ନୂଆଦିଲ୍ଲୀ: ଭାରତୀୟ କ୍ରିକେଟର ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲି ନିଜ କ୍ୟାରିୟରକୁ ନେଇ ଏକ ବଡ଼ ଘୋଷଣା କରିଛନ୍ତି । ସେ ସ୍ପଷ୍ଟ କରିଛନ୍ତି ଯେ ୨୦୨୭ରେ ଦକ୍ଷିଣ ଆଫ୍ରିକା, ଜିମ୍ବାବୱେ ଏବଂ ନାମିବିଆର ମିଳିତ ଆୟୋଜନରେ ହେବାକୁ ଥିବା ଦିନିକିଆ ୱାର୍ଲ୍ଡ କପ୍ ହିଁ ଭାରତ ପାଇଁ ତାଙ୍କର ଶେଷ ୱାର୍ଲ୍ଡ କପ୍ ହେବ । ସେ କହିଛନ୍ତି, ଭାରତ ପାଇଁ ଏହା ମୋର ଶେଷ ୱାର୍ଲ୍ଡ କପ୍ ହେବ ଏବଂ ଟ୍ରଫି ଜିତିବା ହିଁ ମୋର ମୁଖ୍ୟ ଲକ୍ଷ୍ୟ । ଏହି ସ୍ୱପ୍ନ ପୂରଣ କରିବା ପାଇଁ ମୁଁ ପଡ଼ିଆରେ ନିଜର ୧୦୦% ଦେବାକୁ ଏବଂ ଯାହା ବି ଆବଶ୍ୟକ ତାହା କରିବାକୁ ପ୍ରସ୍ତୁତ । ୩୭ ବର୍ଷୀୟ କୋହଲି ୨୦୨୪ରେ ଟି୨୦ ଇଣ୍ଟରନ୍ୟାସନାଲ୍ ଏବଂ ୨୦୨୫ରେ ଟେଷ୍ଟ କ୍ରିକେଟରୁ ଅବସର ନେବା ପରେ ଏବେ କେବଳ ଦିନିକିଆ ଫର୍ମାଟ୍ରେ ସକ୍ରିୟ ଅଛନ୍ତି । ସେ ଏପର୍ୟ୍ୟନ୍ତ ୪ଟି ଦିନିକିଆ ୱାର୍ଲ୍ଡ କପ୍ (୨୦୧୧, ୨୦୧୫, ୨୦୧୯, ୨୦୨୩) ଖେଳିସାରିଛନ୍ତି । ଦିନିକିଆ କ୍ରିକେଟରେ ତାଙ୍କ ନାମରେ ବିଶ୍ୱ ରେକର୍ଡସୃଷ୍ଟିକାରୀ ୫୪ଟି ଶତକ ରହିଛି ।
ଦିନିକିଆ କ୍ରିକେଟର ଶାରୀରିକ ଓ ମାନସିକ ଚାପ ବିଷୟରେ ଆଲୋଚନା କରି କୋହଲି କହିଛନ୍ତି ଯେ, ୫୦ ଓଭରର ଗୋଟିଏ ମ୍ୟାଚ୍ ଖେଳିବା ପାଖାପାଖି ଅଢ଼େଇ ଟି-୨୦ ମ୍ୟାଚ୍ ଖେଳିବା ସହ ସମାନ । ବିଦେଶୀ ପରିସ୍ଥିତି ଏବଂ କ୍ରମାଗତ ଗସ୍ତ ମଧ୍ୟରେ ସମ୍ପୂର୍ଣ୍ଣ ଟୁର୍ନାମେଣ୍ଟରେ ନିଜର ଫର୍ମ ଓ ଶାରୀରିକ ସକ୍ଷମତା ବଜାୟ ରଖିବା ସବୁଠାରୁ ବଡ଼ ଚ୍ୟାଲେଞ୍ଜ । ୨୦୧୧ରେ ଏମ୍.ଏସ୍. ଧୋନିଙ୍କ ଅଧିନାୟକତ୍ୱରେ ୱାର୍ଲ୍ଡ କପ୍ ଜିତିଥିବା ଭାରତୀୟ ଟିମ୍ର ସେ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ । ୱାର୍ଲ୍ଡ କପ୍ର ୩୭ଟି ମ୍ୟାଚ୍ରୁ ୫୯.୮୩ ହାରରେ ସେ ମୋଟ ୧,୭୯୫ ରନ୍ ସଂଗ୍ରହ କରିଛନ୍ତି । ୱାର୍ଲ୍ଡ କପ୍ରେ ତାଙ୍କ ନାମରେ ୫ଟି ଶତକ ଏବଂ ୧୨ଟି ଅର୍ଦ୍ଧଶତକ ରହିଛି । ପୂର୍ବତନ ଅଧିନାୟକ ରୋହିତ ଶର୍ମା ମଧ୍ୟ କେବଳ ଦିନିକିଆ ଖେଳୁଥିବା ବେଳେ କହିଛନ୍ତି ଯେ, ଯେପର୍ୟ୍ୟନ୍ତ ମୁଁ ଖେଳୁଛି, ମୋ ଆଗରେ ନୂଆ ଲକ୍ଷ୍ୟ ରହିବ । ମୋର କାମ ଶେଷ ହୋଇଯାଇଛି ବୋଲି ଭାବନା ମୋ ମନକୁ କେବେ ଆସିବ ନାହିଁ । ପ୍ରଥମ ଦିନିକିଆ ପୂର୍ବରୁ ତିରୁବନନ୍ତପୁରମ୍ର ଗ୍ରୀନଫିଲ୍ଡ ଷ୍ଟାଡିୟମରେ ଭାରତୀୟ ଟିମ୍ର ନେଟ୍ ପ୍ରାକ୍ଟିସ୍ ଚାଲିଛି । ରୋହିତ ଓ ବିରାଟଙ୍କୁ ଦେଖିବା ପାଇଁ ଷ୍ଟାଡିୟମରେ ପ୍ରଶଂସକଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି ।
