ଛାତ ଉପରୁ ବର୍ଷିଲା ବିଡ଼ା ବିଡ଼ା ଟଙ୍କା! ଇଡି ଚଢ଼ାଉ ବେଳେ ପଞ୍ଜାବ ମୁଖ୍ୟମନ୍ତ୍ରୀଙ୍କ ଘନିଷ୍ଠ ସହଯୋଗୀଙ୍କ ଘରେ ହାଇଡ୍ରାମା

ମୋହାଲି: ଫିଲ୍ମ ଷ୍ଟାଇଲରେ ଇଡି (ED) ଚଢ଼ାଉ। ଆଉ ଧରାପଡ଼ିବା ଭୟରେ ଛାତ ଉପରୁ ଫିଙ୍ଗାଗଲା ବିଡ଼ା ବିଡ଼ା ଟଙ୍କା। ରାସ୍ତା ଉପରେ ଯେମିତି ଟଙ୍କାର ବର୍ଷା ହେଲା। ପଞ୍ଜାବର ମୋହାଲିରେ ଦେଖିବାକୁ ମିଳିଛି ଏଭଳି ଏକ ହାଇଡ୍ରାମା।

ସୂଚନା ଅନୁସାରେ, ପଞ୍ଜାବ ମୁଖ୍ୟମନ୍ତ୍ରୀଙ୍କ ଜଣେ ଘନିଷ୍ଠ ସହଯୋଗୀଙ୍କ ଘରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଚାନକ ରେଡ୍ କରିଥିଲା। ଇଡି ଅଧିକାରୀମାନେ ଘରେ ପହଞ୍ଚିବା କ୍ଷଣି ଭିତରେ ଥିବା ଲୋକଙ୍କ ହୋସ୍ ଉଡ଼ିଯାଇଥିଲା। କଳାଧନ ଲୁଚାଇବାକୁ ଯାଇ ସେମାନେ ତରବରିଆ ଭାବେ ଏକ ଅଭିନବ ଉପାୟ ଆପଣାଇଥିଲେ।

ସେମାନେ ଘରର ଝରକା ଏବଂ ଛାତ ଉପରୁ ତଳକୁ ବିଡ଼ା ବିଡ଼ା ନୋଟ୍ ଫିଙ୍ଗିବା ଆରମ୍ଭ କରିଦେଇଥିଲେ। ତଳେ ରାସ୍ତାରେ ଯାଉଥିବା ଲୋକେ ଏ ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। କେହି କେହି ନିଜ ମୋବାଇଲରେ ଏହାର ଭିଡିଓ ମଧ୍ୟ ରେକର୍ଡ କରିଥିଲେ, ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅବଶ୍ୟ, ଇଡି ଅଧିକାରୀମାନେ ତୁରନ୍ତ ଆଲର୍ଟ ହୋଇଯାଇଥିଲେ ଏବଂ ତଳକୁ ଯାଇ ସେହି ଫିଙ୍ଗା ଯାଇଥିବା ଟଙ୍କା ସବୁକୁ ଜବତ କରିଥିଲେ।

କୁହାଯାଉଛି ଯେ, ବେଆଇନ ଅର୍ଥ କାରବାର ଏବଂ ଏକ ବଡ଼ ଦୁର୍ନୀତି ମାମଲାରେ ଏହି ଚଢ଼ାଉ କରାଯାଇଛି। କେବଳ ମୋହାଲି ନୁହେଁ, ଏକାସାଙ୍ଗରେ ପଞ୍ଜାବର ଆହୁରି କିଛି ସ୍ଥାନରେ ଇଡିର ଟିମ୍ ଛାନଭିନ୍ ଜାରି ରଖିଛି।

ତେବେ ମୁଖ୍ୟମନ୍ତ୍ରୀଙ୍କ ସହଯୋଗୀଙ୍କ ଘରୁ ଏଭଳି ଭାବେ ବିପୁଳ ପରିମାଣର ନଗଦ ଟଙ୍କା ମିଳିବା ଏବଂ ଟଙ୍କା ଫିଙ୍ଗିବାର ଏହି ହାଇଡ୍ରାମା ଏବେ ପଞ୍ଜାବ ରାଜନୀତିରେ ଉଷ୍ମତା ବଢ଼ାଇ ଦେଇଛି। ବିରୋଧୀ ଦଳ ଏବେ ଏହି ପ୍ରସଙ୍ଗକୁ ଅସ୍ତ୍ର କରି ରାଜ୍ୟ ସରକାରଙ୍କ ଉପରେ ବର୍ଷିବା ଆରମ୍ଭ କରିଦେଲେଣି। ବର୍ତ୍ତମାନ ସୁଦ୍ଧା କେତେ ଟଙ୍କା ଜବତ ହୋଇଛି, ସେ ନେଇ ଇଡି ପକ୍ଷରୁ ସ୍ପଷ୍ଟ ସୂଚନା ଦିଆଯାଇନାହିଁ। ତଦନ୍ତ ଜାରି ରହିଛି।