ନୂଆଦିଲ୍ଲୀ: ଦ୍ୱିତୀୟ ଥର ପାଇଁ ପାକିସ୍ତାନର ରାଷ୍ଟ୍ରପତି ହୋଇଛନ୍ତି ଆସିଫ ଅଲି ଜରଦାରୀ । ଏଥି ସହିତ ସେ ପାକିସ୍ତାନର ୧୪ ତମ ରାଷ୍ଟ୍ରପତି ହୋଇଛନ୍ତି। ଆସିଫ ପାକିସ୍ତାନ ପିପୁଲ୍ସ ପାର୍ଟିର ସହ-ଅଧ୍ୟକ୍ଷ ମଧ୍ୟ ଅଛନ୍ତି । ୬୮ ବର୍ଷିୟ ଜରଦାରୀ ପିପିପି ଏବଂ ପିଏମଏଲ-ଏନ ଦଳର ମିଳିତ ପ୍ରାର୍ଥୀ ହୋଇଥିବାବେଳେ ତାଙ୍କ ପ୍ରତିଦ୍ୱନ୍ଦ୍ୱୀ ପ୍ରାର୍ଥୀ ମହମୁଦ ଖାନ ଆଖାକଜାଇ ଥିଲେ।
ରାଷ୍ଟ୍ରପତି ନିର୍ବାଚନରେ ଆସିଫ ଅଲି ଜରଦାରୀ ଏକ ବୃହତ ସଂଖ୍ୟା ଗରିଷ୍ଠତା ହାସଲ କରି ସହଜରେ ଜିତିଥିଲେ। ସେ ସଂସଦର ଉଭୟ ଗୃହ ଏବଂ ଦେଶର ଚାରୋଟି ପ୍ରଦେଶ ମଧ୍ୟରୁ ତିନୋଟି ବିଧାନସଭା ସଭାରେ ସଂଖ୍ୟାଗରିଷ୍ଠତା ହାସଲ କରିଥିଲେ। ଆସିଫ୍ ଅଲି ଜରଦାରୀ ମୋଟ ୪୧୧ ଭୋଟ୍ ପାଇଥିବା ବେଳେ ତାଙ୍କର ପ୍ରତିଦ୍ୱନ୍ଦ୍ୱୀ ମହମୁଦ ଆଖାକଜାଇ ମାତ୍ର ୧୮୧ ଭୋଟ ପାଇଥିଲେ।
ଆସିଫ ଅଲି ଜରଦାରୀ ଦ୍ୱିତୀୟ ଥର ପାଇଁ ପାକିସ୍ତାନର ରାଷ୍ଟ୍ରପତି ହୋଇଛନ୍ତି। ଏହାପୂର୍ବରୁ ୨୦୦୮ ରୁ ୨୦୧୩ ମଧ୍ୟରେ ସେ ପାକିସ୍ତାନର ଏକାଦଶ ରାଷ୍ଟ୍ରପତି ଭାବରେ କାର୍ଯ୍ୟ କରିଥିଲେ। ସେ ହେଉଛନ୍ତି ପାକିସ୍ତାନର ପ୍ରଥମ ରାଷ୍ଟ୍ରପତି ଯିଏ ଗଣତାନ୍ତ୍ରିକ ଭାବରେ ନିର୍ବାଚିତ ହୋଇଥିଲେ ଏବଂ ତାଙ୍କ କାର୍ଯ୍ୟକାଳ ସଫଳ ହେବା ପରେ ପରବର୍ତ୍ତୀ ରାଷ୍ଟ୍ରପତିଙ୍କୁ ଏହି ଦାୟିତ୍ଵ ପ୍ରଦାନ କରିଥିଲେ। ସେ ବେନଜିର ଭୁଟ୍ଟୋ ସରକାରରେ ଅନେକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ତେବେ ସରକାରଙ୍କ ପତନ ପରେ ତାଙ୍କ ବିରୋଧରେ ଅନେକ ଗୁରୁତର ଅଭିଯୋଗ ଆସି ତାଙ୍କୁ ଗିରଫ କରାଯାଇଥିଲା। ଜରଦାରୀ ବର୍ତ୍ତମାନ ରାଷ୍ଟ୍ରପତି ଥିବା ଡ. ଆରିଫ ଅଲଭିଙ୍କ ସ୍ଥାନ ନେବେ । ଡ. ଆରିଫ ଅଲଭିଙ୍କର କାର୍ଯ୍ୟକାଳ ଗତ ବର୍ଷ ଶେଷ ହୋଇଥିଲା। କିନ୍ତୁ ନୂତନ ନିର୍ବାଚନ କଲେଜ ଗଠନ ହୋଇ ନ ଥିବାରୁ ସେ ତାଙ୍କ ପଦବୀରେ ଏପର୍ଯ୍ୟନ୍ତ ରହିଛନ୍ତି ।