ମୁମ୍ବାଇ: ବିକି କୌଶଲ ଏବଂ କ୍ୟାଟ୍ରିନା କୈଫଙ୍କ ବିବାହ ଏକ ବର୍ଷରୁ ଅଧିକ ସମୟ ହୋଇଯାଇଛି। ତେବେ ଯେକୌଣସି ଇଭେଣ୍ଟ କିମ୍ବା ଚଳଚ୍ଚିତ୍ର ପ୍ରମୋସନ ସମୟରେ ଉଭୟ ସର୍ବଦା ଏକାଠି ଥିବାର ନଜର ଆସନ୍ତି। ବେଳେବେଳେ ଉଭୟ ନିଜ ପ୍ରେମ କାହାଣୀ ଏବଂ ବେଳେବେଳେ ତାଙ୍କ ଘରୋଇ ଜୀବନ ବିଷୟରେ ଆଲୋଚନା ମଧ୍ୟ କରନ୍ତି। ନିକଟରେ ମୁକ୍ତିଲାଭ କରିଥିବା ଚଳଚ୍ଚିତ୍ର ‘ଜରା ହଟକେ ଜରା ବଚକେ’ର ପ୍ରମୋସନ ସମୟରେ ବିକି କହିଛନ୍ତି ଯେ କ୍ୟାଟ୍ରିନା ପ୍ରାୟତଃ ଘରର କର୍ମଚାରୀଙ୍କ ସହ ବଜେଟ୍ ମିଟିଂ କରନ୍ତି ଏବଂ ଘରର ସମସ୍ତ ଖର୍ଚ୍ଚର ହିସାବ ମାଗନ୍ତି।
ନ୍ୟୁଜ୍ ଟକ୍ ସହିତ ଏକ ବାର୍ତ୍ତାଳାପରେ ବିକି କହିଛନ୍ତି, ସବୁଠାରୁ ମଜାଦାର ଅନୁଭୂତି ହେଉଛି ଯେତେବେଳେ କ୍ୟାଟ୍ରିନା ପ୍ରତି ସପ୍ତାହରେ ଘରେ ବୈଠକ କରନ୍ତି ସେତେବେଳେ ସେ ଘରର ସମସ୍ତ କର୍ମଚାରୀଙ୍କୁ ଏକାଠି ଡାକି ଖର୍ଚ୍ଚର ହିସାବ ମାଗନ୍ତି। କେଉଁଠାରେ ଏବଂ କେଉଁ କାମରେ ଟଙ୍କା ଖର୍ଚ୍ଚ ହେଉଛି ତାହା ଉପରେ ନଜର ରଖିନ୍ତି କ୍ୟାଟ୍। ଏନେଇ ବିକି କୁହନ୍ତି ଯେ ଏହି ମିଟିଂ ସମୟରେ ମୁଁ ବହୁତ ଏଞ୍ଜୋଏ କରେ ଏବଂ ମୁଁ ଜଣେ ଦର୍ଶକ ଭଳି ମନେ ହୁଏ। ସେହି ସମୟରେ ମୁଁ ପପକର୍ଣ୍ଣ ଖାଇ ଏହି ବିଷୟଟିକୁ ଉପଭୋଗ କରେ।
ଫିଲ୍ମର ପ୍ରମୋସନ ସମୟରେ ବିକି ଏହା ମଧ୍ୟ କହିଥିଲେ ଯେ କ୍ୟାଟ୍ରିନା ଏକ ମହଙ୍ଗା ବାର କିଣିବାକୁ ଚାହୁଁଛନ୍ତି, ଯାହା ପାଇଁ ସେ ମନା କରିଦେଇଥିଲେ। ଏନେଇ ବିକି କହିଥିଲେ, “ଆମେ ଘରର ଆସବାବପତ୍ର ଉପରେ ଅନେକ ଆଲୋଚନା କରୁ। ଦିନେ ସେ କିଣିବାକୁ ଚାହୁଁଥିବା ବାର ଦେଖିବାକୁ ମୋତେ ପଠାଇଥିଲେ। ମୁଁ ଦେଖିଲି ଏବଂ ଭାବିଲି ଏହା ବହୁତ ମହଙ୍ଗା। ଏଠାରେ ମୁଁ ଟ୍ରେ ଧରି ଠିଆ ହେବି ପଛେ ଏହା କିଣିବାର ସାହସ ନାହିଁ। ଏହା ମୋର ବଜେଟ ବାହାରେ।”