ନୂଆଦିଲ୍ଲୀ: ଷ୍ଟାର୍ ୱିକେଟ୍ କିପର-ବ୍ୟାଟ୍ସମ୍ୟାନ ଋଷଭ ପନ୍ତ ନ୍ୟୁଜିଲାଣ୍ଡ ଏ ବିପକ୍ଷ ଅନଅଫିସିଆଲ ଟେଷ୍ଟ ମ୍ୟାଚ୍ରୁ ବାଦ ପଡ଼ିଛନ୍ତି । ତାଙ୍କ ସ୍ଥାନରେ ଇଣ୍ଡିଆ ଏ ଦଳରେ କୁମାର କୁଶାଗ୍ରଙ୍କୁ ସାମିଲ କରାଯାଇଛି । ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ ନ୍ୟୁଜିଲାଣ୍ଡ ଏ ବିପକ୍ଷ ତିନୋଟି ଅନଅଫିସିଆଲ ଟେଷ୍ଟ ମ୍ୟାଚ୍ ପାଇଁ ଇଣ୍ଡିଆ ଏ ସ୍କ୍ୱାଡ୍ରେ ଏକ ପରିବର୍ତ୍ତନ କରିଛି । ବିସିସିଆଇ ସୋମବାର ପନ୍ତଙ୍କ ସ୍ଥାନରେ ୨୧ ବର୍ଷୀୟ ୱିକେଟ୍ କିପର କୁମାର କୁଶାଗ୍ରଙ୍କୁ ଦଳରେ ସାମିଲ କରିଛି । କୁଶାଗ୍ରଙ୍କୁ ବର୍ତ୍ତମାନ ପାଇଁ ଦୁଇଟି ମ୍ୟାଚ୍ ପାଇଁ ଚୟନ କରାଯାଇଛି । ପନ୍ତ ତୃତୀୟ ମ୍ୟାଚ୍ ଖେଳିବେ କି ନାହିଁ, ସେନେଇ ନିଷ୍ପତ୍ତି ପରେ ନିଆଯିବ । କିଛି ଦିନ ପୂର୍ବେ ବିସିସିଆଇ ଯେତେବେଳେ ଏ ସ୍କ୍ୱାଡ୍ ଘୋଷଣା କରିଥିଲା, ସେତେବେଳେ କୁହାଯାଇଥିଲା ଯେ ପନ୍ତଙ୍କ ଖେଳିବା ତାଙ୍କ ଫିଟନେସ ଉପରେ ନିର୍ଭର କରିବ ।
୨୯ ବର୍ଷୀୟ ପନ୍ତ ସମ୍ପୂର୍ଣ୍ଣ ଫିଟ୍ ହୋଇପାରି ନାହାଁନ୍ତି । ବିସିସିଆଇ ଏକ ବିବୃତ୍ତିରେ କହିଛି, ନ୍ୟୁଜିଲାଣ୍ଡ ଗସ୍ତ ପାଇଁ ଇଣ୍ଡିଆ ଏରେ ଋଷଭ ପନ୍ତଙ୍କ ଉପଲବ୍ଧତା ଫିଟନେସ ଉପରେ ନିର୍ଭରଶୀଳ ଥିଲା । ସେ ପ୍ରାରମ୍ଭିକ ଦୁଇଟି ମ୍ୟାଚ୍ରୁ ବାଦ ପଡ଼ିଛନ୍ତି । ୱିକେଟ୍ କିପର-ବ୍ୟାଟ୍ସମ୍ୟାନ୍ ପନ୍ତଙ୍କୁ ଇରାନୀ କପ୍ରେ ରେଷ୍ଟ ଅଫ୍ ଇଣ୍ଡିଆର ଅଧିନାୟକତ୍ୱ କରିବା ସମୟରେ ବାମ ପାର୍ଶ୍ୱରେ ମାଂସପେଶୀ ଜନିତ ସମସ୍ୟା ଦେଖାଦେଇଥିଲା । ସେ ବର୍ତ୍ତମାନ ମଧ୍ୟ ବିସିସିଆଇ ମେଡିକାଲ୍ ଟିମ୍ର ନଜରରେ ଅଛନ୍ତି ଏବଂ ଭଲଭାବେ ସୁସ୍ଥ ହେଉଛନ୍ତି । ତୃତୀୟ ମ୍ୟାଚ୍ ପାଇଁ ତାଙ୍କ ଉପଲବ୍ଧତା ସମ୍ପର୍କରେ ପରେ ନିଷ୍ପତ୍ତି ନିଆଯିବ । ଇଣ୍ଡିଆ ଏର ଅଧିନାୟକତ୍ୱ ଧ୍ରୁବ ଜୁରେଲ୍ କରିବେ । ସେ ୱିକେଟ୍ କିପରିଂ ଦାୟିତ୍ୱ ମଧ୍ୟ ସମ୍ଭାଳିବେ ।
