ଦବିଲା ସାଲୁଙ୍କି ପୋଲ:ବିକଳ୍ପ ରାସ୍ତା ବ୍ୟବସ୍ଥା କରିବାକୁ ବିଶେଷଜ୍ଞ ଦଳ ଜିଲ୍ଲା ପ୍ରଶାସନକୁ କଲେ ଅବଗତ
ଟିକାବାଲି:ବାତ୍ୟା ଅର୍ଣ୍ଣବ ଯୋଗୁଁ ପ୍ରବଳ ବର୍ଷା ଓ ତତ୍ଜନିତ ଭୂସ୍ଖଳନ ଯୋଗୁଁ କନ୍ଧମାଳ ଜିଲ୍ଲା ଟିକାବାଲି ବ୍ଲକ ଅନ୍ତର୍ଗତ ଟିକାବାଲି କେଉଟସାହି- ଏସ୍କେପିଏମ୍ ରାସ୍ତାରେ ଥିବା ସାଲୁଙ୍କି ପୋଲ ଦବି ଯାଇଥିଲା। ଆଜି ଏହି ପୋଲର କ୍ଷୟକ୍ଷତିକୁ ଏକ ବିଶେଷଜ୍ଞଦଳ ଯାଞ୍ଚ କରିଛନ୍ତି। ଅନୁଧ୍ୟାନ ସମୟରେ, ପୋଲର ଏକ ଖମ୍ବ ନିକଟରେ ପ୍ରାୟ ୨୭ ସେଣ୍ଟିମିଟର ଦବିଯାଇଥିବା ଜଣାପଡ଼ିଥିଲା। ଏହାକୁ ଦୃଷ୍ଟିରେ ରଖି କୌଣସି ଅଘଟଣ ଏଡ଼ାଇବା ପାଇଁ ପୋଲ ଉପରେ ଯାତାୟତ ତୁରନ୍ତ ବନ୍ଦ କରିବାକୁ ଅଧିକାରୀମାନେ ନିର୍ଦ୍ଦେଶ ଦେଇଛନ୍ତି। ଏଥିସହ ଏହି ରାସ୍ତାରେ ଯାତାୟତ ବନ୍ଦ କରିବା ସହ ଲୋକଙ୍କ ଯାତାୟତ ପାଇଁ ବିକଳ୍ପ ରାସ୍ତା ବ୍ୟବସ୍ଥା କରିବାକୁ ଜିଲ୍ଲା ପ୍ରଶାସନକୁ ଅବଗତ କରାଯାଇଛି।
ସୂଚନାଥାଉକି, ଗ୍ରାମ୍ୟ ଉନ୍ନୟନ ବିଭାଗର ଫୁଲବାଣୀ ଡିଭିଜନ୍ ଅନ୍ତର୍ଗତ ଟିକାବାଲି ବ୍ଲକର ଟିକାବାଲି (କେଉଟସାହି)-ଏସ୍କେପିଏମ୍ ରାସ୍ତାରେ ସାଲୁଙ୍କି ନାଳ ଉପରେ ଥିବା ପୋଲର ସ୍ଥିତି ଅନୁଧ୍ୟାନ କରିଛନ୍ତି ମୁଖ୍ୟଯନ୍ତ୍ରୀ (ସେତୁ ଓ କୋଠାବାଡ଼ି) ଏବଂ ମୁଖ୍ୟଯନ୍ତ୍ରୀ (ରାସ୍ତା)। ଏହି ଅନୁଧ୍ୟାନ ସମୟରେ ଫୁଲବାଣୀ ଗ୍ରାମ୍ୟ ନିର୍ମାଣ ଡିଭିଜନର ସମ୍ପୃକ୍ତ ଅଧୀକ୍ଷଣ ଯନ୍ତ୍ରୀ, ଉପଖଣ୍ଡ ଅଧିକାରୀ ଓ କନିଷ୍ଠ ଯନ୍ତ୍ରୀ ଉପସ୍ଥିତ ଥିଲେ।
ଅକ୍ଟୋବର ୨୯ ତାରିଖରେ ବାତ୍ୟା ‘ଅର୍ଣ୍ଣବ’ ଯୋଗୁଁ ପ୍ରବଳ ବର୍ଷା ହେବାରୁ ୪୦ ମିଟର ଲମ୍ବର ଏହି ପୋଲଟି ବନ୍ୟାଜଳରେ ବୁଡ଼ି ରହିଥିଲା। ଅନୁଧ୍ୟାନ ସମୟରେ ପୋଲର ଏକ ଖମ୍ବ ନିକଟରେ ପ୍ରାୟ ୨୭ ସେଣ୍ଟିମିଟର ଦବିଯାଇଥିବା ଜଣାପଡ଼ିଥିଲା।
ସୂଚନାନୁଯାୟୀ, ୨୦୨୬-୨୭ ଆର୍ଥିକ ବର୍ଷ ପାଇଁ ଏସ୍ବିୱାଇ ଅଧୀନରେ ଏଠାରେ ଏକ ନୂତନ ପୋଲ ନିର୍ମାଣକୁ ମଞ୍ଜୁରୀ ମିଳିସାରିଛି। ସାମ୍ପ୍ରତିକ ବନ୍ୟା ଯୋଗୁଁ ହୋଇଥିବା କ୍ଷୟକ୍ଷତିକୁ ଦୃଷ୍ଟିରେ ରଖି ନୂତନ ପୋଲର ନକ୍ସାରେ ଆବଶ୍ୟକ ସଂଶୋଧନ କରାଯିବ।