ଭୁବନେଶ୍ୱର: ଟ୍ରେନ ଧକ୍କାରେ ଆଉ ମରିବେନି ହାତୀ । ହାତୀ ମୃତ୍ୟୁକୁ ଏଡାଇବା ପାଇଁ ପଦକ୍ଷେପ ନେଇଛି ପୂର୍ବତଟ ରେଳପଥ । ହାତୀ ଅନୁପ୍ରବେଶ ପଥ ଚିହ୍ନଟ ପାଇଁ ରେଳଧାରଣାର ଆଇଡିଏସ ବା ଇଣ୍ଟ୍ରୁଜନ ଡିଟେକ୍ସନ ସିଷ୍ଟମ । ଟ୍ରେନ ଧକ୍କାରେ ହାତୀ ମୃତ୍ୟୁ ଏକ ଚିନ୍ତାଜନକ ସମସ୍ୟା ହୋଇଥିବାବେଳେ ଏହାକୁ ଏଡ଼ାଇବାପାଇଁ ପୂର୍ବତଟ ରେଳପଥ ପ୍ରଥମ ପର୍ଯ୍ୟାୟରେ ଛଅଟି ରେଳ ସେକ୍ସନର ପ୍ରାୟ 200 କିଲୋମିଟର ଦୈର୍ଘ୍ୟ ରେଳଧାରଣରେ ଇଣ୍ଟ୍ରୁଜନ୍ ଡିଟେକସନ୍ ସିଷ୍ଟମ୍ (IDS) ସ୍ଥାପନ କରିବ ।
ଏହି ପ୍ରକଳ୍ପ ପାଇଁ ୭୯.୧୨ କୋଟି ଟଙ୍କା ମଞ୍ଜୁର କରିଛି ପୂର୍ବତନଟ ରେଳପଥ । ଏହି ଆଇଡିଏସ ବା ଅନୁପ୍ରବେଶ ଚିହ୍ନଟ ପ୍ରଣାଳୀ ରେଳ ଟ୍ରାକ୍ ନିକଟକୁ ଆସୁଥିବା ବଣୁଆ ହାତୀକୁ ଚିହ୍ନଟ କରିବାରେ ସାହାଯ୍ୟ କରିବ ଏବଂ ହାତୀ ମୃତ୍ୟୁକୁ ରୋକିବାରେ ରେଳ ଅଧିକାରୀଙ୍କୁ ସତର୍କ କରିବ ।ଲେଜର ସେନ୍ସିଂ କୌଶଳ ଉପରେ ଆଧାରିତ ଆଇଡିଏସ ଟ୍ରାକ ନିକଟରେ ହାତୀର ଉପସ୍ଥିତିକୁ ଚିହ୍ନଟ କରାଇବ । ଟ୍ରାକରେ ହାତୀମାନଙ୍କର ପ୍ରକୃତ ସମୟର ଉପସ୍ଥିତି ଅନୁଭବ କରିବା ପାଇଁ ଏହା ଏକ ଫାଇବର ଅପ୍ଟିକ୍-ଆଧାରିତ ଆକାଶବାଣୀ ପ୍ରଣାଳୀ ବ୍ୟବହାର କରାଯାଇଛି । ହାତୀର ଉପସ୍ଥିତି ଚିହ୍ନଟ କରିବା ସହିତ ସଠିକ ସମୟରେ ସାଙ୍କେତିକ ମାଧ୍ୟମରେ ରେଳ ବିଭାଗ ସହ ଯୋଗାଯୋଗ କରିବ । ଫଳରେ ଟ୍ରେନର ଗତିକୁ ହ୍ରାସ କରାଯାଇ ପାରିବ । ଏହି ଆଇଡିଏସ ଖୋର୍ଦ୍ଧା ରୋଡ୍ ଏବଂ ସମ୍ବଲପୁର ରେଳ ମଣ୍ଡଳ ପରିସୀମା ମଧ୍ୟରେ ଲାଗିବ ।
ପ୍ରଥମ ପର୍ଯ୍ୟାୟରେ ସମ୍ବଲପୁର ଏବଂ ଖୋର୍ଦ୍ଧା ରୋଡ୍ ରେଳମଣ୍ଡଳ ଅଧୀନରେ ଛଅଟି ରେଳ ସେକ୍ସନର ପ୍ରାୟ 200 କିଲୋମିଟର ରେଳଧାରଣା କଡରେ ଏହି ପ୍ରଣାଳୀ କାର୍ଯ୍ୟକାରୀ କରାଇବାପାଇଁ ପଦକ୍ଷେପ ନିଆଯାଉଅଛି । ଏହି ରେଳ ସେକ୍ସନ ଗୁଡ଼ିକ ହେଉଛି ମାନେଶ୍ଵର-ବାମୁର, ତୁରେଇକେଲା-ଲଖନା, ଅରାଣ୍ଡ-ଅରଙ୍ଗ ମହାନାଦୀ ଓ ନର୍ଲା-ଥେରୁବାଲି ସମ୍ବଲପୁର ରେଳମଣ୍ଡଳରେ ଏବଂ ଖୋର୍ଦ୍ଧା ରୋଡ ରେଳ ମଣ୍ଡଳ ଅନ୍ତର୍ଗତ କପିଳାସ ରୋଡ-ରାଜ ଆଠଗଡ଼-ଅନୁଗୁଳ, ରମ୍ଭା-ଗଞ୍ଜାମ ଏବଂ ନୟାଗଡ଼-ପର୍ଜନପୁର ରେଳ ସେକ୍ସନ ।
ଏହି ଆଇଡିଏସ ବା ଅନୁପ୍ରବେଶ ଚିହ୍ନଟ ପ୍ରଣାଳୀ ୬୦ କିଲୋମିଟର ପର୍ଯ୍ୟନ୍ତ ଅସାଧାରଣ ଗତିବିଧି ଉପରେ ନଜର ରଖିପାରେ | ରେଳ ଧାରଣା ଭାଙ୍ଗିଯିବା, ରେଳ ଟ୍ରାକ୍ ଉପରେ ଅବରୋଧ ବା ବେଆଇନ ଚଳପ୍ରଚଳ କରିବା କିମ୍ବା ରେଳ ଟ୍ରାକ୍ ନିକଟରେ ଅନଧିକୃତ ଖନନ, ଟ୍ରାକ ନିକଟରେ ଭୂସ୍ଖଳନ ଇତ୍ୟାଦି ଚିହ୍ନଟ କରିବାରେ ମଧ୍ୟ ଏହି ଆଇଡିଏସ ସାହାଯ୍ୟ କରିବ |