ଜାତୀୟ ଜୁନିୟର ସନ୍ତରଣ ଚାମ୍ପିୟନଶିପ: କର୍ଣ୍ଣାଟକ ଓଭରାଲ ଚାମ୍ପିୟନ

ଭୁବନେଶ୍ୱର: ସ୍ଥାନୀୟ କଳିଙ୍ଗ ଷ୍ଟାଡିୟମର ବିଜୁ ପଟ୍ଟନାୟକ ସୁଇମିଂ ପୁଲରେ ୪୮ତମ ଜାତୀୟ ଜୁନିୟର ସନ୍ତରଣ ଚାମ୍ପିୟନଶିପ ଅନୁଷ୍ଠିତ ହୋଇଯାଇଛି । କର୍ଣ୍ଣାଟକ ସନ୍ତରଣକାରୀମାନେ ପ୍ରଭାବୀ ପ୍ରଦର୍ଶନ କରି ଚାମ୍ପିୟନ ହୋଇଛନ୍ତି । ଏହି ଚାମ୍ପିୟନଶିପରେ ୨୬ ନୂତନ ରେକର୍ଡ ସ୍ଥାପନ ହୋଇଛି । କର୍ଣ୍ଣାଟକର ହଷିକା ରାମଚନ୍ଦ୍ରନ ୪୦୦ ମିଟର ବାଳିକା ବିଭାଗ ମେଡଲୀରେ ନୂତନ ଜାତୀୟ ରେକର୍ଡ ସ୍ଥାପନ କରିଛନ୍ତି । ସେ ୫:୧୦.୭୦ ସେକେଣ୍ଡ ସମୟ ନେଇ ମହାରାଷ୍ଟ୍ରର ଅପେକ୍ଷା ଫର୍ଣ୍ଣାଣ୍ଡିଜଙ୍କ ୫:୧୩.୮୦ ରେକର୍ଡକୁ ଭଙ୍ଗ କରିଥିଲେ । ଏହି ବିଭାଗରେ ତେଲେଙ୍ଗାନାର ନିଥ୍ୟା ସାଗି ଓ ମହାରାଷ୍ଟ୍ରର ରାଘବି ରାମାନୁଜନ ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ହାସଲ କରିଥିଲେ । ଅପେକ୍ଷା ୨୦୦ ମିଟର ବ୍ରେଷ୍ଟ ଷ୍ଟ୍ରୋକରେ ବାଳିକା ଗ୍ରୁପ ୨ରେ ନୂତନ ଜାତୀୟ ରେକର୍ଡ କରିଛନ୍ତି । ସେ ୨:୪୦.୩୬ ସେକେଣ୍ଡ ସମୟ ନେଇଥିଲେ । ପୂର୍ବରୁ ସାଲୋନୀ ଦଲାଲ(୨:୪୩.୧)ଙ୍କ ନାମରେ ଏହି ରେକର୍ଡ ଥିଲା । ୪୦୦ ମିଟର ବାଳିକା ୧ ମିଡଲେରେ ସାୟନି ଘୋଷ (୫:୧୫.୦୪)ଙ୍କ ରେକର୍ଡକୁ ତାମିଲନାଡୁର ଶକ୍ତି ଏସ (୫.୧୧.୭୭)ଭାଙ୍ଗି ଯାଇଛନ୍ତି । ବାଳକ ବିଭାଗର ଶ୍ରେଷ୍ଠ ସନ୍ତରଣକାରୀ ପୁରସ୍କାର କର୍ଣ୍ଣାଟକର ଉତ୍କର୍ଷ ପାଟିଲ ପାଇଥିବା ବେଳେ ମହାରାଷ୍ଟ୍ରର ଅପେକ୍ଷା ଶ୍ରେଷ୍ଠ ବାଳିକା ସନ୍ତରଣକାରୀ ହୋଇଛନ୍ତି । ୱାଟରପୋଲର ବାଳକ ଓ ବିଭାଗ ବିଭାଗ ଟାଇଟଲ ଯଥାକ୍ରମେ ବେଙ୍ଗଲ ଓ କେରଳ ହାସଲ କରିଛନ୍ତି ।