ଶ୍ରୀନଗର: ଜମ୍ମୁ କାଶ୍ମୀରର ଶ୍ରୀନଗରରେ ଆତଙ୍କ ଯୋଜନା ପଣ୍ଡ। ଶନିବାର ଜଣେ ହାଇବ୍ରିଡ ଆତଙ୍କବାଦୀକୁ ଗିରଫ କରିବାରେ ସଫଳ ହେଲା କାଶ୍ମୀର ପୋଲିସ। ପୋଲିସ ସୂଚନା ମୁତାବକ ସହରର ବଟମାଲୁ ଅଞ୍ଚଳରୁ ନିଷିଦ୍ଧ ସଂଗଠନ ଅଲ-ବଦ୍ର ସହ ଜଡିତ ଜଣେ ଆତଙ୍କବାଦୀକୁ ଗିରଫ କରାଯାଇଛି।
ଗିରଫ ଆତଙ୍କବାଦୀ ଜଣଙ୍କ ପୁଲୱାମାର ରାଜପୁରା ନିବାସୀ ଅର୍ଫତ ୟୁସୁଫ ବୋଲି ଜଣାପଡିଛି। ପୋଲିସ ଅର୍ଫତ ନିକଟରୁ ପିସ୍ତଲ, ୨୦ ରାଉଣ୍ଡ ଜୀବନ୍ତ ଗୁଳି ଏବଂ ୨ ପତ୍ରିକା ସମେତ ଅସ୍ତ୍ରଶସ୍ତ୍ର, ଗୁଳିଗୋଳା ଏବଂ ଆପତ୍ତିଜନକ ସାମଗ୍ରୀ ଜବତ କରିଛି। ପୋଲିସ ଏକ ବିବୃତ୍ତି ଜାରି କରି କହିଛି ଯେ ଗୁଇନ୍ଦା ତଥ୍ୟ ଆଧାରରେ ପୋଲିସ ଟିମ୍ ଅର୍ଫତ ୟୁସୁଫକୁ ଗିରଫ କରିଛି।
ପ୍ରାଥମିକ ତଦନ୍ତରୁ ଜଣାପଡିଛି ଯେ ୟୁସୁଫ ଦକ୍ଷିଣ କାଶ୍ମୀର ପରିସରରେ ଆତଙ୍କବାଦୀ କାର୍ଯ୍ୟକଳାପରେ ଜଡିତ ଥିଲା ଏବଂ ଶ୍ରୀନଗରକୁ ଆତଙ୍କ ଖେଳାଇବା ଉଦ୍ଦେଶ୍ୟରେ ଆସିଥିଲେ। ପୋଲିସ ତାର ଗତିବିଧି ଉପରେ ନଜର ରଖିଥିଲା ଏବଂ କୌଣସି ବଡ଼ ଘଟଣା ଘଟିବା ପୂର୍ବରୁ ତାକୁ ଗିରଫ କରିବାରେ ସଫଳ ହେଲା। ଆତଙ୍କବାଦୀ ବିରୋଧରେ ୟୁଏପିଏ ସମେତ ବିଭିନ୍ନ ବିଭାଗ ଅଧୀନରେ ଏକ ମାମଲା ରୁଜୁ ହୋଇ ଅଧିକ ତଦନ୍ତ ଚଳାଇଛି ପୋଲିସ।
ପୋଲିସ ଏକ ବିବୃତ୍ତିରେ କହିଛି ଯେ ଗିରଫ ହୋଇଥିବା ଆତଙ୍କବାଦୀ ସୁରକ୍ଷା ବାହିନୀର ଗାଡି ଉପରେ ଦୁଇଥର ଗ୍ରେନେଡ ଫିଙ୍ଗିବାରେ ସମ୍ପୃକ୍ତ ଥିଲା। ପ୍ରଥମେ ରାଜପୋରାର ସିଆରପିଏଫ୍ ଗାଡିରେ ଏବଂ ପରେ ପୁଲୱାମାର ଥିବା ସିଆରପିଏଫ / ଆର୍ଆର୍ କ୍ୟାମ୍ପରେ ଗ୍ରେନେଡ ପିଙ୍ଗିଥିଲା। ଚଳିତ ବର୍ଷ ମାର୍ଚ୍ଚରେ ଆତଙ୍କବାଦୀଙ୍କ ସହ ଜଡିତ ପୋଷ୍ଟର ଲଗାଇବାରେ ୟୁସୁଫ ମଧ୍ୟ ଜଡିତ ଥିଲା ଏବଂ ଯୁସୁଫ ବିରୋଧରେ ଅନେକ ଆତଙ୍କବାଦୀ ଅପରାଧ ମାମଲା ରୁଜୁ ହୋଇସାରିଛି।