ନୂଆଦିଲ୍ଲୀ: ଓଡ଼ିଶା ସମେତ ବିଭିନ୍ନ ରାଜ୍ୟରେ ଚାଷ ହେଉଥିବା ନାଗଫେଣୀ ଫଳ (ଡ୍ରାଗନ ଫ୍ରୁଟ୍ ଇଂରାଜୀରେ)କୁ ଅଧିିକରୁ ଅଧିକ ଚାଷ କରାଯିବ। କଣ୍ଟାଯୁକ୍ତ ଏହି ଫଳକୁ ଅଧିକରୁ ଅଧିକ ଚାଷ କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ନିକଟରେ ଗୁଜରାଟ ଓ ହରିଆଣା ସରକାର ଏପରି ନିଷ୍ପତ୍ତି ନେଇଛନ୍ତି ।
ଏହି ନାଗଫେଣୀ ଫଳ ସ୍ୱାସ୍ଥ୍ୟ ପାଇଁ ବହୁତ ହିତକର। ଡାଇବେଟିସ୍ ରୋଗୀଙ୍କ ପାଇଁ ଏହି ଫଳ ଭଲ ବୋଲି କୁହାଯାଏ। ଏଥିରେ କ୍ୟାଲୋରୀ କମ୍ ଥାଏ ଏବଂ ଆଇରନ୍, କ୍ୟାଲସିୟମ୍, ପୋଟାସିୟମ୍ ଏବଂ ଜିଙ୍କ୍ ଭଳି ପୋଷକ ତତ୍ତ୍ୱ ଅଧିକ ଥାଏ। ତେଣୁ ଇଂରାଜୀରେ ଏହାକୁ ‘ସୁପର ଫ୍ରୁଟ୍’ ବୋଲି ମଧ୍ୟ କୁହାଯାଏ।
ବର୍ତ୍ତମାନ ଏହି ଫଳ ଚାଷ କରୁଥିବା ରାଜ୍ୟମାନଙ୍କ ମଧ୍ୟରେ ମିଜୋରାମ ଶୀର୍ଷରେ ରହିଛି। ଏହି ଫଳ ମେକ୍ସିକୋର ସ୍ୱଦେଶୀ ଏବଂ ବର୍ତ୍ତମାନ ଏହା ମୁଖ୍ୟତଃ ଭିଏତନାମରେ ଉତ୍ପାଦିତ ହେଉଛି। ଏହି ଫଳର ରପ୍ତାନୀ ଭିଏତନାମର ଜିଡିପିରେ ଏକ ବଡ ଯୋଗଦାନ ଦେଇଛି। ଶୀତଳ ଅଞ୍ଚଳ ବ୍ୟତୀତ ଭାରତର ସମସ୍ତ ରାଜ୍ୟ ଡ୍ରାଗନ ଫଳ ଗଛ ଚାଷ ପାଇଁ ଉପଯୁକ୍ତ। ଉତ୍ପାଦନ କମ୍ ଥିବାରୁ ବଜାର ଚାହିଦା ଅଧିକ ରହିଥିବା ସୂଚନା ରହିଛି ।
ଚାହିଦାକୁ ଦୃଷ୍ଟିରେ ରଖି ଭାରତରେ ଏହାର ଚାଷକୁ ବ୍ୟାପକ କରାଯାଇପାରିବ ବୋଲି କେନ୍ଦ୍ର ସରକାର ଚିନ୍ତା କରୁଛନ୍ତି। ଏବେ ଏହି ଫଳ ସାରା ଦେଶରେ ୩ ହଜାର ହେକ୍ଟରରେ ଚାଷ କରାଯାଉଛି। ଏହାକୁ ପାଞ୍ଚ ବର୍ଷ ମଧ୍ୟରେ ୫୦ ହଜାର ହେକ୍ଟର ଜମିରେ ଚାଷ କରି ବୃଦ୍ଧି କରିବାକୁ ଯୋଜନା କରାଯାଉଛି।
ନିକଟରେ ଗୁଜରାଟ ସରକାର ଡ୍ରାଗନ ଫଳର ନାମ କମଲମ (ପଦ୍ମ) ରଖିଥିଲେ । ଏହାକୁ ଚାଷ କରୁଥିବା ଚାଷୀଙ୍କୁ ପ୍ରୋତ୍ସାହନ ଦେବାକୁ ମଧ୍ୟ ଘୋଷଣା କରିଥିଲେ। ଏହି ବିଦେଶୀ ଫଳ କିସମକୁ ରୋପଣ କରିବା ପାଇଁ ପ୍ରସ୍ତୁତ ଥିବା ଚାଷୀଙ୍କ ପାଇଁ ହରିଆଣା ସରକାର ଏକ ଅନୁଦାନ ମଧ୍ୟ ପ୍ରଦାନ କରନ୍ତି।
