ନୂଆଦିଲ୍ଲୀ: ମଦ ଦୁର୍ନୀତି ମାମଲାରେ ଗିରଫ ହୋଇ ତିହାର ଜେଲରେ ଅଛନ୍ତି ମୁଖ୍ୟ ମନ୍ତ୍ରୀ ଅରବିନ୍ଦ କେଜ୍ରିୱାଲ । ଏହାରି ମଧ୍ୟରେ ରାଉଜ ଆଭେନ୍ୟୁ କୋର୍ଟରେ ଏହି ମାମଲାର ଶୁଣାଣି ଚାଲିଥିବା ବେଳେ ଇଡି ଦାବି କରିଛି ଯେ, ଜାଣିଶୁଣି କେଜ୍ରିୱାଲ ଅଧିକ ମିଠା ଖାଉଛନ୍ତି । ଯଦ୍ବାରା ତାଙ୍କ ସୁଗାର ମାତ୍ରା ବଢିଲେ ସେ ମେଡିକାଲ ଆଧାରରେ ଜାମିନ ହାସଲ କରିପାରିବେ । ଏ ଘଟଣା ଉପରେ ବିଜେପି ଉପରେ ବର୍ଷିଛନ୍ତି କେଜ୍ରିୱାଲ ସରକାରଙ୍କ ମନ୍ତ୍ରୀ ଆତିଶୀ ।
ଆତିଶୀ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଅରବିନ୍ଦ କେଜ୍ରିୱାଲଙ୍କ ବିରୋଧରେ ବିଜେପି ଓ ପ୍ରଧାନମନ୍ତ୍ରୀ ମୋଦି ଏକ ବଡ଼ ଷଡଯନ୍ତ୍ର କରୁଛନ୍ତି । ସେ କହିଛନ୍ତି ଯେ, କେଜ୍ରିୱାଲଙ୍କୁ ହତ୍ୟା କରିବା ପାଇଁ ଏହା ଏକ ପ୍ଲାନ୍ । ଅରବିନ୍ଦ କେଜ୍ରିୱାଲ ୩୦ ବର୍ଷ ଧରି ମଧୁମେହ ରୋଗରେ ପୀଡିତ ଥିଲେ । ସେ ପ୍ରତିଦିନ ୫୪ ୟୁନିଟ୍ ଇନସୁଲିନ୍ ନିଅନ୍ତି । ଘରୋଇ ଖାଦ୍ୟ ଖାଇବାକୁ କୋର୍ଟ ଅନୁମତି ମଧ୍ୟ ଦେଇଛନ୍ତି । ଇଡି ଏବଂ ବିଜେପି ତାଙ୍କୁ ଘର ଖାଦ୍ୟ ଖାଇବାକୁ ବାରଣ କରିବାକୁ ଚାହୁଁଛନ୍ତି । କୋର୍ଟରେ ଇଡି କହିଛନ୍ତି କେଜ୍ରିଓ୍ବାଲ ମିଠା ଚା’, ଆଳୁ ଏବଂ ମିଠା ଖାଉଛନ୍ତି ତାହା ସମ୍ପୂର୍ଣ୍ଣ ମିଥ୍ୟା’ ।
ଇଡିର ଦ୍ୱିତୀୟ ମିଥ୍ୟା ହେଉଛି, ଓଜନ ବଢାଇବା ସେ କଦଳୀ ଖାଉଛନ୍ତି । ସୁଗାର ରୋଗୀଙ୍କୁ ସବୁବେଳେ ଟଫି ଏବଂ କଦଳୀ ପାଖରେ ରଖିବାକୁ କୁହାଯାଏ । ଏହା କୋର୍ଟଙ୍କ ନିର୍ଦ୍ଦେଶରେ ମଧ୍ୟ ଲେଖାଯାଇଛି ବୋଲି ଆତିଶୀ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, ତୃତୀୟ ମିଥ୍ୟା ହେଉଛି, କେଜ୍ରିଓ୍ବାଲ ପ୍ରତିଦିନ ଆଳୁ-ପୁରୀ ଖାଉଛନ୍ତି । ଇଡି କୋର୍ଟରେ ଦାଖଲ କରିଥିବା ଡାଏଟ୍ ଚାର୍ଟରେ ଉଲ୍ଲେଖ କରାଯାଇଛି ଯେ, କେଜ୍ରିଓ୍ବାଲ ଗୋଟିଏ ଦିନ ଆଳୁ-ପୁରୀ ଖାଇଥିଲେ । ଫେବୃଆରୀ 1 ତାରିଖରୁ ସେ ଜଣେ ଡାକ୍ତରଙ୍କ ତତ୍ତ୍ବାବଧାନରେ ଇନସୁଲିନ୍ ରିଭର୍ସାଲ୍ କାର୍ଯ୍ୟକ୍ରମ କରୁଛନ୍ତି । କିନ୍ତୁ ମାର୍ଚ୍ଚ 21 ରେ ଗିରଫ ପରେ ଏହି କାର୍ଯ୍ୟକ୍ରମ ବନ୍ଦ ହୋଇଯାଇଛି ।
ଗତ କିଛି ଦିନ ହେବ ସୁଗାର ସ୍ତର ତିନି ଶହ ରୁ ଅଧିକ ବୃଦ୍ଧି ପାଇଛି, କିନ୍ତୁ ଜେଲ କର୍ତ୍ତୃପକ୍ଷ ଇନସୁଲିନ୍ ତାଙ୍କୁ ଦେଉ ନାହାଁନ୍ତି । ମୁଁ ଇଡିକୁ କହିବାକୁ ଚାହେଁ ଯେ ଆଜି ବିଜେପି ଆପଣଙ୍କୁ ବଞ୍ଚାଇ ପାରିବ, କିନ୍ତୁ ଭଗବାନ ଆପଣଙ୍କୁ ରକ୍ଷା କରିବେ ନାହିଁ । ଇଡି ଏହାକୁ ବିରୋଧ କରୁଥିବା ଭିଡିଓ କନଫରେନ୍ସିଂ ମାଧ୍ୟମରେ ତାଙ୍କ ଡାକ୍ତରଙ୍କ ସହ କଥା ହେବାକୁ ସେ ଦାବି କରିଛନ୍ତି । ସେମାନେ ତାଙ୍କୁ ତିହାର ଜେଲ ଖାଦ୍ୟ ଦେଇ ହତ୍ୟା କରିବାକୁ ଷଡଯନ୍ତ୍ର କରୁଛନ୍ତି ବୋଲି ଆତିଶୀ କହିଛନ୍ତି ।