ମୋଦିଙ୍କ ବାୟୋପିକ୍ ପୋଷ୍ଟରରେ ଜାଭେଦ୍ ଅଖତର୍ଙ୍କ ନାଁକୁ ନେଇ ବିବାଦ
ମୁମ୍ବାଇ: ଗୋଟାଏ ପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ନିର୍ମିତ ଜୀବନୀ-ଚଳଚ୍ଚିତ୍ର ‘ପିଏମ୍ ନରେନ୍ଦ୍ର ମୋଦି’ର ରିଲିଜ୍ ତାରିଖକୁ ନେଇ ଅନିଶ୍ଚତତା ଲାଗିରହିଥିବାବେଳେ ଅନ୍ୟପଟେ ଏହାକୁ ନେଇ ବିବାଦ ପରେ ବିବାଦ ସୃଷ୍ଟିହେବାରେ ଲାଗିଛି । ଆଗକୁ ନିର୍ବାଚନ ଥିବାବେଳେ ଏହାର ପ୍ରଦର୍ଶନ ନିର୍ବାଚନ ଆଚରଣ ବିଧିର ଉଲଂଘନ କରିବ ବୋଲି ବିରୋଧୀଙ୍କ ନାରାବାଜି ସହିତ ଯୋଡ଼ିହୋଇ ଯାଇଛି ବିଖ୍ୟାତ ଗୀତିକାର ଜାଭେଦ୍ ଅଖତରଙ୍କ ସଦ୍ୟତମ ଅଭିଯୋଗ । ପିଟିଆଇକୁ ଦେଇଥିବା ଏକ ସାକ୍ଷାତକାରରେ ସେ କହିଛନ୍ତି, “ଆଜିକାଲି ଆଉ ବଲିଉଡ୍ରେ ମୌଳିକ ସାଧୁତା ନାହିଁ । ପୁରୁଣା ସିନେମାର ସଙ୍ଗୀତ-ଅଧିକାର (ରାଇଟ୍ସ) କିଣି ତାକୁ ନୂଆ ସିନେମାରେ ରିମେକ୍ କରିବାର ଅସାଧୁ ପରମ୍ପରା ଏବେ ଲଗାତାର ଚାଲିଛି । ଯାହା ଆଦୌ ସୁନ୍ଦର ନୁହେଁ ।”
ଏଠାରେ ପ୍ରକାଶଯୋଗ୍ୟ ଯେ ମୋଦିଙ୍କ ବାୟୋପିକରେ କୌଣସି ଗୀତ ନଲେଖି ମଧ୍ୟ ପୋଷ୍ଟରରେ ଜାଭେଦ୍ ଅଖତରଙ୍କ ନାମ ରଖାଯାଇଛି । ଏହାକୁ ନେଇ ତୀବ୍ର ପ୍ରତିକି୍ରୟା ପ୍ରକାଶ କରିଛନ୍ତି ଏହି ବର୍ଷୀୟାନ୍ ଲେଖକ । ଦୀପା ମେହେଟାଙ୍କ ‘୧୯୪୭: ଆର୍ଥ’ ଫିଲ୍ମ ପାଇଁ ସେ ଲେଖିଥିବା ‘ଈଶ୍ୱର ଆଲ୍ଲା’ ଗୀତଟି ବିବେକ ଓବରୟ ଅଭିନୀତ ଏହି ‘ପିଏମ୍ ନରେନ୍ଦ୍ର ମୋଦି’ ସିନେମାରେ ରିମେକ୍ କରାଯାଇଛି, ଯେଉଁଥି ପାଇଁ ତାଙ୍କଠୁ କୌଣସି ଅନୁମତି ନିଆଯାଇନାହିଁ । ଟି-ସିରିଜ୍ଠାରୁ ପୁରୁଣା ଗୀତର ମିଉଜିକ୍ ରାଇଟ୍ସ କିଣି ଏପରି କରାଯାଇଛି, ଯାହା ଅତ୍ୟନ୍ତ ଦୁଃଖଦାୟକ ବୋଲି ଅଖତର୍ କହିଛନ୍ତି ।
Comments are closed.