ଆଜି ଦିଲ୍ଲୀରେ କଂଗ୍ରେସର ପ୍ରତିବାଦ; ୬ଟି ମେଟ୍ରୋ ଷ୍ଟେସନ ବନ୍ଦ

ନୂଆଦିଲ୍ଲୀ: ସୋମବାର ମଧ୍ୟ ରାଜଧାନୀ ଦିଲ୍ଲୀରେ ସାଧାରଣ ଜନତାଙ୍କ ପାଇଁ ଏକ କଷ୍ଟକର ଦିନ ହେବାକୁ ଯାଉଛି। ଦିଲ୍ଲୀ ମେଟ୍ରୋ ରେଳ ନିଗମ (DMRC) ରବିବାର ବିଳମ୍ବିତ ରାତିରେ ଘୋଷଣା କରିଛି ଯେ ସୋମବାର ଦିଲ୍ଲୀର ଛଅଟି ମେଟ୍ରୋ ଷ୍ଟେସନ ବନ୍ଦ ରହିବ।

ସୁରକ୍ଷା କାରଣ ଦର୍ଶାଇ DMRC ଘୋଷଣା କରିଛି ଯେ ଛଅଟି ମେଟ୍ରୋ ଷ୍ଟେସନ ସକାଳ ୬:୦୦ ରୁ ଅପରାହ୍ନ ୪:୦୦ ପର୍ଯ୍ୟନ୍ତ ବନ୍ଦ ରହିବ।

DMRC ଅନୁଯାୟୀ, ସୁରକ୍ଷା କାରଣରୁ ୧୨ ଅକ୍ଟୋବର ୨୦୨୬ ସକାଳ ୬:୦୦ ରୁ ଅପରାହ୍ନ ୪:୦୦ ପର୍ଯ୍ୟନ୍ତ ଛଅଟି ମେଟ୍ରୋ ଷ୍ଟେସନର ପ୍ରବେଶ ଏବଂ ପ୍ରସ୍ଥାନ ପଏଣ୍ଟ ବନ୍ଦ ରହିବ। ତଥାପି ଏହି ଷ୍ଟେସନଗୁଡ଼ିକରେ ଇଣ୍ଟରଚେଞ୍ଜ ସୁବିଧା କାର୍ଯ୍ୟକ୍ଷମ ରହିବ।ତେବେ ଦିଲ୍ଲୀର ପଟେଲ ଚୌକ, ଜନପଥ, ରାଜୀବ ଚୌକ, ମଣ୍ଡି ହାଉସ, କେନ୍ଦ୍ରୀୟ ସଚିବାଳୟ ଏବଂ ବାରଖମ୍ବା ରୋଡ ମେଟ୍ରୋ ଷ୍ଟେସନଗୁଡ଼ିକୁ ଆଜି ବନ୍ଦ କରାଯାଇଛି। CJP ପ୍ରତିବାଦ ଯୋଗୁଁ DMRC ପୂର୍ବରୁ ଅକ୍ଟୋବର ୧୦ରେ ଦିଲ୍ଲୀର ୪୫ଟି ମେଟ୍ରୋ ଷ୍ଟେସନକୁ ବନ୍ଦ କରିଥିଲା।

ଉଲ୍ଲେଖଯୋଗ୍ୟ ଯେ ଅଖିଳ ଭାରତୀୟ ମେଣ୍ଟର ସୁପ୍ରିମକୋର୍ଟ ଅଭିମୁଖେ ପଦଯାତ୍ରାକୁ ଦୃଷ୍ଟିରେ ରଖି DMRC ଏହି ନିଷ୍ପତ୍ତି ନେଇଛି। କଂଗ୍ରେସ ସମେତ ସମସ୍ତ ବିରୋଧୀ ଦଳ ସୋମବାର ସୁପ୍ରିମକୋର୍ଟ ଅଭିମୁଖେ ପଦଯାତ୍ରା କରିବେ। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ “ଭୋଟ ଚୋରି” ଅଭିଯୋଗରେ କାର୍ଯ୍ୟାନୁଷ୍ଠାନ ଦାବି କରିବେ।

ଅପରପକ୍ଷରେ ଦିଲ୍ଲୀରେ ବିରୋଧୀ ଦଳଗୁଡ଼ିକର ସୁପ୍ରିମକୋର୍ଟ ଅଭିମୁଖେ ପଦଯାତ୍ରାକୁ ଦୃଷ୍ଟିରେ ରଖି ଦିଲ୍ଲୀ ଟ୍ରାଫିକ୍ ପୋଲିସ ଏକ ପରାମର୍ଶ ଜାରି କରିଛି। ଯେଉଁଥିରେ କୁହାଯାଇଛି ଯେ ବର୍ତ୍ତମାନର ଆଇନ ଶୃଙ୍ଖଳା ପରିସ୍ଥିତି ଯୋଗୁଁ ସୋମବାର ଦିଲ୍ଲୀର ବିଭିନ୍ନ ସ୍ଥାନରେ ଟ୍ରାଫିକ୍ ବାଧାପ୍ରାପ୍ତ ହେବାର ସମ୍ଭାବନା ରହିଛି। ଦିଲ୍ଲୀ ଟ୍ରାଫିକ୍ ପୋଲିସ ଅନୁଯାୟୀ, ଅନେକ ସ୍ଥାନରେ ଡାଇଭର୍ସନ କାର୍ଯ୍ୟକାରୀ ହୋଇପାରେ। ତେଣୁ ଲୋକମାନଙ୍କୁ ପୂର୍ବରୁ ସେମାନଙ୍କର ଯାତ୍ରା ଯୋଜନା କରିବାକୁ ପରାମର୍ଶ ଦିଆଯାଇଛି।