ଲାସ୍ଭେଗାସ୍: ମଲ ହେଉ କି ହୋଟେଲ ବା ଛୋଟବଡ଼ ଦୋକାନ ସମସ୍ତେ ବିଭିନ୍ନ ଅଫର ଦେଇଥାନ୍ତି । ସେଥିଲାଗି ସେଠାରେ ଲୋକଙ୍କ ଭିଡ଼ ଜମିଥାଏ । ଏହାକୁ ଦୃଷ୍ଟିରେ ରଖି ବିଭିନ୍ନ ମଲ ବା ହୋଟେଲ ବର୍ଷ ସାରା ଅଫର ରଖିଥାନ୍ତି । କିନ୍ତୁ ଏମିତି ଏକ ହୋଟେଲ ଅଛି, ଯେଉଁଠି ଅଜବ ଅଫର ରହିଛି । ଅଫରଟି ହେଲା ଯଦି ଆପଣଙ୍କ ଓଜନ ୧୫୮ କେଜି ବା ତାଠାରୁ ଅଧିକ ଥିବ ତାହାହେଲେ ଆପଣଙ୍କୁ ମାଗଣାରେ ଖାଦ୍ୟ ଯୋଗାଇ ଦିଆଯିବ ।
ଲାସ୍ ଭେଗାସ୍ସ୍ଥିତ ଏକ ରେଷ୍ଟୁରାଣ୍ଟ ଏବେ ଚର୍ଚ୍ଚାରେ ଅଛି । ଏହି ରେଷ୍ଟୁରାଣ୍ଟର ନାଁ ହେଉଛି ହାର୍ଟ ଆଟାକ୍ ଗ୍ରିଲ୍ । ଏହି ରେଷ୍ଟୁରାଣ୍ଟ ଅଜବ ଅଫର ତଥା ଥିମ୍, ମେନୁ ଓ ଏହାର ସେବା ପାଇଁ ଖୁବ୍ ଚର୍ଚ୍ଚାରେ । ଏଠାରେ ଥିବା ମେନୁ ଅତ୍ୟନ୍ତ ଅସ୍ୱାସ୍ଥ୍ୟକର ବୋଲି ବିବେଚନା କରାଯାଏ । ଏଠାରେ ପ୍ରତ୍ୟେକ ଆଇଟମ୍ର ଆକାର ବହୁତ ବଡ ଏବଂ କ୍ୟାଲୋରୀ ଯୁକ୍ତ । ଖାସ୍ କଥା ହେଲା, ଏହି ରେଷ୍ଟୁରାଣ୍ଟକୁ ଆସୁଥିବା ଗ୍ରାହକଙ୍କୁ ରୋଗୀ କୁହାଯାଏ । ଏଠାରେ ୱେଟରମାନେ ଅର୍ଡର ନେବା ପାଇଁ ନର୍ସ ପରି ଗେଟଅପ୍ରେ ଆସନ୍ତି ଓ ଯେଉଁ ଅର୍ଡ଼ର ନିଅନ୍ତି ତାହା ଏକ ପ୍ରେସକ୍ରିପସନ୍ ଭାବରେ ବିବେଚନା କରାଯାଏ । ଏବେ ଏହି ରେଷ୍ଟୁରାଣ୍ଟର ମେନୁ କାର୍ଡ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଏହି ରେଷ୍ଟୁରାଣ୍ଟର ମେନୁର ତାଲିକା ବହୁତ ଲମ୍ବା । ଏଥିରେ ବହୁ ଚର୍ବିଯୁକ୍ତ ଖାଦ୍ୟ ରହିଛି । ଏଠାରେ ମିଳୁଥିବା ବର୍ଗର ଆକାର ମଧ୍ୟ ବହୁତ ବଡ । କେହି କେହି ଏହାକୁ ସିଙ୍ଗଲ୍ ବାଇପାସ୍ ବର୍ଗର୍ ଏବଂ କେହି କେହି ଏହାକୁ ଅକ୍ଟୋପ୍ଲେ ବାଇପାସ୍ ବର୍ଗର ବୋଲି କୁହନ୍ତି । ଅନେକ ପ୍ରକାରର ହଟ୍ ଡ଼ଗ୍, ମଦ୍ୟପାନ, କୌଣସି ଫିଲ୍ଟର ସିଗାରେଟ୍ ମଧ୍ୟ ଏଠାରେ ଯୋଗାଇ ଦିଆଯାଏ । ଏଠାରେ ମିଳୁଥିବା ଖାଦ୍ୟ ଖାଇବା ପରେ ଯାହା ହୃଦଘାତର ଆଶଙ୍କା ବଢିଥାଏ, ଆପଣ ଏହାକୁ ଏହି ରେଷ୍ଟୁରାଣ୍ଟରେ ପାଇବେ ।
ଏହି ରେଷ୍ଟୁରାଣ୍ଟ ଲୋକମାନଙ୍କୁ ଏକ ବିଶେଷ ଅଫର ମଧ୍ୟ ଦେଇଛି । ଯେଉଁମାନଙ୍କର ଓଜନ ୧୫୮ କିଲୋଗ୍ରାମରୁ ଅଧିକ, ସେମାନେ ଏଠାରେ ମାଗଣା ଖାଦ୍ୟ ଖାଇପାରିବେ । ତାହା ମଧ୍ୟ ଅସୀମିତ । ସୋସିଆଲ ମିଡିଆରେ ଏହାର ସ୍ୱତନ୍ତ୍ରତା ଯୋଗୁଁ ଏହା ଲୋକଙ୍କ ଦୃଷ୍ଟି ଆକର୍ଷଣ କରିଛି । ତେବେ ଏହାକୁ ତୁରନ୍ତ ବନ୍ଦ କରିବାକୁ ଅନେକ ମତ ରଖିଥିବା ବେଳେ ଏହିପରି ଅସ୍ୱାସ୍ଥ୍ୟକର ଜିନିଷକୁ ପ୍ରୋତ୍ସାହିତ କରାଯିବା ଉଚିତ୍ ନୁହେଁ ବୋଲି କହିଛନ୍ତି ।
ଏହି ରେଷ୍ଟୁରାଣ୍ଟ ୨୦୦୫ ମସିହାରେ ଜନ୍ ବସୋ ନାମକ ଜଣେ ବ୍ୟକ୍ତି ଆରମ୍ଭ କରିଥିଲେ । ଉଦ୍ଦେଶ୍ୟ ଥିଲା ଲୋକଙ୍କୁ ଅସ୍ୱାସ୍ଥ୍ୟକର ଖାଦ୍ୟରୁ ଦୂରେଇ ରଖିବା । କିନ୍ତୁ ବାସ୍ତବତା ଜାଣିବା ପରେ ମଧ୍ୟ ଲୋକମାନେଏଠାକୁ ଆସିବା ବନ୍ଦ କରନ୍ତି ନାହିଁ ।
