ଭୁବନେଶ୍ୱର: କେମିତି, କାହା ପାଇଁ କରମଣ୍ଡଳ ଦୁର୍ଘଟଣାଗ୍ରସ୍ତ ହେଲା ? କାହା ଭୁଲ୍ ପାଇଁ ୨୭୫ ଜଣଙ୍କ ଜୀବନ ଗଲା ? ଏସବୁର ତଦନ୍ତ ପାଇଁ ରେଲୱେ ବୋର୍ଡ ସିବିଆଇ ତଦନ୍ତ ସୁପାରିସ୍ କରିଛି । ଏନେଇ ସୂଚନା ଦେଇଛନ୍ତି କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ।
ରେଳମନ୍ତ୍ରୀ କହିଛନ୍ତି, ଦୁର୍ଘଟଣା ପରେ ଏବେ ଯାଏ ଯେଉଁ ସବୁ ସୂଚନା ମିଳିଛି । ସେ ସବୁକୁ ଦେଖି ରେଲୱେ ବୋର୍ଡ ସିବିଆଇକୁ ତଦନ୍ତ ସୁପାରିସ୍ କରିଛି । ସେପଟେ ଆସନ୍ତାକାଲି ଦୁର୍ଘଟଣାର ତଦନ୍ତ କରିବେ ଦକ୍ଷିଣ ପୂର୍ବ ରେଳପଥର ରେଲୱେ ସୁରକ୍ଷା କମିଶନର । ଆସନ୍ତାକାଲି ଠାରୁ ରେଲୱେ ସୁରକ୍ଷା କମିଶନର ତଦନ୍ତ ଆରମ୍ଭ କରିବେ । ୬ ତାରିଖ ମଙ୍ଗଳବାର ଖଡ଼଼ଗପୁରସ୍ଥିତ ସାଉଥ୍ ଇନଷ୍ଟିଚ୍ୟୁଟକୁ ଯିବେ ।
ଶାଲିମାର-ଚେନ୍ନାଇ ସେଣ୍ଟ୍ରାଲ୍ କରମଣ୍ଡଳ ଏକ୍ସପ୍ରେସ୍ ଓ ବେଙ୍ଗଳୁରୁ-ହାୱଡ଼ା ସୁପରଫାଷ୍ଟ ଏକ୍ସପ୍ରେସ୍ ଦୁର୍ଘଟଣା ନେଇ ଆଲୋଚନା କରିବେ । ଦୁର୍ଘଟଣା ନେଇ କୌଣସି ସୂଚନା ଥିଲେ ରେଳଯାତ୍ରୀ, ଜନସାଧାରଣ ରେଲୱେ କମିଶନଙ୍କୁ ଜଣାଇ ପାରିବେ ବୋଲି ଦକ୍ଷିଣ ପୂର୍ବ ରେଳପଥ ପକ୍ଷରୁ ସୂଚନା ଦିଆଯାଇଛି ।
ସିଗନାଲରେ ତ୍ରୁଟି ପାଇଁ ଏତେ ବଡ଼ ଦୁର୍ଘଟଣା ଘଟିଥିବା ଆଜି ଦିଲ୍ଲୀରେ ରେଲୱେ ବୋର୍ଡ ପକ୍ଷରୁ କୁହାଯାଇଛି । ତେବେ କାହା ଭୁଲ୍ ପାଇଁ ଅଘଟଣ ଘଟିଲା ? ଇଣ୍ଟରଲକିଂରେ ସମସ୍ୟା ଥିଲା ନା ସିଗନାଲରେ ତ୍ରୁଟି ଥିଲା ? ସମସ୍ତ ଦିଗରୁ ତଦନ୍ତ କରାଯାଉଛି ଏବଂ ତଦନ୍ତ ପରେ ସବୁକିଛି ସ୍ପଷ୍ଟ ହେବ ବୋଲି ରେଲୱେ ବୋର୍ଡ ପକ୍ଷରୁ କୁହାଯାଇଛି ।
ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାହାନଗା ଦୁର୍ଘଟଣାସ୍ଥଳ ପରିଦର୍ଶନ କରିବା ସହ ହସ୍ପିଟାଲରେ ଆହତଙ୍କୁ ଭେଟିଥିଲେ । କହିଥିଲେ, ଦୁର୍ଘଟଣା ପାଇଁ ଯେଉଁମାନେ ବି ଦାୟୀ ହୋଇଥିବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହେବ । ଶୁକ୍ରବାର ଘଟିଥିବା ଦୁର୍ଘଟଣାରେ ୨୭୫ ଜଣଙ୍କ ମୃତ୍ୟୁ ହୋଇଥିବା ବେଳେ ହଜାରେରୁ ଅଧିକ ଯାତ୍ରୀ ଆହତ ହୋଇଥିଲେ ।
ବିଭିନ୍ନ ହସ୍ପିଟାଲରେ ଆହତଙ୍କ ଚିକିତ୍ସା କରାଯାଉଥିବା ବେଳେ ଆଜି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟେ ମେଡିକାଲରେ ଆହତଙ୍କୁ ଭେଟିଛନ୍ତି । ସେପଟେ ଚିହ୍ନଟ ହୋଇ ପାରି ନଥିବା ମୃତଦେହର ଫଟୋକୁ ସରକାର ୱେବସାଇଟରେ ଅପଲୋଡ୍ କରିବା ସହ ହେଲ୍ପଲାଇନ୍ ନମ୍ବର ଜାରି କରିଛନ୍ତି । ମୃତଦେହକୁ ପଠାଇବା ବ୍ୟବସ୍ଥା ପ୍ରଶାସନ ପକ୍ଷରୁ କରାଯିବ ବୋଲି କହିଛନ୍ତି ମୁଖ୍ୟ ଶାସନ ସଚିବ ।