ନୂଆଦିଲ୍ଲୀ: ଅସଲୀ ନାଁରେ ନକଲି ଜିନିଷ ବିକ୍ରିର ଟ୍ରେଣ୍ଡ ଭିତରେ ଆସିଛି ଭଲ ଖବର । ଆଉ ବଜାରରେ ବିକ୍ରି ହେବନି ଫେକ୍ ପନୀର୍ । ପନୀର୍ ଉତ୍ପାଦରେ ରହିବ ପ୍ରଡକ୍ଟ ଡିଟେଲ୍ସ । ଆଉ ବ୍ୟବହାର ହେବନି ‘ପନୀର୍’ ଶବ୍ଦ । ଫୁଡ୍ ସେଫ୍ଟି ଓ ଷ୍ଟାଣ୍ଡାର୍ଡସ ଅଥରିଟି ଅଫ୍ ଇଣ୍ଡିଆ (FSSAI)ର ନୂଆ ପ୍ରସ୍ତାବ । ଆନାଲଗ୍ ପନୀର୍ ଓ ଚିଜ୍ ଉତ୍ପାଦରେ ପନୀର ଶବ୍ଦ ଲଗାଇବାକୁ କଟକଣା ଜାରି ହୋଇଛି । ବିକଳ୍ପ ଉତ୍ପାଦ ପାଇଁ ‘ପନୀର୍’ଲେବଲ୍ ନଲଗାଇବାକୁ ପ୍ରସ୍ତାବ ଦେଇଛି ଏଫଏସଏସଏଆଇ । ଗ୍ରାହକ କିଣୁଥିବା ଉତ୍ପାଦର ପ୍ରକୃତି ଓ ଉପାଦାନ ସମ୍ପର୍କରେ ଯେପରି ବିଭ୍ରାନ୍ତ ନହୁଅନ୍ତି, ତାକୁ ଲକ୍ଷରେ ରଖି ଏପରି ପ୍ରସ୍ତାବ ଦିଆଯାଇଛି । ଏହି ପ୍ରସ୍ତାବିତ ସଂଶୋଧନ ଖାଦ୍ୟ ବ୍ୟବସାୟୀଙ୍କୁ ପ୍ରଭାବିତ କରିବ । ହୋଟେଲ୍ , ରୋସ୍ତୋରାଁ ଓ କ୍ୟାଟେରିଂ ସେବା ଯୋଗାଉଥିବା ବ୍ୟବସାୟୀ ମାନେ ପାରମ୍ପରିକ ଦୁଗ୍ଧଭିତିକ ପନୀର୍ କିମ୍ବା ଚିଜ୍ ଉତ୍ପାଦର ବିକଳ୍ପ ବ୍ୟବହାର କରନ୍ତି । ଏଫଏସଏସଏଆଇର ପ୍ରସ୍ତାବ ଅନୁସାରେ, ପନୀର କିମ୍ବା ପନୀର ସଦୃଶ ଉତ୍ପାଦ ବ୍ୟବହାର କରି ପ୍ରସ୍ତୁତ ସାମଗ୍ରୀ ଗୁଡିକୁ ଗ୍ରାହକଙ୍କ ପାଇଁ ସ୍ପଷ୍ଟ ଭାବେ ଚିହ୍ନଟ କରାଯିବା ଆବଶ୍ୟକ । ଖାଦ୍ୟ ସୁରକ୍ଷା ଓ ମାନକ ନିୟମାବଳୀ ଅନୁସାରେ ମେନ୍ୟୁ କାର୍ଡ ଓ ପ୍ୟାକେଜିଂ ଲେବଲ୍ ସହିତ ଗ୍ରାହକଙ୍କୁ ଜଣାଇବାକୁ ପଡିବ । ଗ୍ରହକଙ୍କୁ ବିଭ୍ରାନ୍ତି ହେବାରୁ ରୋକିବାକୁ ଏପରି ବିଜ୍ଞପ୍ତି ଜାରି କରିଛି ଏଫଏସଏସଏଆଇ । ଏହାଦ୍ୱାରା ଆନାଲଗ ଉତ୍ପାଦକୁ ପନୀର ନାଁ ନେଇ ବିକ୍ରି ଉପରେ ଲାଗିପାରିବ କଟକଣା । ଆନାଲଗ୍ ଇନ୍ ଡାଏରୀ କଂଟେକ୍ସଟ ବର୍ଗରେ ପୂର୍ବରୁ ନାମକରଣ ହୋଇଥିବା କି ବିକ୍ରି ହୋଇଥିବା ଉତ୍ପାଦର ନାମ ପରିବର୍ତନ କରିବାକୁ ହେବ । ଯାହା ପାରମ୍ପରିକ ଦୁଗ୍ଧ ଭିତିକ ପନୀର କିମ୍ବା ଚିଜ୍ ନୁହେଁ ତାକୁ ପନୀର କହି ବିକୁଥିବା ବ୍ୟବସାୟୀ ହୁଅନ୍ତୁ ସାବଧାନ । ଏଣିକି ଗ୍ରାହକଙ୍କ ଅବଗତି ନିମନ୍ତେ FSSAIର ନୂଆ ବିଜ୍ଞପ୍ତି କାମରେ ଆସିବ । ଖାଦ୍ୟ ସାମଗ୍ରୀର ଲେବଲ୍ ଏବଂ ଉପାଦାନ ସମ୍ବନ୍ଧୀୟ ନିୟାମକ ଯାଂଚ୍ ତଥା ଖାଦ୍ୟ ସୁରକ୍ଷା ଯାଂଚ୍ ବୃଦ୍ଧି ପାଇଥିବା ସମୟରେ ଏହି ପ୍ରସ୍ତାବ ନିହାତି ଏକ ଯୁଗାନ୍ତକାରୀ ପ୍ରସ୍ତାବ ସାବ୍ୟସ୍ତ ହେବ ।
