ନୂଆଦିଲ୍ଲୀ: ଭାରତରେ ଅନୁଷ୍ଠିତ ହେଉଥିବା ସାଧାରଣ ନିର୍ବାଚନର ଲୋକସଭା ଆସନଗୁଡ଼ିକର ଫଳାଫଳ ଆସିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟ୍ୱିଟର୍ ପେଜରେ ନିଜ ନାମ ପୂର୍ବରୁ ରଖିଥିବା ‘ଚୌକିଦାର’ ଶବ୍ଦଟିକୁ ହଟାଇ ଦେଇଛନ୍ତି । ଏନେଇ ସେ କହିଛନ୍ତି, ଯେଉଁ ମାନେ ତାଙ୍କୁ ସମର୍ଥନ କରି ଏହା ଲେଖିଥିଲେ ସେମାନେ ମଧ୍ୟ ନିଜ ନାମ ପୂର୍ବରୁ ହଟାଇଦେବାକୁ ସେ ଅନୁରୋଧ କରିଛନ୍ତି ।
ଏନେଇ ମୋଦୀ ଟ୍ୱିଟ୍ କରି କହିଛନ୍ତି, ଏବେ ସମୟ ଆସିଛି, ଚୌକିଦାର ପରି ଭାବନାକୁ ପରବର୍ତ୍ତୀ ସ୍ତର ପର୍ଯ୍ୟନ୍ତ ନେଇକି ସମସ୍ତେ ଯାଆନ୍ତୁ । ଏହି ଉଚ୍ଚତର ଭାବନାକୁ ଜୀବନ୍ତ ରଖିବା ସହିତ ଆମେ ଭାରତ ପରି ରାଷ୍ଟ୍ରର ପ୍ରଗତି ତଥା ବିକାଶ ଲାଗି ନିରନ୍ତର କାର୍ଯ୍ୟ ଜାରି ରଖିବୁ । ଟ୍ୱିଟର୍ ରେ ଆମ ନିଜ ନାମ ପୂର୍ବରୁ ଚୌକିଦାର ଶବ୍ଦ ହଟାଯାଉଛି, ମାତ୍ର ଏହି ବିଶେଷ ଶବ୍ଦଟି ମୋ ଲାଗି ଏକ ଅଭିନ୍ନ ଅଙ୍ଗ ହୋଇ ରହିଥିବ । ମୁଁ ଆପଣମାନଙ୍କୁ ଅନୁରୋଧ କରୁଛି ଆପଣମାନେ ତାହା କରନ୍ତୁ ।
Now, the time has come to take the Chowkidar Spirit to the next level.
Keep this spirit alive at every moment and continue working for India’s progress.
The word ‘Chowkidar’ goes from my Twitter name but it remains an integral part of me. Urging you all to do the same too!
— Narendra Modi (@narendramodi) May 23, 2019
ଦଳର ସମସ୍ତ କାର୍ଯ୍ୟକର୍ତ୍ତାମାନଙ୍କୁ ପ୍ରଶଂସା କରି ପ୍ରଦାନମନ୍ତ୍ରୀ ମୋଦୀ କହିଛନ୍ତି, “ମୁଁ ସମସ୍ତ ବିଜେପି କର୍ମକର୍ତ୍ତାମାନଙ୍କୁ ସେମାନଙ୍କର କଠିନ ପରିଶ୍ରମ ତଥା ଉଦ୍ୟମ ଲାଗି ମୋର ନମସ୍କାର ଓ ସମ୍ମାନ ଜଣାଉଛି । ଏବେ ଭାରତର ସମସ୍ତ ଜନସାଧାରଣ ଚୌକିଦାର, ଏବଂ ଏହା ମାଧ୍ୟମରେ ଜାତି ଲାଗି ସେବା କରାଯାଇପାରିବ” ।
ଏହି ‘ଚୌକିଦାର’ ଶବ୍ଦ ୨୦୧୪ ନିର୍ବାଚନ ସମୟରୁ ଆସିଥିଲା, ଯେବେ ମୋଦୀ ନିର୍ବାଚନ ସମୟରେ ଜାତି ଲାଗି ନିଜକୁ ଚୌକିଦାର ମନେ କରି କାର୍ଯ୍ୟ କରିବାକୁ କହିଥିଲେ । ତେବେ ଏହି ନିର୍ବାଚନରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଏହି ଶବ୍ଦକୁ ନେଇ ମୋଦୀଙ୍କୁ ଅନେକ ସମାଲୋଚନା କରିବାକୁ ପଛାଇ ନଥିଲେ, ଏବଂ ଏହା କ୍ରମେ ବିବାଦୀୟ ହୋଇ ନିର୍ବାଚନ କମିଶନଙ୍କ ନିକଟକୁ ଯାଇଥିଲା । ରାଫେଲ୍ ଯୁଦ୍ଧ ବିମାନ କିଣା ମାମଲାରେ ରାହୁଲ କହିଥିଲେ, “ଚୌକିଦାର ଚୋର୍ ହୈ” ।
ନିର୍ବାଚନ ପ୍ରଚାର ସମୟରେ ରାହୁଲ୍ ଗାନ୍ଧୀ ଏହି “ଚୌକିଦାର ଚୋର୍ ହୈ” ସ୍ଲୋଗାନକୁ ବାରମ୍ବାର କହି ମୋଦୀଙ୍କୁ ସମାଲୋଚନା କରିବା ପରେ ମୋଦୀ ପ୍ରତିବାଦ ସ୍ୱରୁପ ନିଜ ନାମ ପୂର୍ବରୁ ଚୌକିଦାର ଲଗାଇଥିଲେ । ଯାହାଫଳରେ ମୋଦୀଙ୍କୁ ଦେଖି ସମସ୍ତ ବିଜେପି କର୍ମକର୍ତ୍ତା ଏବଂ ତାଙ୍କର ସମର୍ଥକମାନେ ନିଜ ନାମ ପୂର୍ବରୁ ଚୌକିଦାର ଲଗାଇଥିଲେ ।