ଆଜି ପୋପ୍ ଫ୍ରାନ୍ସିସଙ୍କ ଶେଷକୃତ୍ୟ: ଶ୍ରଦ୍ଧାଞ୍ଜଳି ଦେଲେ ରାଷ୍ଟ୍ରପତି ମୁର୍ମୁ, ଅନ୍ତିମ ସଂସ୍କାରରେ ଦେବେ ଯୋଗ
ନୂଆଦିଲ୍ଲୀ: ଖ୍ରୀଷ୍ଟ ଜଗତର ସର୍ବୋଚ୍ଚ ଧର୍ମଗୁରୁ ପୋପ୍ ଫ୍ରାନ୍ସିସ୍ଙ୍କର ଚଳିତମାସ ୨୧ରେ ପରଲୋକ ଘଟିଛି। ଆଜି ଭାଟିକାନ୍ ସିଟିରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ। କ୍ୟାଥୋଲିକ ଖ୍ରୀଷ୍ଟିଆନ ଧାର୍ମ ଗୁରୁ ପୋପ୍ ଫ୍ରାନ୍ସିସଙ୍କ ଅନ୍ତିମ ସଂସ୍କାରରେ ଯୋଗଦେବା ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭାଟିକାନରେ ପହଞ୍ଚିଛନ୍ତି। ସେଠାରେ ପହଞ୍ଚିବା ପରେ, ସେ ସେଣ୍ଟ ପିଟର୍ସ ବାସିଲିକାରେ ପୋପଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ରାଷ୍ଟ୍ରପତିଙ୍କ ସହିତ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ , ରାଜ୍ୟମନ୍ତ୍ରୀ ଜର୍ଜ କୁରିଏନ ଏବଂ ଗୋଆ ବିଧାନସଭାର ଉପବାଚସ୍ପତି ଜୋଶୁଆ ଡି’ସୁଜା ମଧ୍ୟ ଉପସ୍ଥିତ ଥିଲେ।
ରାଷ୍ଟ୍ରପତିଙ୍କ ଗସ୍ତ ବିଷୟରେ ସୂଚନା ଦେଇ ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଫଟୋ ସେୟାର କରି ଟ୍ୱିଟରରେ ଲେଖିଛନ୍ତି, ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭାଟିକାନ ସିଟିର ସେଣ୍ଟ ପିଟର୍ସ ବାସିଲିକାରେ ପରମ ପବିତ୍ର ପୋପ ଫ୍ରାନ୍ସିସଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ରାଷ୍ଟ୍ରପତି ମୁର୍ମୁ ଶୁକ୍ରବାର ହିଁ ରୋମରେ ପହଞ୍ଚିଥିଲେ ଏବଂ ଶନିବାର ପୋପ୍ ଫ୍ରାନ୍ସିସ୍ଙ୍କ ଅନ୍ତିମ ସଂସ୍କାରରେ ଯୋଗଦେବେ।
ସ୍ମାରକୀ ସେବା ପରେ, କାର୍ଡିନାଲ କେଭିନ ଫାରେଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମାରୋହରେ ପୋପ ଫ୍ରାନ୍ସିସ୍ଙ୍କ କଫିନକୁ ସିଲ୍ କରାଯାଇଥିଲା। ତାଙ୍କ ମୁହଁକୁ ତାଙ୍କର ଦୀର୍ଘ ସମୟର ସମାରୋହ ମାଷ୍ଟର, ଆର୍ଚବିଶପ ଡିଏଗୋ ରାଭେଲି ଘୋଡାଇ ଦେଇଥିଲେ। ଏହି ସମୟରେ କାର୍ଡିନାଲ କେଭିନ ଫାରେଲ ଶରୀରରେ ପବିତ୍ର ଜଳ ଛିଞ୍ଚିଥିଲେ। ପୋପଙ୍କ ଅନ୍ତିମ ସଂସ୍କାର ଆଜି ଅର୍ଥାତ୍ ୨୬ ଏପ୍ରିଲ ଅନୁଷ୍ଠିତ ହେବ। ଶେଷକୃତ୍ୟରେ ସାରା ବିଶ୍ୱରୁ ନେତା ଏବଂ ସାଧାରଣ ଲୋକ ଏକାଠି ହେବେ।
ସାରା ବିଶ୍ୱର ମହାନ ବ୍ୟକ୍ତିମାନେ ଏଥିରେ ସାମିଲ ହେବେ। ପୋପଙ୍କ ଅନ୍ତିମ ସଂସ୍କାର ଉତ୍ସବରେ ଯୋଗଦେବାକୁ ଥିବା ପ୍ରମୁଖ ନେତାମାନଙ୍କ ମଧ୍ୟରେ ଆମେରିକା ରାଷ୍ଟ୍ରପତି ଟ୍ରମ୍ପ ଏବଂ ତାଙ୍କ ପତ୍ନୀ ମେଲାନିଆ, ଫ୍ରାନ୍ସ ରାଷ୍ଟ୍ରପତି ମାକ୍ରନ, ଜର୍ମାନ ରାଷ୍ଟ୍ରପତି ଫ୍ରାଙ୍କ ଏବଂ ବିଦାୟୀ ଚାନ୍ସେଲର ଓଲାଫ୍ ସ୍କଲଜ୍, ରୁଷ ସଂସ୍କୃତି ମନ୍ତ୍ରୀ ଓଲଗା ଲୁବିମୋଭା ଏବଂ ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସକି ଏବଂ ତାଙ୍କ ପତ୍ନୀ ଓଲେନା ଜେଲେନ୍ସକା ପ୍ରମୁଖ ଅଛନ୍ତି। ପୋପ୍ ଦୀର୍ଘ ଦିନ ଧରି ଅସୁସ୍ଥ ଥିଲେ। ଫ୍ରାନ୍ସିସ୍ଙ୍କୁ ସମ୍ପ୍ରତି ନିମୋନିଆ ରୋଗରେ ପୀଡିତ ହୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା ଏବଂ ସେଠାରୁ ତାଙ୍କୁ ଡିସଚାର୍ଜ କରାଯାଇଥିଲା। ପ୍ରାୟ ଗୋଟିଏ ମାସ ପରେ ତାଙ୍କର ମୃତ୍ୟୁ ହେଲା।
Comments are closed.