ଭୁବନେଶ୍ୱର: ଏବେର ପୋଲିସ ଡିଜି ସୁନୀଲ ବଂଶଲଙ୍କ କାର୍ଯ୍ୟକାଳ ଆସନ୍ତାକାଲି ଶେଷ ହେଉଛି। ଗତକାଲି ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ କାର୍ଯ୍ୟକାଳ ଅବଧି ରାଜ୍ଯ ସରକାର ଆଉ ଛଅ ମାସ ବଢ଼ାଇ ଦେବା ପରେ ଏବେ ନୂଆ ଡିଜିପି କିଏ ହେବେ ସେ ନେଇ ଚର୍ଚ୍ଚା ଅଧିକ ବଢ଼ିଛି। କାରଣ ନୂଆ ଡିଜିପି ନିଯୁକ୍ତିକୁ ଅଥବା ଏବେର ଡିଜିପି ଅବସର ନେବାର ସମୟ କେଇ ଘଣ୍ଟା ବାକି ଅଛି।
ଆଗକୁ ୨୦୨୪ ସାଧାରଣ ନିର୍ବାଚନ। ଏହାକୁ ଦୃଷ୍ଟିରେ ରଖି ଓଡ଼ିଶାର ବର୍ତ୍ତମାନର ପୁଲିସ ମହାନିର୍ଦ୍ଦେଶକ (ଡିଜିପି) ସୁନୀଲ ବଂଶଲ ଅବସର ନେବାକୁ ଯାଉଥିବା ବେଳେ ଏହି ସମ୍ମାନଜନକ ପଦବୀ ପୂରଣ ପାଇଁ ଜଣେ ଉପଯୁକ୍ତ ଓ ଦକ୍ଷ ଆଇପିଏସ୍ ଅଧିକାରୀଙ୍କୁ ନିଯୁକ୍ତି ଦେବା ରାଜ୍ୟ ସରକାରଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି ହୋଇଛି।
ଡିଜିପି ପଦ ପାଇଁ ସମ୍ଭାବ୍ୟ ପ୍ରାର୍ଥୀ ଭାବେ ଅନେକଙ୍କ ନାମ ଚର୍ଚ୍ଚା ହେଉଛି। ସେମାନଙ୍କ ମଧ୍ୟରେ ୮୯ ବ୍ୟାଚ୍ ର ଆଇପିଏସ୍ ଅଫିସର ବି ରାଧିକା ଓ ଅମୃତ ମୋହନ ପ୍ରସାଦ ଏବଂ ୯୦ ବ୍ୟାଚର ଅରୁଣ ଷଡ଼ଙ୍ଗୀ ଓ ୱାଇବି ଖୁରାନିଆ ପ୍ରମୁଖ ଅଛନ୍ତି। ତେବେ ୧୯୮୮ ବ୍ୟାଚର ବରିଷ୍ଠ ଆଇପିଏସ୍ ଅଫିସର ମନୋଜ ଛାବ୍ରା ଚଳିତ ମାସରେ ଅବସର ନେଉଥିବାରୁ ତାଙ୍କୁ ବିଚାରକୁ ନିଆଯିବାର ସମ୍ଭାବନା ନାହିଁ।
ସେହି ବ୍ୟାଚର ଅନ୍ୟ ଜଣେ ବରିଷ୍ଠ ଆଇପିଏସ୍ ଅଧିକାରୀ ଅରୁଣ ରାୟ ବର୍ତ୍ତମାନ ଗୃହ ବିଭାଗର ଓଏସଡି ଭାବେ କାର୍ଯ୍ୟ କରୁଥିବା ବେଳେ ତାଙ୍କୁ ନୂଆ ଡିଜିପି ଭାବେ ନିଯୁକ୍ତି ଦିଆଯାଇପାରେ ବୋଲି ଚର୍ଚ୍ଚା ହେଉଛି। ତେବେ ତାଙ୍କ ପ୍ରଦର୍ଶନରେ ରାଜ୍ୟ ସରକାର ସମ୍ପୂର୍ଣ୍ଣ ସନ୍ତୁଷ୍ଟ ନୁହଁନ୍ତି ବୋଲି ସୂଚନା ମିଳିଛି।
ଓଡ଼ିଶା ସରକାର ୟୁପିଏସସି ସହ ନିଯୁକ୍ତି ନେଇ ଆଲୋଚନା କରିବାକୁ ପ୍ରସ୍ତୁତ ହେଉଥିବା ବେଳେ ଅସ୍ଥାୟୀ ଅବଧି ପାଇଁ ଅନ୍ତରୀଣ ଡିଜିପି ନିଯୁକ୍ତି ନେଇ ଚର୍ଚ୍ଚା ଜୋର ଧରିଛି ।
ଅରୁଣ ଷଡ଼ଙ୍ଗୀ ଓ ଅମୃତ ମୋହନ ପ୍ରସାଦ ଏବେ ପୁଲିସ ବିଭାଗରେ ନିଯୁକ୍ତି ପାଇଥିବାରୁ ସେମାନେ ସମ୍ଭାବ୍ୟ ଦାବିଦାର ହୋଇପାରନ୍ତି ବୋଲି ଓଡ଼ିଶା ପୁଲିସର ପୂର୍ବତନ ଡିଜି ସଞ୍ଜୀବ ମାରିକ ମତ ବ୍ୟକ୍ତ କରିଛନ୍ତି। ଏହି ଭୂମିକା ପାଇଁ ସରକାର ବି ରାଧିକା କିମ୍ବା ଖୁରାନିଆଙ୍କୁ ଚୟନ କରିପାରନ୍ତି।
ନିଯୁକ୍ତି ପ୍ରକ୍ରିୟା ବିଳମ୍ବ ହେଉଥିବାରୁ ରାଜ୍ୟ ସରକାର କିଛି ସରପ୍ରାଇଜ ଚେହେରାକୁ ସାମ୍ନାକୁ ଆଣିପାରନ୍ତି ବୋଲି କୁହାଯାଉଛି।ବିଶେଷ କରି ଯେଉଁମାନେ ଅତୀତରେ ଆହ୍ୱାନପୂର୍ଣ୍ଣ ପରିସ୍ଥିତିକୁ ପରିଚାଳନା କରିବାର ଦକ୍ଷତା ପ୍ରଦର୍ଶନ କରିଛନ୍ତି, ସରକାରଙ୍କ ସହ ଭଲ ସ୍ଥିତିରେ ଥିବା ବ୍ୟକ୍ତିଙ୍କୁ ଚୟନ କରିପାରନ୍ତି ରାଜ୍ୟ ସରକାର।
Comments are closed.