ନୂଆଦିଲ୍ଲୀ: ଦେଶରେ ପୁଣିଥାଏ ଆବଶ୍ୟକୀୟ ଜାଳେଇଣି CNG ଦର ବୃଦ୍ଧି ପାଇଛି। ବିଭିନ୍ନ ସହର ଓ କମ୍ପାନି ଅନୁସାରେ ସିଏନଜି (CNG) ଦାମ୍ ପୁଣି ବୃଦ୍ଧି ପାଇଛି। ଯାହା ଗ୍ରାହକଙ୍କ ଉପରେ ମହଙ୍ଗା ମାଡ଼ ହୋଇଛି। ବାରମ୍ବାର ଦର ବୃଦ୍ଧି ଯୋଗୁଁ ଅଟୋ, କାର୍ ଓ ଯାତାୟାତ ସେବା ବ୍ୟବହାର କରୁଥିବା ଲୋକଙ୍କ ଆର୍ଥିକ ବୋଝ ବଢ଼ିବାରେ ଲାଗିଛି। ଶନିବାର (୨୯ ଅଗଷ୍ଟ) ସକାଳ ୬ଟାରୁ CNG ମୂଲ୍ୟ ପ୍ରତି କିଲୋଗ୍ରାମ ପିଛା ₹୩.୮୯ ବୃଦ୍ଧି ପାଇଛି। ରାଜଧାନୀରେ CNG ମୂଲ୍ୟ ବୃଦ୍ଧିକୁ ନେଇ ଅଟୋ ଚାଳକମାନେ ମଧ୍ୟ ଚିନ୍ତିତ।
ଇରାନ ଓ ଆମେରିକା ମଧ୍ୟରେ ଚାଲିଥିବା ଯୁଦ୍ଧର ପ୍ରଭାବ ଏବେ ସାଧାରଣ ଲୋକଙ୍କ ଉପରେ ପଡ଼ୁଛି। ଦେଶରେ ଲଗାତାର ବଢ଼ୁଥିବା ଦର ମଧ୍ୟରେ IGL ପୁଣିଥରେ CNG ଦର ବଢ଼ାଇଛି। ତେବେ ଏହା ଚଳିତ ବର୍ଷର ପ୍ରଥମ CNG ଦର ବୃଦ୍ଧି ନୁହେଁ। ଗତ ଚାରି ମାସ ମଧ୍ୟରେ ଦିଲ୍ଲୀ-NCR ଅଞ୍ଚଳରେ CNG ଦର ପ୍ରାୟ ୧୦ ଟଙ୍କା ପ୍ରତି କିଲୋଗ୍ରାମ ବଢ଼ିଛି। ଏହି ସମୟ ମଧ୍ୟରେ ମୋଟ ପାଞ୍ଚଥର CNG ଦର ବୃଦ୍ଧି କରାଯାଇଛି।
ଯୁଦ୍ଧ ଆରମ୍ଭ ହେବା ପରେ ୧୫ ମେରେ ପ୍ରଥମଥର CNG ଦର ବଢ଼ିଥିଲା। ସେତେବେଳେ IGL ପ୍ରତି କିଲୋଗ୍ରାମରେ ୨ ଟଙ୍କା ବୃଦ୍ଧି ଘୋଷଣା କରିଥିଲା। ଏହା ପରେ ୧୭ ମେ, ୨୩ ମେ ଏବଂ ୨୬ ମେରେ ମଧ୍ୟ ପର୍ଯ୍ୟାୟକ୍ରମେ CNG ଦର ବଢ଼ାଯାଇଥିଲା। ବିଶେଷ କଥା ହେଉଛି, ୧୭ ମେରୁ ୨୬ ମେ ମଧ୍ୟରେ ମାତ୍ର ୧୦ ଦିନରେ CNG ଦର ୬ ଟଙ୍କା ପ୍ରତି କିଲୋଗ୍ରାମ ବଢ଼ିଥିଲା। ବାରମ୍ବାର CNG ଦର ବୃଦ୍ଧି ଯୋଗୁ ଦିଲ୍ଲୀ-NCRରେ ଗାଡ଼ି ଚଳାଉଥିବା ଲୋକଙ୍କ ଖର୍ଚ୍ଚ ବଢ଼ିବା ସହିତ ସାଧାରଣ ଲୋକଙ୍କ ଉପରେ ମଧ୍ୟ ମହଙ୍ଗାର ଚାପ ବଢ଼ିଛି।
ଇନ୍ଦ୍ରପ୍ରସ୍ଥ ଗ୍ୟାସ ଲିମିଟେଡ୍ (IGL) ଶୁକ୍ରବାର ଏକ ବିବୃତ୍ତିରେ କହିଛି ଯେ CNG ପାଇଁ ଗ୍ୟାସ ଆବଶ୍ୟକତାର ଏକ ପ୍ରମୁଖ ଅଂଶ ଆମଦାନୀ ହୋଇଥିବା ତରଳୀକୃତ ପ୍ରାକୃତିକ ଗ୍ୟାସ (LNG) ରୁ ପୂରଣ କରାଯାଉଛି, ଯାହାର ସ୍ପଟ୍ କିମ୍ବା ବର୍ତ୍ତମାନର ବଜାର ମୂଲ୍ୟ ପଶ୍ଚିମ ଏସିଆରେ ସଂଘର୍ଷ ଆରମ୍ଭ ହେବା ପରଠାରୁ ବୃଦ୍ଧି ପାଇଛି। କମ୍ପାନୀ କହିଛି, “ଆନ୍ତର୍ଜାତୀୟ ବଜାରରେ LNG ମୂଲ୍ୟ ଉଚ୍ଚ ରହିଛି ଏବଂ ମୂଲ୍ୟ ଉପରେ ଏହାର ପ୍ରଭାବ ନିରନ୍ତର ବୃଦ୍ଧି ପାଉଛି। ତେଣୁ, ଗ୍ୟାସ ମୂଲ୍ୟ ବୃଦ୍ଧି ପାଇଁ ଆଂଶିକ ଭାବରେ କ୍ଷତିପୂରଣ ଦେବା ପାଇଁ, CNG ମୂଲ୍ୟ ପ୍ରତି କିଲୋଗ୍ରାମ ୩.୮୯ ଟଙ୍କା ବୃଦ୍ଧି କରିବା ଆବଶ୍ୟକ ହୋଇଯାଇଛି।”