ନୂଆଦିଲ୍ଲୀ: କଂଗ୍ରେସ ନେତା ଜୟରାମ ରମେଶ ବିଜେପି ଅଧ୍ୟକ୍ଷ ଜଗତ ପ୍ରକାଶ ନଡ୍ଡାଙ୍କୁ ଚିଠି ଲେଖି କ୍ଷମା ମାଗିବାକୁ କହିଛନ୍ତି । ଜୟରାମ ଚିଠିରେ କାରଣ ବତାଇଛନ୍ତି ଯେ, ବିଜେପିର କିଛି ନେତା ରାହୁଲ ଗାନ୍ଧୀଙ୍କ ଏକ ପ୍ରତିକ୍ରିୟାରେ କାଟଛାଟ୍ କରି ସୋସିଆଲ ମିଡିଆରେ ସେୟାର କରିଛନ୍ତି ।
ରାହୁଲ ଗାନ୍ଧୀଙ୍କ ୱାଏନାଡ ଅଫିସ ଉପରକୁ ହୋଇଥିବା ଆକ୍ରମଣ ପାଇଁ ପୂର୍ବତନ କଂଗ୍ରେସ ଅଧ୍ୟକ୍ଷ ଦେଇଥିବା ମନ୍ତବ୍ୟକୁ ମନ୍ଦ ଉଦ୍ଦେଶ୍ୟ ରହିତ କାଟଛାଟ୍ କରି ସେୟାର କରାଯାଇଛି । ଏହାକୁ ଉଦୟପୁର ହତ୍ୟା ଘଟଣା ସହ ଯୋଡ଼ି ଏହି ମନ୍ତବ୍ୟ ଦିଆଯାଇଛି ବୋଲି ବିଜେପିର କିଛି ସାଂସଦ ଏବଂ ବିଧାୟକ ସୋସିଆଲ ମିଡିଆରେ ସେୟାର କରିଛନ୍ତି ।
ବିଜେପି ସାଂସଦ ରାଜ୍ୟବର୍ଦ୍ଧନ ସିଂ ରାଠୋର, ସୁବ୍ରତ ପାଠକ, କମଲେଶ ସୈନି ଏବଂ କିଛି ବିଧାୟକ ସୋସିଆଲ ମିଡିଆରେ ରାହୁଲଙ୍କ ମତାମତ ସେୟାରକୁ କାଟଛାଟ୍ କରି ସେୟାର କରିଛନ୍ତି ।
उदयपुर हो या वायनाड़, जेएनयू में ‘अफजल हम शर्मिंदा हैं’ और ‘भारत तेरे टुकड़े होंगे’ गैंग के साथ खड़ी रहने वाली कांग्रेस का चरित्र वही रहता है।
जेहादी आतंक की विषबेल का बीज किसने बोया, किसने सींचा, खुद सोचिए। pic.twitter.com/cBFErZZPyb
— RajyavardhanRathore (@Ra_THORe) July 2, 2022
କଂଗ୍ରେସ ଦଳ ଦ୍ୱାରା ଏହି ବିଷୟ ସତର୍କ କରାଯାଇଥିଲେ ବି ସେମାନେ ଉଦ୍ଦେଶ୍ୟମୂଳକ ଭାବେ ଏହି ଭିଡିଓ ସେୟାର କରିଛନ୍ତି । କଂଗ୍ରେସ ନେତା ଏବଂ ଦଳକୁ ବଦନାମ କରିବାକୁ ଏହି ଷଡ଼ଯନ୍ତ୍ର କରାଯାଉଛି ବୋଲି ଜୟରାମ ରମେଶ ଚିଠିରେ ଲେଖିଛନ୍ତି ।
ଏଥିପାଇଁ ସେ ଜେପି ନଡ୍ଡାଙ୍କୁ କ୍ଷମା ମାଗିବାକୁ କହିଛନ୍ତି । ଯଦି ସେ କ୍ଷମା ନ ମାଗନ୍ତି ତେବେ ତାଙ୍କ ଦଳ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜୟରାମ ଚିଠିରେ ଚେତାଇ ଦେଇଛନ୍ତି । ଏହି ବିଷୟକୁ ଖବର ଭାବେ ପ୍ରସାରଣ କରିଥିବା ଚ୍ୟାନେଲ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଆବେଦନ କରାଯାଇଛି ବୋଲି କଂଗ୍ରେସ କହିଛି ।
କଂଗ୍ରେସ ଦଳକୁ ବଦନାମ କରିବା ହେଉଛି ବିଜେପିର ଉଦ୍ଦେଶ୍ୟ । ଏଭଳି ମନ୍ଦ ଉଦ୍ଦେଶ୍ୟ ରଖି ଭିଡିଓ ସେୟାର କରିବା ବର୍ତ୍ତମାନର ହିଂସାତ୍ମକ ପରିସ୍ଥିତିକୁ ବିଗାଡ଼ି ଦେଇପାରେ ବୋଲି ଜୟରାମ ଚିଠିରେ ଉଲ୍ଲେଖ କରିଛନ୍ତି । ସେ ନଡ୍ଡାଙ୍କୁ ଆହ୍ୱାନ କରିଛନ୍ତି ଯେ, ବିଜେପି ଏବଂ ଏହାର ନେତା ମାନେ ଏଭଳି କାର୍ଯ୍ୟରୁ ବିରତ ରୁହନ୍ତି । ନଚେତ୍ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବାକୁ ପଡ଼ିବ ।