ଓଡି଼ଶା ସମ୍ବାଦ ବ୍ୟୁରୋ: ଅନେକ ଦିନ ଧରି ଜାରି ରହିଥିବା ମଣିପୁର ହିଂସାକାଣ୍ଡରେ ସୁରକ୍ଷା ବାହିନୀ ଏବେ ମଧ୍ୟ ଆଲର୍ଟ ମୋଡରେ ଅଛନ୍ତି। ଏପରି ଘଟଣା ଯେପରି ପୁନରାବୃତ୍ତି ନହୁଏ ସେଥିପାଇଁ ଅନେକ ପଦକ୍ଷେପ ନିଆଯାଉଛି। ଏହି ପର୍ଯ୍ୟାୟରେ, ସୁରକ୍ଷା ବାହିନୀ ବର୍ତ୍ତମାନ ହିଂସା ସମୟରେ ସ୍ଥାନୀୟ ଲୋକଙ୍କ ଦ୍ୱାରା ଚୋରି ହୋଇଥିବା ଅସ୍ତ୍ରଶସ୍ତ୍ର ଖୋଜୁଛି। ସର୍ଚ୍ଚ ଅପରେସନ୍ ସମୟରେ ସୁରକ୍ଷା ବାହିନୀ ଏପର୍ଯ୍ୟନ୍ତ ୧୧,୭୬୩ ଗୁଳି, ୮୯୬ ଅସ୍ତ୍ରଶସ୍ତ୍ର ଏବଂ ୨୦୦ ବୋମା ଉଦ୍ଧାର କରିଛି। ରାଜ୍ୟ ସରକାରଙ୍କ ସୁରକ୍ଷା ପରାମର୍ଶଦାତା କୁଲଦୀପ ସିଂ ଏ ସମ୍ପର୍କରେ ସୂଚନା ଦେଇଛନ୍ତି।
ଅଧିକାରୀମାନେ ପୂର୍ବରୁ କହିଥିଲେ ଯେ ହିଂସା ପ୍ରଭାବିତ ମଣିପୁରରେ ପ୍ରାୟ ୫୦ ଲକ୍ଷ ଗୁଳି ଏବଂ ୩୫୦୦ ଅସ୍ତ୍ରଶସ୍ତ୍ର ଚୋରି ହୋଇଛି। ଯଦିଓ ଏଥିପାଇଁ କୌଣସି ସରକାରୀ ଆକଳନ ନାହିଁ। ରାଜ୍ୟ ଗସ୍ତରେ ଆସିଥିବା ଅମିତ ଶାହା ମଧ୍ୟ ଅସ୍ତ୍ରଶସ୍ତ୍ର ଫେରାଇବାକୁ ଲୋକଙ୍କୁ ନିବେଦନ କରିଥିଲେ। ଏହା ପରେ ସ୍ଥାନୀୟ ଲୋକେ ଏକ ସପ୍ତାହ ପୂର୍ବରୁ ନିଜ ନକଟରେ ଥିବା ଅସ୍ତ୍ରଶସ୍ତ୍ର ଫେରାଇବା ଆରମ୍ଭ କରିଥିଲେ। ଅମିତ ଶାହା ଗତ ମାସ ମଣିପୁରରେ ୪ ଦିନିଆ ଗସ୍ତରେ ଆସିଥିଲେ।
ଅମିତ ଶାହାଙ୍କ ଗସ୍ତ ପରଠାରୁ ଜୁନ୍ ୮ ପର୍ଯ୍ୟନ୍ତ ସୁରକ୍ଷା ବାହିନୀ ଦ୍ୱାରା ୧୪୪ ଟି ଅସ୍ତ୍ର ଉଦ୍ଧାର ହୋଇଥିବାବେଳେ ଅମିତ ଶାହାଙ୍କ ଗସ୍ତ ପୂର୍ବରୁ ୭୫୦ ଟି ଅସ୍ତ୍ର ଉଦ୍ଧାର କରାଯାଇଥିଲା। ଅଧିକାରୀମାନେ କହିଛନ୍ତି ଯେ ସେମାନେ ନିଶ୍ଚିତ ଯେ ଏଠାରୁ ବହୁ ସଂଖ୍ୟକ ଅସ୍ତ୍ରଶସ୍ତ୍ର ଉଦ୍ଧାର କରିବେ। କିନ୍ତୁ କୁକି ଏବଂ ମୈତଇ ସମ୍ପ୍ରଦାୟ ମଧ୍ୟରେ ବିବାଦ ଜାରି ରହିଥିବାରୁ ଏହି ଅପରେସନଟି କିଛି ସମୟ ନେଇପାରେ। ଏଥିସହ ଅନ୍ୟ ଜଣେ ଅଧିକାରୀ କହିଛନ୍ତି ଯେ ସୂଚନାଦାତାଙ୍କଠାରୁ ସୂଚନା ତଥା ଟେକନିକାଲ ଇନପୁଟ୍ ଆଧାରରେ ଅସ୍ତ୍ରଶସ୍ତ୍ର ଖୋଜାଯାଉଛି। ଏହାଛଡ଼ା ଯେଉଁଠାରେ ଅସ୍ତ୍ରଶସ୍ତ୍ର ଲୁଚାଯାଇଥିବା ଖବର ମିଳୁଛି, ସେମାନଙ୍କ ବିଷୟରେ ଗୁପ୍ତ ସୂଚନା ଗ୍ରହଣ କରାଯାଇ ସେଠାରେ ସର୍ଚ୍ଚ ଅପରେସନ୍ କରାଯାଉଛି।
ସୂଚନା ଥାଉକି, ମେ ୩ ତାରିଖରୁ ମୈତଇ ଏବଂ କୁକି ସମ୍ପ୍ରଦାୟ ମଧ୍ୟରେ ହିଂସା ଆରମ୍ଭ ହୋଇ ରାଜ୍ୟରେ ଅନେକ ଧ୍ୱଂସ ଘଟାଇଥିଲା। ଏହି ହିଂସାରେ ୧୦୫ ଜଣଙ୍କର ମୃତ୍ୟୁ ହୋଇଥିବାବେଳେ ୩୦୦ ରୁ ଅଧିକ ଲୋକ ଆହତ ହୋଇଛନ୍ତି। ଏଥି ସହିତ ୪୦ ହଜାରରୁ ଅଧିକ ଲୋକ ପଳାଇବାକୁ ବାଧ୍ୟ ହୋଇଥିଲେ। ଏହି ସମୟରେ ରାଜ୍ୟରେ ହିଂସା ମାମଲାରେ ୬ ଟି ଏଫ୍ଆଇଆର୍ ପଞ୍ଜିକୃତ ହୋଇଛି। ଏହି ଘଟଣାର ଅନୁସନ୍ଧାନ ପାଇଁ ଏକ ଏସଆଇଟି ଗଠନ କରାଯାଇଛି।