ଜହ୍ନରାତି
ଶ୍ରୁତିଶିଖା ମହାପାତ୍ର
ଜହ୍ନ ଆସିବାର ଖବର
କେମିତି କେଜାଣି
ମୋ ପାଖରେ ପହଂଚିଯାଏ
ରାତିର ଆଡମ୍ବର ସହିତ
ଗୋଲ ଜହ୍ନ ଆସେ,
ମୁଁ ନିରବରେ
ମୋ ଆସ୍ଥାନ ଖୋଜିଲାବେଳେ
ଓଃ…
ମୋ ଚାରିପଟେ
କେତେ କୋଳାହଳ,
ଜହ୍ନରାତିକୁ ଦେଖି
ଛାତିକୁ ଓହ୍ଲାଇ ଆଣେ
ସାଇତିଥିବା ସ୍ୱପ୍ନସବୁକୁ
ଜହ୍ନରାତି ଏମିତି ବି ଆସେ
ବେଳେବେଳେ,
ଯେଉଁଠି କବିଟି
ତାର ପ୍ରେମକୁ
ଅଦେଖା କୋଣାର୍କର
ନାଁ ଦେଇପାରେ
ମୋର ସ୍ୱପ୍ନସବୁରେ,
ସଫେଦ୍ ଜହ୍ନରାତି
ତା ଆଖିରେ ମୁଁ
ଏମିତି ଅନେକ ରାତି
ଏବେ ବି ବାକି ଅଛି,
ଜହ୍ନରାତିରେ ବିତିଥିବା
ମୁହୂର୍ତ୍ତସବୁକୁ ନିଜର କରି
ମୁଁ ତୁମକୁ ନେଇଯିବି
ଅନ୍ଧାରର ଶେଷସୀମା ଆଡକୁ
ଯେଉଁଠି ପୁଣି
ଏକ ସ୍ୱପ୍ନିଳ ଜହ୍ନରାତି
ଆମ ଅପେକ୍ଷାରେ…
