ଭୁବେନଶ୍ୱର: ଏନଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ କଂଗ୍ରେସରୁ କେବଳ ବିଧାୟକ ମହମ୍ମଦ ମୋକିମ ନୁହେଁ ବରଂ ଆହୁରି ଜଣେ ବିଧାୟକ ତାଙ୍କୁ ଭୋଟ୍ ଦେଇଛନ୍ତି । ଗୁରୁବାର ରାଷ୍ଟ୍ରପତି ନିର୍ବାଚନ ଫଳାଫଳ ପ୍ରକାଶ ପାଇବ । ଏହା ପୂର୍ବରୁ ବୁଧବାର ବିରୋଧୀ ଦଳର ମୁଖ୍ୟ ସେଚତକ ମୋହନ ମାଝୀ ଏଭଳି ପ୍ରତିକ୍ରିୟା ରଖିଛନ୍ତି । ଆଉ ଫଳାଫଳ ବାହାରିବା ପରେ ଏହା ଜଣାପଡିବ ବୋଲି ସେ କହିଛନ୍ତି । ଏହାପରେ କିଏ ସେହି କଂଗ୍ରେସ ବିଧାୟକ ସେ ନେଇ ଖୋଳତାଡ ଆରମ୍ଭ ହୋଇଛି । ଏହାରି ଭିତରେ କଂଗ୍ରେସ ବିଧାୟକ ତାରା ବାହିନୀପତି ମଧ୍ୟ ବିଜେପିକୁ ତେରଛା ବାଣ ମାରିଛନ୍ତି । ବିଜେପିର ଦୁଇ ତିନି ବିଧାୟକ ମିଳିତ ବିରୋଧୀ ପ୍ରାର୍ଥୀ ଯଶୋବନ୍ତ ସିହ୍ନାଙ୍କୁ ଭୋଟ୍ ଦେଇଛନ୍ତି ବୋଲି ସେ କହିଛନ୍ତି ।
ତାରା ପ୍ରସାଦ ବାହିନୀପତି କହିଛନ୍ତି, ଗଣତନ୍ତ୍ରର ସୁରକ୍ଷା ପାଇଁ ଯଶୱନ୍ତ ସିହ୍ନା ପ୍ରାର୍ଥୀ ହୋଇଛନ୍ତି । ତାଙ୍କୁ ସମଥର୍ନ କରି ବିଜେପିରୁ ଦୁଇ ତିନି ଜଣ ବିଧାୟକ ଭୋଟ୍ ଦେଇଛନ୍ତି । ଗଣତନ୍ତ୍ରର ସୁରକ୍ଷା ପାଇଁ ବିଜେପି ବିଧାୟକ ଯେଉଁଭଳି ଲୁଚାଛପାରେ ଭୋଟ୍ ଦେଇଛନ୍ତି ତାହା କଂଗ୍ରେସ ବିଧାୟକ କରନ୍ତି ନାହିଁ । କଂଗ୍ରେସ ବିଧାୟକ ଯାହାକୁ ଭୋଟ୍ ଦିଅନ୍ତି ତାହା ସେ ଭୋଟ୍ ଦେବା ପରେ ଖୋଲାଖୋଲି କୁହନ୍ତି । ଗଣତି ପରେ ସବୁ ସତ ସାମ୍ନାକୁ ଆସିବ। କିନ୍ତୁ ତାରା ଏପରି ମନ୍ତବ୍ୟ ମୋହନ ମାଝୀଙ୍କୁ କାଉଣ୍ଟର କରିବାକୁ ଏପରି କହିଲେ ନା ସତରେ ବିଜେପିରୁ ମଧ୍ୟ ‘ମୋକିମ’ ଅଛନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି ।
ଉଲ୍ଲେଖଯାଗ୍ୟ, ସୋମବାର ରାଷ୍ଟ୍ରପତି ନିର୍ବାଚନ ପାଇଁ ଭୋଟ୍ ପଡିଥିଲ।। ଏହି ସମୟରେ କଂଗ୍ରେସ ବିଧାୟକ ମହମ୍ମଦ ମୋକିମ ଦଳର ନିଷ୍ପତ୍ତି ବିରୋଧରେ ଯାଇ ନିଜ ବିବେକ ଅନୁସୋର ଓଡିଆ ଝିଅ ଦ୍ରୌପଦୀ ମୁର୍ମୁଙ୍କୁ ଭୋଟ୍ ଦେଇଥିଲେ ବୋଲି କହିଥିଲେ । ଯଶୱନ୍ତ ସିହ୍ନା କେଂଗ୍ରସ ସମେତ ୧୭ ବିରୋଧୀ ଦଳର ପ୍ରାର୍ଥୀ ରହିଛନ୍ତି । କିନ୍ତୁ ଏହି ନିର୍ବାଚନରେ ଦଳ ହ୍ୱିପ ଜାରି କରିପାରିବ ନାହିଁ। ତେଣୁ ନିର୍ବାଚିତ ପ୍ରତିନିଧି ନିଜ ବିବେକ ଅନୁସାରେ ଭୋଟ୍ ଦିଅନ୍ତି । ଦ୍ରୌପଦୀ ଓଡିଶା ମାଟିର ଝିଅ ତେଣୁ ତାଙ୍କୁ ଭୋଟ୍ ଦେବାକୁ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରେିମା ନବୀନ ପଟ୍ଟନାୟକ ନିବେଦନ କରିଥିଲେ। କିନ୍ତୁ ପିସିସି ସଭାପତି ତଥା କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର କହିଥିଲେ ଦଳର ନିଷ୍ପତ୍ତି ସବର୍ମାନ୍ୟ।
