ହଠାତ୍ କାହିଁକି ବିଧାୟକ ପ୍ରାର୍ଥୀଙ୍କ ବୈଠକ ଡାକିଲେ କେଜ୍ରିୱାଲ? ଆପ୍‌କୁ ‘ଅପରେସନ ଲୋଟସ୍’ ଚିନ୍ତା

ନୂଆଦିଲ୍ଲୀ: ଦିଲ୍ଲୀରେ ବିଧାନସଭା ନିର୍ବାଚନର ଗଣନା ପୂର୍ବରୁ ଲଗାତାର ହଙ୍ଗାମା ଲାଗି ରହିଛି। ‘ଅପରେସନ୍ ଲୋଟସ୍’ର ସମ୍ଭାବନାକୁ ଆକଳନ କରି, ଶାସକ ଆମ ଆଦମୀ ପାର୍ଟି (ଆପ୍) ସତର୍କତା ଅବଲମ୍ବନ କରିଛି। ଏହାକୁ ଦୃଷ୍ଟିରେ ରଖି, ଅରବିନ୍ଦ କେଜରିୱାଲ ଆଜି ଶୁକ୍ରବାର ଦଳର ଏକ ବଡ଼ ବୈଠକ ଡାକିଛନ୍ତି। କେଜରିୱାଲ ଏହି ବୈଠକର ଅଧ୍ୟକ୍ଷତା କରିଛନ୍ତି। ବୈଠକରେ ସମସ୍ତ ବିଧାୟକ ପ୍ରାର୍ଥୀଙ୍କୁ ଡକାଯାଇଛି।

ଦିଲ୍ଲୀ ବିଧାନସଭା ନିର୍ବାଚନର ଫଳାଫଳ ପୂର୍ବରୁ ଏହି ବୈଠକ ହେଉଥିବାରୁ, ଏହାକୁ ନେଇ ଅନେକ କଳ୍ପନାଜଳ୍ପନା କରାଯାଉଛି। ୭୦ଟି ବିଧାୟକ ପ୍ରାର୍ଥୀଙ୍କୁ ନେଇ ବୈଠକ ଅନୁଷ୍ଠିତ ହୋଇଛି। ଏହି ବୈଠକ ବିଷୟରେ କୁହାଯାଉଛି ଯେ ‘ଅପରେସନ୍ ଲୋଟସ୍’କୁ ଦୃଷ୍ଟିରେ ରଖି ଏହି ବୈଠକ ଡକାଯାଇଛି। ଆପ୍ ବିଜେପି ଉପରେ ଅଭିଯୋଗ ଆଣି କହିଛି ଯେ ଦିଲ୍ଲୀ ନିର୍ବାଚନ ଫଳାଫଳ ପୂର୍ବରୁ ୭ ଜଣ ଆପ୍ ବିଧାୟକଙ୍କୁ ଦଳ ଛାଡିବା ପାଇଁ ପ୍ରତ୍ୟେକଙ୍କୁ ୧୫ କୋଟି ଟଙ୍କା ପ୍ରଦାନ କରାଯାଉଛି। ଏହା ବ୍ୟତୀତ ଅରବିନ୍ଦ କେଜରିୱାଲ ଏକଜିଟ୍ ପୋଲ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।

କେଜ୍ରିୱାଲ କହିଛନ୍ତି ଯେ ଯଦି କିଛି ଏକଜିଟ୍ ପୋଲରେ କୌଣସି ଦଳ ୫୫ରୁ ଅଧିକ ଆସନ ପାଉଛି, ତେବେ ଆମର ପ୍ରାର୍ଥୀମାନଙ୍କୁ ଭାଙ୍ଗିବା ପାଇଁ କାହିଁକି ଡାକରା ଦିଆଯାଉଛି? ସେ ସୋସିଆଲ ମିଡିଆରେ ଲେଖିଛନ୍ତି ଯେ ଏହି ସର୍ଭେଗୁଡ଼ିକ ‘ନକଲି’ ଏବଂ ପ୍ରାର୍ଥୀମାନଙ୍କୁ ମାନସିକ ଭାବରେ ପ୍ରଭାବିତ କରିବା ପାଇଁ ବ୍ୟବହାର କରାଯାଉଛି।

ଭୋଟ ଗଣତି ନେଇ ଦିଲ୍ଲୀରେ ନିର୍ବାଚନ କମିଶନ ଏବଂ ପ୍ରଶାସନ ସଜାଗ ଅଛନ୍ତି। ଷ୍ଟ୍ରଙ୍ଗ ରୁମରେ କଡ଼ା ସୁରକ୍ଷା ମଧ୍ୟରେ ଇଭିଏମଗୁଡ଼ିକୁ ରଖାଯାଇଛି, ଯେଉଁଠାରେ ୨୪ ଘଣ୍ଟା ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ରହିଛି। ରାଜଧାନୀର ୧୯ଟି ସ୍ଥାନରେ ମୋଟ ଷ୍ଟ୍ରଙ୍ଗ ରୁମ୍ ନିର୍ମାଣ କରାଯାଇଛି, ଯେଉଁଥିରେ ପ୍ରତ୍ୟେକ ବିଧାନସଭା ନିର୍ବାଚନମଣ୍ଡଳୀ ପାଇଁ ଗୋଟିଏ ଷ୍ଟ୍ରଙ୍ଗ ରୁମ୍ ଅନ୍ତର୍ଭୁକ୍ତ। ଏହି ବୈଠକରେ କେଜ୍ରିୱାଲ ଏବଂ ଅନ୍ୟ ଆପ ନେତାମାନେ ନିର୍ବାଚନ ଫଳାଫଳ ପୂର୍ବରୁ ପ୍ରାର୍ଥୀମାନଙ୍କୁ ଏକଜୁଟ ରଖିବା ଏବଂ ବିଜେପିର କଥିତ ‘ଅପରେସନ ଲୋଟସ୍’ର ମୁକାବିଲା କରିବା ପାଇଁ ରଣନୀତି ଉପରେ ଆଲୋଚନା କରିପାରିବେ।