ଗୁରୁବାର ଆୟୋଜିତ ହୋଇଥିବା ଏକ ଜାତୀୟ ସମ୍ମିଳନୀରେ କେନ୍ଦ୍ର କୃଷି ସଚିବ ମନୋଜ ଆହୁଜା କହିଛନ୍ତି ଯେ ନାଗଫେଣୀ ଫଳର ପୁଷ୍ଟିକର ମୂଲ୍ୟ ଯୋଗୁଁ ଘରୋଇ ଓ ବିଶ୍ୱ ବଜାରରେ ଏହାର ଚାହିଦା ଅଧିକ ରହିଛି। ପାଞ୍ଚ ବର୍ଷ ମଧ୍ୟରେ ୫୦ ହଜାର ହେକ୍ଟର ଜମିରେ ଚାଷ କରିବାକୁ ଲକ୍ଷ୍ୟ ରଖାଯାଇଛି। ଏପରି ହେଲେ ଫଳର ଚାହିଦା ପୂର୍ବଭଳି ରହିବ। ଚାଷୀଙ୍କ ପାଇଁ ଦର ମଧ୍ୟ ଭଲ ରହିବ।
ଏହି ଫଳକୁ ଅବକ୍ଷୟ ମାଟି ଓ ବର୍ଷାଜଳ ଜମିରେ ଚାଷ କରାଯାଇପାରିବ ବୋଲି ଆହୁଜା କହିଛନ୍ତି। ସେ ଆହୁରି କହିଥିଲେ ଯେ କୃଷକମାନଙ୍କୁ ଉତ୍ତମ ଗୁଣବତ୍ତା ବିଶିଷ୍ଟ ରୋପଣ ସାମଗ୍ରୀ ଯୋଗାଇବାରେ କେନ୍ଦ୍ର ସରକାର ରାଜ୍ୟମାନଙ୍କୁ ସହାୟତା କରିବେ।
ଏହି କଣ୍ଟାଯୁକ୍ତ ଫଳ ଗଛକୁ ଅଧିକ ପାଣିର ଆବଶ୍ୟକତା ନାହିଁ ଏବଂ ଶୁଖିଲା ଜମିରେ ମଧ୍ୟ ଚାଷ କରାଯାଇପାରିବ। ସେହିପରି ଏହି ଗଛର ଚାଷ ପାଇଁ ଅଧିକ ଉତ୍ପାଦନକ୍ଷମ ଜମିର ଆବଶ୍ୟକତା ନାହିଁ । ଏହା କମ୍ ଉର୍ବର ଅଞ୍ଚଳରୁ ସର୍ବାଧିକ ଉତ୍ପାଦନ ଦେଇଥାଏ। ଏହା ଅନେକ ଚାଷୀଙ୍କ ପାଇଁ ଲାଭଦାୟକ ହେବ ବୋଲି ସୂଚନା ରହିଛି।
କେନ୍ଦ୍ର ସରକାର ମିଶନ ଫର୍ ଇଣ୍ଟିଗ୍ରେଟେଡ୍ ଡେଭଲପମେଣ୍ଟ ଅଫ୍ ହର୍ଟିକାଲ୍ଚର୍ ଅଧୀନରେ ରାଜ୍ୟ ଓ ଚାଷୀଙ୍କୁ ନିର୍ଦ୍ଦିଷ୍ଟ ଲକ୍ଷ୍ୟଭିତ୍ତିକ ସହାୟତା ଦେବେ ବୋଲି ସୂଚନା ରହିଛି। ଏପରି ହେଲେ ଏହି ଚାଷ ଚାଷୀ ଓ ଖାଉଟିଙ୍କ ପାଇଁ ଲାଭଦାୟକ ହେବ। ଏହା ସମସ୍ତଙ୍କ ପାଇଁ ଲାଭଦାୟକ ସ୍ଥିତି ବୋଲି ସେ କହିଛନ୍ତି। ଏବେ ଭାରତରେ ପ୍ରାୟ ୧୫,୪୯୧ ଟନ ଡ୍ରାଗନ ଫଳ ଆମଦାନୀ କରୁଛି ଏବଂ ଚୀନର ଉତ୍ପାଦନ ସହିତ ସମାନ କ୍ଷମତା ରଖିଛି ।
