କାନପୁର : କାନପୁରରେ ଦଙ୍ଗକାରୀଙ୍କ ବିରୋଧରେ କଡା ପଦକ୍ଷେପ ନେଇଛନ୍ତି ଏଠିକାର ରାଜ୍ୟ ସରକାର । ଜୁନ୍ ୩ ରେ ଜୁମା ପ୍ରାର୍ଥନା ପରେ ଘଟିଥିବା ହିଂସା ଘଟଣାରେ ସରକାରଙ୍କ କଠୋର ଆଦେଶ ପରେ ଉତ୍ତରପ୍ରଦେଶରେ ପୋଲିସ ଏବଂ ଜିଲ୍ଲା ପ୍ରଶାସନ ଦୁର୍ବୃତ୍ତଙ୍କ ବିରୋଧରେ ନିରନ୍ତର କାର୍ୟ୍ୟାନୁଷ୍ଠାନ ଗ୍ରହଣ କରୁଛନ୍ତି । ସମାନ ପର୍ୟ୍ୟାୟରେ, ଏକ ମିଳିତ ଦଳ ଗଠନ କରି କମିଶନରେଟ୍ ପୋଲିସ ସହଯୋଗରେ ଜିଲ୍ଲା ପ୍ରଶାସନ ଦ୍ୱାରା ଦୁର୍ବୃତ୍ତଙ୍କ ଏକ ତାଲିକା ପ୍ରସ୍ତୁତ କରାଯାଉଥିବା ଜଣାଯାଇଛି। ଏହି ତାଲିକା ପ୍ରସ୍ତୁତ କରିବା ପଛରେ ଉଦ୍ଦେଶ୍ୟ ହେଉଛି ଏହି ସମସ୍ତ ଦୁର୍ବୃତ୍ତଙ୍କୁ ପ୍ରଦାନ କରାଯାଉଥିବା ସରକାରୀ ସେବା ବନ୍ଦ କରିଦେବା ।
ପ୍ରଶାସନିକ ଅଧିକାରୀମାନେ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଯେ ତାଲିକା ପ୍ରସ୍ତୁତ କରିବା ପଛରେ ଉଦ୍ଦେଶ୍ୟ ସ୍ପଷ୍ଟ ହୋଇଛି ଯେ ଚିହ୍ନଟ ହୋଇଥିବା ସମସ୍ତ ଦଙ୍ଗାକାରୀ ସରକାରଙ୍କ ଦ୍ୱାରା ପ୍ରଦାନ କରାଯାଇଥିବା ମାଗଣା ରାସନ ସେବାରୁ ବଞ୍ଚିତ ହେବେ।
ଅଧିକାରୀଙ୍କ କହିବା ଅନୁସାରେ, ବର୍ତ୍ତମାନ ପାଇଁ ଏହି ତାଲିକା ପ୍ରସ୍ତୁତ କରିବାକୁ କିଛି ସମୟ ଲାଗିବ, କାରଣ ଏହା ଏକ ଲମ୍ବା ପ୍ରକ୍ରିୟା । ଯାହା ଅଧୀନରେ ପୋଷ୍ଟରରେ ଦେଖାଯାଉଥିବା ଚେହେରା ସହିତ ମେଳ ଖୁଆଇ ଏହି ତାଲିକା ପ୍ରସ୍ତୁତ କରାଯିବ । ଏହି ମାମଲାରେ ଜିଲ୍ଲା ପ୍ରଶାସନ ସିସିଟିଭି ଭିଡିଓରେ ଦେଖାଯାଉଥିବା ୧୦୦ରୁ ଅଧିକ ଦୁର୍ବୃତ୍ତଙ୍କ ଅନୁସନ୍ଧାନ କରୁଛି । ଏହି ହିଂସା ଘଟଣାରେ କାନପୁର ପୋଲିସ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ (ପିଏଫଆଇ) ସହ ଜଡିତ ତିନି ଜଣଙ୍କ ସମେତ ମୋଟ ୫୪ ଜଣଙ୍କୁ ଗିରଫ କରିଛି।
ପୋଲିସ ସୂଚନା ଅନୁଯାୟୀ, ହିଂସାର କଥିତ ମାଷ୍ଟରମାଇଣ୍ଡ ଜାଭେଦ ଅହମ୍ମଦ, ମହମ୍ମଦ ସୁଫିୟାନ ଏବଂ ମହମ୍ମଦ ସାହିଲ ଏଟିଏସ ଅର୍ଥାତ୍ ଆତଙ୍କବାଦ ନିରୋଧୀ ଦଳ ଏବଂ ଏସଆଇଟିର ପଚରାଉଚରାରେ ଅନେକ ବଡ଼ ଖୁଲାସା କରିଛନ୍ତି।