ନୂଆଦିଲ୍ଲୀ: ଯଦି ଆପଣ ନୂଆ ବୀମା ପଲିସି କିଣିବାକୁ ଚିନ୍ତା କରୁଛନ୍ତି, ତେବେ ଆପଣଙ୍କ ପାଇଁ ଏକ ଖୁସି ଖବର ଅଛି। ଆଗକୁ ବୀମା ପଲିସି କରିବା ଅଧିକ ଶସ୍ତା ହେବାକୁ ଯାଉଛି। କେନ୍ଦ୍ର ସରକାର ଦେଶର ବୀମା କ୍ଷେତ୍ରରେ ବ୍ୟାପକ ସଂସ୍କାର ଆଣିବାକୁ ପ୍ରସ୍ତୁତି ଚଳାଇଛନ୍ତି। ବିଦେଶୀ ପ୍ରତ୍ୟକ୍ଷ ବିନିଯୋଗ ବା ଏଫଡିଆଇ ଜରିଆରେ ଏହି ସେକ୍ଟରକୁ ଅଧିକ ମଜବୁତ କରିବା ସହିତ, ଦେଶର ସବୁଠାରୁ ବଡ଼ ବୀମା ସଂସ୍ଥା ଏଲଆଇସି ପାଇଁ ମଧ୍ୟ ସ୍ୱତନ୍ତ୍ର ନିୟମ ଲାଗୁ କରିବାକୁ ଯୋଜନା କରାଯାଉଛି।
ସୂଚନା ଅନୁଯାୟୀ, ସରକାର ବୀମା କ୍ଷେତ୍ରରେ ୧୦୦ ପ୍ରତିଶତ ବିଦେଶୀ ପୁଞ୍ଜିନିବେଶକୁ ଅନୁମତି ଦେବା ନେଇ ବିଚାର କରୁଛନ୍ତି। ବର୍ତ୍ତମାନ ଏହି ସୀମା ୭୪ ପ୍ରତିଶତ ରହିଛି। ଶତପ୍ରତିଶତ ବିଦେଶୀ ପୁଞ୍ଜିନିବେଶ ଲାଗୁ ହେଲେ, ବିଶ୍ୱର ଅନେକ ନୂଆ ଏବଂ ବଡ଼ ବୀମା କମ୍ପାନୀ ଭାରତୀୟ ବଜାରରେ ପ୍ରବେଶ କରିବେ। ବଜାରରେ ଅଧିକ କମ୍ପାନୀ ରହିଲେ ସେମାନଙ୍କ ମଧ୍ୟରେ ପ୍ରତିଯୋଗିତା ବଢ଼ିବ। ଆଉ ଯେତେବେଳେ କମ୍ପାନୀଗୁଡ଼ିକ ମଧ୍ୟରେ ପ୍ରତିଯୋଗିତା ବଢ଼ିବ, ଗ୍ରାହକଙ୍କୁ ନିଜ ଆଡ଼କୁ ଆକୃଷ୍ଟ କରିବା ପାଇଁ ସେମାନେ ଶସ୍ତା ପ୍ରିମିୟମରେ ଅଧିକ ସୁବିଧା ଦେବାକୁ ବାଧ୍ୟ ହେବେ। ତେଣୁ ସିଧାସଳଖ ଭାବେ ଗ୍ରାହକମାନେ ହିଁ ଏହାଦ୍ୱାରା ଲାଭବାନ ହେବେ।
ଗ୍ରାହକଙ୍କ ସୁବିଧା ପାଇଁ ସରକାର ଏକ ‘କମ୍ପୋଜିଟ୍ ଲାଇସେନ୍ସ’ ବ୍ୟବସ୍ଥା ମଧ୍ୟ ଆଣିବାକୁ ଯାଉଛନ୍ତି। ବର୍ତ୍ତମାନ ଗୋଟିଏ କମ୍ପାନୀକୁ ଜୀବନ ବୀମା ଏବଂ ସାଧାରଣ ବୀମା (ସ୍ୱାସ୍ଥ୍ୟ, ମୋଟର ଇତ୍ୟାଦି) ବିକ୍ରି କରିବାକୁ ହେଲେ ଭିନ୍ନ ଭିନ୍ନ ଲାଇସେନ୍ସ ନେବାକୁ ପଡ଼ୁଛି କିମ୍ବା ଅଲଗା କମ୍ପାନୀ ଗଠନ କରିବାକୁ ପଡ଼ୁଛି। କିନ୍ତୁ ନୂଆ ନିୟମ ଆସିଲେ, ଗୋଟିଏ ଲାଇସେନ୍ସରେ କମ୍ପାନୀମାନେ ସବୁ ପ୍ରକାରର ପଲିସି ବିକ୍ରି କରିପାରିବେ। ଏହାଦ୍ୱାରା କମ୍ପାନୀଗୁଡ଼ିକର ଖର୍ଚ୍ଚ କମିବ ଏବଂ ଏହାର ଲାଭ ଗ୍ରାହକଙ୍କୁ ଶସ୍ତା ପ୍ରିମିୟମ୍ ଆକାରରେ ମିଳିବ।
ବଜାରରେ ପ୍ରତିଯୋଗିତା ବଢ଼ିବାକୁ ଥିବା ବେଳେ, ବୀମା ସେକ୍ଟରର ସବୁଠାରୁ ବଡ଼ ଖେଳାଳି ‘ଏଲଆଇସି’ ପାଇଁ ସରକାର କିଛି ସ୍ୱତନ୍ତ୍ର ନିୟମ ପ୍ରଣୟନ କରିବେ। ବର୍ତ୍ତମାନ ଥିବା ‘ଏଲଆଇସି ଆକ୍ଟ’ରେ ବ୍ୟାପକ ସଂଶୋଧନ କରାଯିବ। ଏହି ପରିବର୍ତ୍ତନ ଫଳରେ ଏଲଆଇସି ନିଜର ବ୍ୟବସାୟିକ ରଣନୀତିକୁ ଆହୁରି ମଜବୁତ କରିପାରିବ ଏବଂ ଘରୋଇ ତଥା ବିଦେଶୀ କମ୍ପାନୀଗୁଡ଼ିକ ସହ ତାଳ ଦେଇ ସଫଳତାର ସହ ଆଗକୁ ବଢ଼ିପାରିବ।
ମୋଟାମୋଟି ଭାବେ କହିବାକୁ ଗଲେ, ସରକାରଙ୍କ ଏହି ସମସ୍ତ ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ‘ସମସ୍ତଙ୍କ ପାଇଁ ବୀମା’ ସଂସଦର ଆଗାମୀ ଅଧିବେଶନରେ ବୀମା ଆଇନ ସଂଶୋଧନ ବିଲ୍ ଆଗତ ହେବାର ଯଥେଷ୍ଟ ସମ୍ଭାବନା ରହିଛି।
