ନୂଆଦିଲ୍ଲୀ: ଦୀର୍ଘ ୭ ବର୍ଷ ଅପେକ୍ଷାର ଅନ୍ତ ଘଟିଛି । ବିର୍ସା ମୁଣ୍ଡା ହକି ଷ୍ଟାଡିୟମ ରାଉରକେଲା ଓ ରାଞ୍ଚିରେ ଆରମ୍ଭ ହୋଇଯାଇଛି ହକି ଇଣ୍ଡିଆ ଲିଗ୍ ୨୦୨୪-୨୫। ତେବେ ଉଭୟ ପୁରୁଷ ଓ ମହିଳା ହକି ଇଣ୍ଡିଆ ଲିଗରେ ମୋଟ ପୁରସ୍କାର ରାଶି ୧୦କୋଟି ବୋଲି ହକି ଇଣ୍ଡିଆ ସଭାପତି ପଦ୍ମଶ୍ରୀ ଡକ୍ଟର ଦିଲୀପ ତିର୍କୀ କହିଛନ୍ତି ।
ପୁରୁଷ ବିଜେତାଙ୍କୁ ୩କୋଟି, ଉପବିଜେତାଙ୍କୁ ୨କୋଟି, ତୃତୀୟ ସ୍ଥାନ ଅଧିକାର କରିଥିବା ଦଳକୁ ୧କୋଟି ଟଙ୍କାର ପୁରସ୍କାର ରାଶି ପ୍ରଦାନ କରାଯିବ । ସେହିପରି ପ୍ରଥମ ଥର ମହିଳା ଲିଗ୍ ଖେଳାଯିବ । ମହିଳା ବିଜେତାଙ୍କୁ ୧.୫କୋଟି, ଉପ ବିଜେତାଙ୍କୁ ୧କୋଟି ଓ ୩ୟ ସ୍ଥାନ ଅଧିକାର କରିଥିବା ଦଳକୁ ୫୦ଲକ୍ଷ ଟଙ୍କା ଦିଆଯିବ ।
ସେହିପରି ପ୍ରତ୍ୟେକ ମ୍ୟାଚର ଶ୍ରେଷ୍ଠ ଖେଳାଳିଙ୍କୁ ୫୦ହଜାର, ପ୍ରତିଯୋଗିତାର ଶ୍ରେଷ୍ଠ ଖେଳାଳିଙ୍କୁ ୨୦ଲକ୍ଷ ଟଙ୍କା ଦିଆଯିବ । ଏହାଛଡା ପୁରୁଷ ବର୍ଗର ଶ୍ରେଷ୍ଠ ଗୋଲରକ୍ଷକ, ଟପସ୍କୋରର, ଉଦୀୟମାନ ଖେଳାଳିଙ୍କୁ ୧୦ଲକ୍ଷ ଓ ମହିଳାବର୍ଗରେ ୫ଲକ୍ଷ ଟଙ୍କାର ପୁରସ୍କାର ରାଶି ପ୍ରଦାନ କରାଯିବ ।
ଶେଷଥର ପାଇଁ ୨୦୧୭ର ଖେଳାଯାଇଥିବା ପୁରୁଷ ହକି ଲିଗ୍ ରେ ପୁରସ୍କାର ରାଶି ୬କୋଟି ରଖାଯାଇଥିଲା ।