ମୁମ୍ବାଇ: ବମନ୍ ଇରାନୀ ଚଳଚ୍ଚିତ୍ର ଜଗତରେ ସୁପରିଚିତ ଅଭିନେତା ଭାବରେ ନିଜକୁ ପ୍ରତିଷ୍ଠିତ କରିଛନ୍ତି। ସେ ସମସ୍ତ ପ୍ରକାର ଭୂମିକାରେ ନିଜକୁ ଫିଟ୍ କରିପାରନ୍ତି। ଅନେକ ଚଳଚ୍ଚିତ୍ରରେ ବମନ୍ ଇରାନୀ ତାଙ୍କ ଚରିତ୍ରକୁ ଏପରି ଢଙ୍ଗରେ ଅଭିନୟ କରିଛନ୍ତି ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଛି। ଫିଲ୍ମ ‘ଥ୍ରୀ ଇଡିଅଟ୍ସ’ରେ ଭାଇରସର ଭୂମିକା ହେଉ କିମ୍ବା’ ମୁନ୍ନା ଭାଇ ଏମବିବିଏସ୍’ର ଡାକ୍ତର ଆସ୍ଥାନା ସବୁଥିରେ ବମନ୍ଙ୍କ ଚରିତ୍ର ବେଶ୍ ଦମ୍ଦାର୍ ରହିଛି। ଆଜି ବମନ୍ ଇରାନୀଙ୍କ ଜନ୍ମଦିନ।
ବମନ୍ ଇରାନୀ ୨ ଡିସେମ୍ବର ୧୯୫୯ରେ ଜନ୍ମଗ୍ରହଣ କରିଥିଲେ। ଚଳଚ୍ଚିତ୍ରରେ ଅଭିନୟ କରିବା ପୂର୍ବରୁ ବମନ୍ ଫଟୋଗ୍ରାଫିକୁ ଭଲ ପାଉଥିଲେ। ସ୍କୁଲ ଦିନରେ ସେ ସ୍କୁଲ କ୍ରିକେଟ୍ ମ୍ୟାଚ୍ର ଫଟୋ ଉଠାଉଥିଲେ। ଏହି ଅଭ୍ୟାସ ଯୋଗୁଁ ସେ ପୁଣେରେ ପ୍ରଥମ ଥର ପାଇଁ ବୃତ୍ତିଗତ ଭାବରେ ବାଇକ୍ ରେସ୍ ଫଟୋଗ୍ରାଫ୍ କରିଥିଲେ ଏବଂ ପରେ ମୁମ୍ବାଇରେ ବକ୍ସିଂ ବିଶ୍ୱକପ୍ ମଧ୍ୟ କଭର୍ କରିଥିଲେ।
ବହୁତ କମ୍ ଲୋକ ଜାଣିଥିବେ ଯେ ବମନ୍ ଚଳଚ୍ଚିତ୍ରରେ ଆସିବା ପୂର୍ବରୁ ହୋଟେଲରେ ୱେଟର କାମ କରୁଥିଲେ। ବମନ୍ ମୁମ୍ବାଇର ତାଜ ହୋଟେଲରେ ୨ ବର୍ଷ ୱେଟର ଏବଂ ରୁମ୍ ସଭିର୍ସିଂ କର୍ମଚାରୀ ଭାବରେ କାର୍ଯ୍ୟ କରିଥିଲେ। ଏହି ଚାକିରି ଛାଡିବା ପରେ ବମନ୍ ତାଙ୍କ ମାଙ୍କ ସହ ଏକ ବେକେରୀରେ କାମ କରିଥିଲେ। ଏଠାରେ ସେ ଦିନେ ପ୍ରସିଦ୍ଧ କୋରିଓଗ୍ରାଫର ଶ୍ୟାମାକ ଡାଭାରଙ୍କୁ ଭେଟିଥିଲେ।
ଏହି ବୈଠକ ପରେ ଶ୍ୟାମାକ ବମନଙ୍କୁ ଥିଏଟରରେ କାମ କରିବାକୁ ପରାମର୍ଶ ଦେଇଥିଲେ ଏବଂ ବମନ୍ ଥିଏଟରରେ କାମ କରିବା ଆରମ୍ଭ କରିଥିଲେ। ବମନ ଧୀରେ ଧୀରେ ଥିଏଟରରେ ନିଜର ପରିଚୟ ସୃଷ୍ଟି କଲେ। ୨୦୦୧ରେ, ସେ ଦୁଇଟି ଇଂରାଜୀ ଚଳଚ୍ଚିତ୍ର ‘ଏଭ୍ରିବଡି ସେଜ୍ ଆଇ ଆମ୍ ଫାଇନ୍’ ଏବଂ ‘ଲେଟ୍ସ୍ ଟକ୍’ରେ କାମ କରିଥିଲେ।