ନୂଆଦିଲ୍ଲୀ: ସିବିଏସଇ ଦ୍ୱାଦଶ ଶ୍ରେଣୀ ଉତ୍ତରଖାତା ମୂଲ୍ୟାୟନକୁ ନେଇ ବଡ଼ ଗଡ଼ବଡ଼ ସାମ୍ନାକୁ ଆସିଛି। ଫିଜିକ୍ସ ଓ କେମିଷ୍ଟ୍ରି ଉତ୍ତରଖାତା ସମ୍ପର୍କିତ ଦୁଇଟି ଅଭିଯୋଗରେ ତ୍ରୁଟି ଥିବା କଥା ସିବିଏସଇ ସ୍ୱୀକାର କରିଛି। ବୋର୍ଡ କହିଛି, ଯେଉଁ ଦୁଇ ମାମଲାରେ ଗଡ଼ବଡ଼ ମିଳିଛି, ସେଠାରେ ଛାତ୍ରଙ୍କ ମାର୍କ ସଂଶୋଧନ କରାଯିବ।
ଘଟଣାର ଆରମ୍ଭ ହୋଇଥିଲା ବେଦାନ୍ତ ଶ୍ରୀବାସ୍ତବ ନାମକ ଜଣେ ଦ୍ୱାଦଶ ଶ୍ରେଣୀ ଛାତ୍ରଙ୍କ ସୋସିଆଲ ମିଡିଆ ପୋଷ୍ଟରୁ। ଫିଜିକ୍ସରେ ଅପେକ୍ଷାକୃତ କମ୍ ମାର୍କ ମିଳିବା ପରେ ସେ ସିବିଏସଇର ପୁନଃମୂଲ୍ୟାୟନ ପ୍ରକ୍ରିୟାରେ ନିଜ ଉତ୍ତରଖାତାର ଫଟୋକପି ଚାହିଥିଲେ। କିନ୍ତୁ ତାଙ୍କୁ ଯେଉଁ ଫିଜିକ୍ସ ଉତ୍ତରଖାତା ଦିଆଯାଇଥିଲା, ତାହା ନିଜର ନୁହେଁ ବୋଲି ସେ ଅଭିଯୋଗ କରିଥିଲେ।
ମେ ୨୩ରେ ବେଦାନ୍ତ Xରେ ଏନେଇ ପୋଷ୍ଟ କରିଥିଲେ। ସେ କହିଥିଲେ, କମ୍ ମାର୍କ ଦେଖି ଉତ୍ତରଖାତାର କପି ମଗାଯାଇଥିଲା, କିନ୍ତୁ ସିବିଏସଇ ଅପଲୋଡ୍ କରିଥିବା ଫିଜିକ୍ସ ଖାତା ତାଙ୍କର ନୁହେଁ। ଏହି ପୋଷ୍ଟ ଭାଇରାଲ ହେବା ପରେ ବୋର୍ଡର ମୂଲ୍ୟାୟନ ଓ ଡିଜିଟାଲ ଯାଞ୍ଚ ପ୍ରକ୍ରିୟାକୁ ନେଇ ନୂଆ ପ୍ରଶ୍ନ ଉଠିଥିଲା।
ବିବାଦ ବଢ଼ିବା ପରେ ସିବିଏସଇ ଏହି ମାମଲାକୁ ଗୁରୁତ୍ୱର ସହ ନେଇଥିଲା। ବୋର୍ଡର ଜଏଣ୍ଟ ସେକ୍ରେଟାରୀ ବେଦାନ୍ତଙ୍କୁ ଉତ୍ତର ଦେଇ, ତାଙ୍କର ସଠିକ ଫିଜିକ୍ସ ଉତ୍ତରଖାତା ପଠାଯାଇଥିବା ଓ ନୂଆ ମୂଲ୍ୟାୟନ ଆଧାରରେ ମାର୍କ ଅପଡେଟ୍ କରାଯିବ ବୋଲି ଜଣାଇଛନ୍ତି। ଏହା ସହିତ ବୋର୍ଡ ଗଡ଼ବଡ଼ ଥିବା କଥା ପ୍ରାୟ ସ୍ପଷ୍ଟ କରିଛି।
ଏହା ମଧ୍ୟରେ କେମିଷ୍ଟ୍ରି ଉତ୍ତରଖାତା ସମ୍ପର୍କିତ ଆଉ ଏକ ସମାନ ଅଭିଯୋଗ ସାମ୍ନାକୁ ଆସିଛି। ଜଣେ ଛାତ୍ର ସୋସିଆଲ ମିଡିଆରେ କହିଛନ୍ତି, ସିବିଏସଇ ତାଙ୍କ ଅଭିଯୋଗକୁ ଠିକ୍ ବୋଲି ମାନିଛି ଓ ଆଗାମୀ ପଦକ୍ଷେପ ପାଇଁ ସେ ଅପେକ୍ଷା କରୁଛନ୍ତି।
ରିପୋର୍ଟ ଅନୁସାରେ, ସୋସିଆଲ ମିଡିଆରେ ଉଠୁଥିବା ଏପରି ଅଭିଯୋଗ ଓ ପରୀକ୍ଷା ଫଳ ସମ୍ପର୍କିତ ଚିନ୍ତାକୁ ଦେଖିବା ପାଇଁ ସିବିଏସଇର ଏକ ବିଶେଷ ଟିମ୍ ନଜର ରଖୁଛି। ଏହି ଘଟଣା ପରେ ଉତ୍ତରଖାତାର ଫଟୋକପି, ମାର୍କ ଭେରିଫିକେସନ୍ ଓ ପୁନଃମୂଲ୍ୟାୟନ ବ୍ୟବସ୍ଥାକୁ ନେଇ ଅଭିଭାବକ ଓ ଛାତ୍ରଛାତ୍ରୀଙ୍କ ମଧ୍ୟରେ ଚିନ୍ତା ବଢ଼ିଛି।
ସିବିଏସଇ ଏବେ ମାର୍କ ସଂଶୋଧନର କଥା କହିଥିଲେ ମଧ୍ୟ, ଅନେକ ଛାତ୍ର ଓ ଅଭିଭାବକ ମୂଲ୍ୟାୟନ ପ୍ରକ୍ରିୟାକୁ ଆହୁରି ସ୍ୱଚ୍ଛ ଓ ନିର୍ଭୁଲ କରିବାକୁ ଦାବି କରୁଛନ୍ତି। ଆଗକୁ ବୋର୍ଡ ଏହି ପ୍ରକ୍ରିୟାରେ କେଉଁ ପରିବର୍ତ୍ତନ କରେ, ତାହା ଉପରେ ଏବେ ସମସ୍ତଙ୍କ ନଜର ରହିଛି।
