ନୂଆଦିଲ୍ଲୀ: ଭାରତରେ ୧୦ ପ୍ରତିଶତ ଲୋକ ପ୍ରତିବର୍ଷ କିଡନୀ ରୋଗର ଶିକାର ହେଉଛନ୍ତି । ଅଧିକାଂଶ ରୋଗୀ ସେମାନଙ୍କର ରୋଗ ବିଷୟରେ ଜାଣିବା ବେଳକୁ ବହୁତ ବିଳମ୍ବ ହୋଇଯାଇଥାଏ । ସେତେବେଳକୁ ସେମାନଙ୍କ କିଡନୀ ଫେଲ ହୋଇଯାଇଥାଏ, ଯାହା ଫଳରେ ପରିସ୍ଥିତି ଏପରି ହୁଏ ଯେ ସେମାନଙ୍କ ଜୀବନ ମଧ୍ୟ ଚାଲିଯାଏ ।
ଏମସ୍ ଦିଲ୍ଲୀର ନେଫ୍ରୋଲୋଜି ବିଭାଗର ଚେୟାରମ୍ୟାନଙ୍କ କହିବା ଅନୁସାରେ, କିଡନୀ ରୋଗର ସବୁଠାରୁ ଗୁରୁତ୍ଵପୁର୍ଣ୍ଣ କଥା ଏହା ଯେ, ଲୋକମାନେ ସେମାନଙ୍କ କିଡନୀ ରୋଗ ବିଷୟରେ ଜାଣିବା ବେଳକୁ ସେମାନଙ୍କର କିଡନୀର ୭୦ଭାଗ ଅଂଶ ନଷ୍ଟ ହୋଇଯାଇଥାଏ । ଯାହାଫଳରେ ବଡ ବଡ ସମସ୍ୟା ହୋଇଥାଏ । ଏମସ୍ ରିପୋର୍ଟ ଅନୁସାରେ, ଭାରତର ପ୍ରାୟ ୭% ଲୋକଙ୍କ କିଡନୀ ଫେଲର କାରଣ ହେଉଛି ପେନକିଲର ମେଡିସିନ ।
ମଝିରେ ମଝିରେ ଯଦି ରକ୍ତରେ ୟୁରିଆ ଏବଂ କ୍ରିଏଟିନାଇନର ପରୀକ୍ଷା ସହ ପରିସ୍ରା ପରୀକ୍ଷା କରାଯାଏ, ତେବେ କିଡନୀ ଜନିତ ସମସ୍ୟାର ପ୍ରାରମ୍ଭରୁ ହିଁ ଏହା ଚିହ୍ନଟ ହୋଇପାରିବ । ସାଧାରଣତଃ କିଡନୀ ଜନିତ ରୋଗର ଲକ୍ଷଣ ଦେଖାଯିବାରେ ଅନେକ ବିଳମ୍ବ ହୋଇଥାଏ । ତେଣୁ ବେଳେ ବେଳେ ଏସବୁ ପରୀକ୍ଷା କରିବା ଦ୍ଵାରା ଏହି ସମସ୍ୟାର ସମାଧାନ ହୋଇପାରିବ ।
ତେବେ କିଡନୀ ରୋଗର ଚିକିତ୍ସା ପାଇଁ ବିଭିନ୍ନ ପ୍ରକାରର ଔଷଧ, ଅସ୍ତ୍ରୋପଚାର, ଡାୟଲିସିସ୍ ଏବଂ ଟ୍ରାନ୍ସପ୍ଲାଣ୍ଟ ପରି ସୁବିଧା ରହିଛି ତଥାପି କିଛି କ୍ଷେତ୍ରରେ ରୋଗୀର ଜୀବନ ମଧ୍ୟ ଚାଲିଯାଇଥାଏ । କିଡନୀ ରୋଗୀମାନଙ୍କୁ ମଧ୍ୟ ଉଚ୍ଚ ରକ୍ତଚାପ ହେବାର ଆଶଙ୍କା ରହିଥାଏ ଏବଂ ରକ୍ତରେ ହେମୋଗ୍ଲୋବିନର ପରିମାଣ ମଧ୍ୟ କମ୍ ରହିଥାଏ । ଯେଉଁଥିପାଇଁ ଏହିପରି ରୋଗୀମାନେ ସର୍ବଦା ଅସୁସ୍ଥ ଅନୁଭବ କରନ୍ତି ଏବଂ ସେମାନଙ୍କର ରୋଗପ୍ରତିରୋଧକ ଶକ୍ତି ଦୁର୍ବଳ ହେବାକୁ ଲାଗେ ।
Comments are closed.