କଟକ: ସହରର ଖାନନଗର ଛକ ନିକଟରେ ଗତକାଲି ବିଳମ୍ବିତ ରାତିରେ ଏକ ଭୟଙ୍କର ଅଘଟଣ ଘଟିଯାଇଛି। ରୋଗୀ ନେଇ ଯାଉଥିବା ଏକ ଆମ୍ବୁଲାନ୍ସରେ ହଠାତ୍ ନିଆଁ ଲାଗିଯିବାରୁ ଗାଡ଼ିଟି ସମ୍ପୂର୍ଣ୍ଣ ଜଳିଯାଇଛି। ତେବେ ସୌଭାଗ୍ୟବଶତଃ ଆମ୍ବୁଲାନ୍ସରେ ଥିବା ଶିଶୁ ରୋଗୀ, ଦୁଇ ଜଣ ମହିଳା ଏବଂ ୩ ଜଣ ଗାଡ଼ି କର୍ମଚାରୀ ସମସ୍ତେ ସୁରକ୍ଷିତ ଭାବେ ଉଦ୍ଧାର ହୋଇଛନ୍ତି।
ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଆମ୍ବୁଲାନ୍ସଟି ଜଣେ ଅସୁସ୍ଥ ଶିଶୁକୁ ନେଇ କଟକ ଟାଙ୍ଗୀ ଅଞ୍ଚଳରୁ ସିଟି ହସ୍ପିଟାଲ ରୋଡ୍ରେ ଥିବା ଶିଶୁ ଭବନ ଅଭିମୁଖେ ଯାଉଥିଲା। ଗାଡ଼ିରେ ଶିଶୁଙ୍କ ସହ ଦୁଇ ଜଣ ମହିଳା ମଧ୍ୟ ଥିଲେ। ମାତ୍ର ଖାନନଗର ଛକ ନିକଟରେ ଆମ୍ବୁଲାନ୍ସଟି ପହଞ୍ଚିବା ସମୟରେ ହଠାତ୍ ଏଥିରୁ ଧୂଆଁ ବାହାରିଥିଲା ଏବଂ ଦେଖୁଦେଖୁ ଗାଡ଼ିରେ ନିଆଁ ଲାଗିଯାଇଥିଲା।
ଗାଡ଼ିରୁ ଧୂଆଁ ବାହାରୁଥିବା ଦେଖି ଚାଳକ ଏବଂ ଅନ୍ୟ କର୍ମଚାରୀମାନେ ତୁରନ୍ତ ତତ୍ପରତା ପ୍ରକାଶ କରିଥିଲେ। ସେମାନେ ଗାଡ଼ିକୁ ରାସ୍ତା କଡ଼ରେ ରଖି ଭିତରେ ଥିବା ଶିଶୁ ଏବଂ ଦୁଇ ମହିଳାଙ୍କୁ ସୁରକ୍ଷିତ ଭାବେ ବାହାରକୁ ଆଣିଥିଲେ। ଏହାର କିଛି ସମୟ ମଧ୍ୟରେ ନିଆଁ ଆମ୍ବୁଲାନ୍ସଟିକୁ ସମ୍ପୂର୍ଣ୍ଣ ରୂପେ କବ୍ଜା କରିନେଇଥିଲା।
ଖବର ପାଇ କଟକ ସହରର ଦମକଳବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ମାତ୍ର ସେତେବେଳକୁ ଆମ୍ବୁଲାନ୍ସଟିର ଅଧିକାଂଶ ଅଂଶ ଜଳିପୋଡ଼ି ଛାରଖାର ହୋଇଯାଇଥିଲା। ଗାଡ଼ିର ୱାରିଂରେ ସର୍ଟ ସର୍କିଟ୍ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ପ୍ରାଥମିକ ସ୍ତରରେ ଅନୁମାନ କରାଯାଉଛି। ଘଟଣା ପରେ ସ୍ଥାନୀୟ ପୋଲିସ ଏବଂ ଅଗ୍ନିଶମ ବାହିନୀ ପକ୍ଷରୁ ଏହାର ଅଧିକ ତଦନ୍ତ ଜାରି ରହିଛି।
