି-ନାଗୋୟାରେ ଶେଷ ହୋଇଥିବା ୨୦୨୬ ଏସୀୟ କ୍ରୀଡ଼ାରେ ଭାରତର ମୋଟ ପଦକ ସଂଖ୍ୟା ହୁଏତ ଗତ ସିଜନ୍ ତୁଳନାରେ କମ୍ ରହିଥାଇପାରେ, କିନ୍ତୁ ଆସନ୍ତା ୨୦୨୮ ଲସ୍ ଏଞ୍ଜେଲସ ଅଲିମ୍ପିକ୍ସ ଦୃଷ୍ଟିକୋଣରୁ ଦେଖିଲେ ଏହା ହାଙ୍ଗଝୋଉ (୨୦୨୩) ଅପେକ୍ଷା ଭାରତ ପାଇଁ ଅଧିକ ଗୁରୁତ୍ୱପୂର୍ଣ୍ଣ ଓ ସଫଳ ସାବ୍ୟସ୍ତ ହୋଇଛି । ନାଗୋୟା କ୍ରୀଡ଼ାରେ ମିଳିଥିବା ସଫଳତା ଭାରତର ଅଲିମ୍ପିକ୍ ପଦକ ଆଶାକୁ ଆହୁରି ମଜବୁତ୍ କରିଛି । ହାଙ୍ଗଝୋଉ ଏସୀୟ କ୍ରୀଡ଼ାରେ ଭାରତ ଜିତିଥିବା ସ୍ୱର୍ଣ୍ଣ ପଦକ ମଧ୍ୟରୁ କେବଳ ୧୨ଟି ଅଲିମ୍ପିକ୍ ଗେମ୍ସର ଅଂଶ ଥିଲା । କିନ୍ତୁ ନାଗୋୟାରେ ଅଲିମ୍ପିକ୍ କ୍ରୀଡ଼ା ବର୍ଗରେ ଭାରତୀୟ ଆଥଲେଟ୍ମାନେ ୧୭ଟି ସ୍ୱର୍ଣ୍ଣ ପଦକ ଜିତିଛନ୍ତି । ହାଙ୍ଗଝୋଉରେ ଶୁଟିଂର ଅନେକ ଟିମ୍ ଇଭେଣ୍ଟରେ ଗୋଲ୍ଡ ମିଳିଥିଲା, ଯାହା ଅଲିମ୍ପିକ୍ସରେ ନାହିଁ । ତେଣୁ ସେଗୁଡ଼ିକ ଅଲିମ୍ପିକ୍ ପ୍ରସ୍ତୁତିରେ ବିଶେଷ ସାହାଯ୍ୟ କରିନଥିଲା । କିନ୍ତୁ ନାଗୋୟାରେ ମିଳିଥିବା ପ୍ରାୟ ପ୍ରତ୍ୟେକ ସ୍ୱର୍ଣ୍ଣ ପଦକ ଅଲିମ୍ପିକ୍ସ ପାଇଁ ସିଧାସଳଖ ଆଶା ଜଗାଇଛି । ସୁଜିତ୍ ଏବଂ ଅମନ୍ ସେହରାବତ କୁସ୍ତିରେ ନିଜ ନିଜ ଓଜନ ବର୍ଗରେ ଚମତ୍କାର ପ୍ରଦର୍ଶନ କରି ଏଲଏ୨୮ ପାଇଁ ପଦକ ଦାବିଦାର ହୋଇଛନ୍ତି । ତୀରନ୍ଦାଜୀରେ କୁମ୍କୁମ୍ ମୋହୋଡ୍ ଏବଂ ଭାରତୀୟ ମହିଳା ରିକର୍ଭ ଟିମ୍ ଶକ୍ତିଶାଳୀ ଦକ୍ଷିଣ କୋରିଆକୁ ହରାଇ ଇତିହାସ ରଚିଛନ୍ତି । ସେହିପରି ଚିକିତା ଓ କମ୍ପାଉଣ୍ଡ ଟିମ୍ର ସ୍ୱର୍ଣ୍ଣ ପଦକ ନୂଆ ଆଶା ସଞ୍ଚାର କରିଛି ।
ବକ୍ସିଂରେ ଲଭଲିନା ବୋରଗୋହାଇନ୍, ପରବୀନ ହୁଡ୍ଡା ଏବଂ ଅଙ୍କୁଶ ପଙ୍ଘାଲ ନିଜ ନିଜ ବର୍ଗରେ ବିଶ୍ୱ ଏବଂ ଏସୀୟ ଚାମ୍ପିଅନ୍ମାନଙ୍କୁ ପରାସ୍ତ କରି ସ୍ୱର୍ଣ୍ଣ ଜିତିଛନ୍ତି । ଶୁଟିଂରେ ସୁରୁଚି ସିଂହ, କମଲଜୀତ୍, ଇଶା ସିଂହ ଏବଂ ନୀରୁ ଢାଣ୍ଡା ଏସୀୟ ରେକର୍ଡ ସହ ବିଶ୍ୱ ରେକର୍ଡ ସ୍ତରର ପ୍ରଦର୍ଶନ କରିଛନ୍ତି, ଯାହା ଅଲିମ୍ପିକ୍ କୋଟା ହାସଲ କରିବାରେ ବଡ଼ ସାହାଯ୍ୟ କରିବ । ମହିଳା ହକିରେ ଚୀନ୍କୁ ହରାଇ ସ୍ୱର୍ଣ୍ଣ ପଦକ ଜିତିବା ସହ ୪୪ ବର୍ଷ ପରେ ଏସୀୟ ଚାମ୍ପିଅନ୍ ହୋଇଥିବା ଭାରତୀୟ ମହିଳା ହକି ଟିମ୍ ସିଧାସଳଖ ଅଲିମ୍ପିକ୍ ଯୋଗ୍ୟତା ହାସଲ କରିଛି । ଯଦିଓ ହାଙ୍ଗଝୋଉରେ ମୋଟ ପଦକ ସଂଖ୍ୟା ଅଧିକ ଥିଲା, କିନ୍ତୁ ଆଇଚି-ନାଗୋୟା ୨୦୨୬ର ପ୍ରତ୍ୟେକଟି ସ୍ୱର୍ଣ୍ଣ ପଦକ ଅଲିମ୍ପିକ୍ ପୋଡିୟମରେ ପହଞ୍ଚିବାର ବାସ୍ତବ ଆଶା ଦେଖାଇଛି। ଯଦି ଭାରତ କ୍ରୀଡ଼ା ବିଜ୍ଞାନ, ହାଇ-ପରଫରମାନ୍ସ ପ୍ରୋଗ୍ରାମ୍ ଏବଂ ମାନସିକ ପ୍ରସ୍ତୁତି ଉପରେ କ୍ରମାଗତ ଧ୍ୟାନ ଦିଏ, ତେବେ ଏଲଏ୨୮ ଅଲିମ୍ପିକ୍ସ ଭାରତୀୟ କ୍ରୀଡ଼ା ଇତିହାସର ସବୁଠାରୁ ସଫଳ ଓଲିମ୍ପିକ୍ସ ସାବ୍ୟସ୍ତ ହୋଇପାରିବ ।
