ବେଜିଂ: ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ବା କୃତ୍ରିମ ବୁଦ୍ଧିମତା କ୍ଷେତ୍ରରେ ବିଶ୍ୱର ସୁପରପାୱାର ହେବାକୁ ଲକ୍ଷ୍ୟ ରଖିଥିବା ଚୀନ ଏବେ ନିଜ ଦେଶର AI ପ୍ରତିଭା ଓ ବୈଜ୍ଞାନିକମାନଙ୍କ ଉପରେ କଟକଣା ଅଧିକ କଡ଼ାକଡ଼ି କରିବାକୁ ଯାଉଛି। ନୂଆ ନିୟମ ଅନୁଯାୟୀ, AI କ୍ଷେତ୍ରରେ କାମ କରୁଥିବା ଉଚ୍ଚକୋଟୀର ବିଶେଷଜ୍ଞ ଓ ଗବେଷକମାନଙ୍କୁ ବିଦେଶୀ ସଂସ୍ଥା ସହ କାମ କରିବା କିମ୍ବା ଦେଶ ବାହାରକୁ ଯିବା ପାଇଁ ସରକାରଙ୍କଠାରୁ ବିଶେଷ ମଞ୍ଜୁରୀ ବା ଅନୁମତି ନେବାକୁ ପଡ଼ିପାରେ।
ଗତ କିଛି ବର୍ଷ ହେବ ଚୀନ ଏବଂ ଆମେରିକା ମଧ୍ୟରେ AI ଏବଂ ସେମିକଣ୍ଡକ୍ଟର ଟେକ୍ନୋଲୋଜିକୁ ନେଇ ପ୍ରତିଯୋଗିତା ଚରମ ସୀମାରେ ପହଞ୍ଚିଛି। ଚୀନ ଭୟ କରୁଛି ଯେ ତା’ର ସର୍ବଶ୍ରେଷ୍ଠ AI ବିଶେଷଜ୍ଞମାନଙ୍କୁ ଆମେରିକା କିମ୍ବା ଅନ୍ୟ ପାଶ୍ଚାତ୍ୟ ଦେଶଗୁଡ଼ିକ ଅଧିକ ପ୍ୟାକେଜ୍ ଦେଇ ନିଜ ଆଡ଼କୁ ଆକର୍ଷିତ କରିପାରନ୍ତି। ନିଜ ଦେଶର ବୁଦ୍ଧିଜୀବୀ ଓ ଗୁପ୍ତ ଟେକ୍ନୋଲୋଜି ଯେପରି ବାହାରକୁ ନଯାଏ, ସେଥିପାଇଁ ଏହି ‘ବ୍ରେନ୍ ଡ୍ରେନ୍’ (ପ୍ରତିଭା ପଳାୟନ) ରୋକିବାକୁ ବେଜିଂ ଏହି ନିଷ୍ପତ୍ତି ନେଉଛି।
ଚୀନର ପ୍ରମୁଖ AI ପ୍ରୋଜେକ୍ଟରେ ଜଡ଼ିତ ଥିବା ବୈଜ୍ଞାନିକ ଓ ଇଞ୍ଜିନିୟରମାନେ ସହଜରେ ବିଦେଶୀ ବିଶ୍ୱବିଦ୍ୟାଳୟ କିମ୍ବା କମ୍ପାନୀଗୁଡ଼ିକ ସହ ମିଳିତ ଗବେଷଣା କରିପାରିବେ ନାହିଁ।
ଚୀନର ପ୍ରେସିଡେଣ୍ଟ ସି ଜିନପିଙ୍ଗଙ୍କ ସରକାର ଟେକ୍ନୋଲୋଜି କ୍ଷେତ୍ରକୁ ସମ୍ପୂର୍ଣ୍ଣ ଭାବେ ନିଜ ନିୟନ୍ତ୍ରଣରେ ରଖିବାକୁ ଚାହୁଁଛନ୍ତି, ଯାହା ଦ୍ୱାରା ଜାତୀୟ ସୁରକ୍ଷା ବଜାୟ ରହିବ।
ଚୀନର AI ଷ୍ଟାର୍ଟଅପ୍ ଗୁଡ଼ିକରେ ବିଦେଶୀ ପୁଞ୍ଜିନିବେଶ ଏବଂ ବିଦେଶୀ ପ୍ରତିଭାଙ୍କ ନିଯୁକ୍ତି ପ୍ରକ୍ରିୟାକୁ ମଧ୍ୟ ଅଧିକ ଯାଞ୍ଚ କରାଯିବ।
ରାଜନୈତିକ ଓ ଅର୍ଥନୈତିକ ବିଶ୍ଳେଷକଙ୍କ ମତରେ, ଚୀନ ସରକାରଙ୍କ ଏହି କଠୋର ଆଭିମୁଖ୍ୟ ଯୋଗୁଁ ସ୍ଥାନୀୟ AI ବିଶେଷଜ୍ଞମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇପାରେ। ଅତ୍ୟଧିକ କଟକଣା କାରଣରୁ ନୂତନ ଉଦ୍ଭାବନ ବାଧାପ୍ରାପ୍ତ ହେବାର ମଧ୍ୟ ଆଶଙ୍କା ରହିଛି। ତେବେ ଚୀନ ନିଜର ଆତ୍ମନିର୍ଭରଶୀଳତା ଏବଂ ସାମରିକ କ୍ଷେତ୍ରରେ AI ର ବ୍ୟବହାରକୁ ଗୁପ୍ତ ରଖିବା ପାଇଁ ଏହାକୁ ଜରୁରୀ ମନେ କରୁଛି।
