ଇତିଶ୍ରୀ ମହାନ୍ତି
ଆସରେ ପିଲାଏ କୁନା, ମୁନା
ଶୁଣରେ ଦେଇ ମନ,
ବ୍ୟାୟାମ କଲେ କିପରି ଆମ
ଖୁସିରେ କଟେ ଦିନ ।
ଧନ ସମ୍ପଦ ମାନ ସମ୍ମାନ
ଥାଉନା କାହିଁ ଯେତେ,
ଶରୀର ଯଦି ନଲାଗେ ଭଲ
ସବୁରି ପିତା ସତେ ।
ଶରୀର ସୁସ୍ଥ ରହିବା ଲାଗି
ବ୍ୟାୟାମ ଆବଶ୍ୟକ,
ଅଳସୁଆ ସିନା ଦୁଃଖ ପାଏ
ଯାଏ ବଇଦ ପାଖ ।
ପ୍ରାତଃ ଭ୍ରମଣ ଖେଳ ଦଉଡ
ସନ୍ତରଣ କି ଯୋଗ,
ନିୟମିତ ଯେ କରିଲେ କେହି
ଛୁଇଁବ ନାହିଁ ରୋଗ ।
ରକ୍ତ ସଞ୍ଚାଳ ହୋଇବ ଭଲ
ବୋହିଲେ ଦେହୁ ଝାଳ,
ଚମକୁ ଥିବ ଶରୀର ତାର
ଜିଇଁବ ଯେତେ କାଳ ।
ପ୍ରଫୁଲ୍ଲ ମନ ତାର ଜୀବନ
ହୋଇବ ସ୍ୱାସ୍ଥ୍ୟବାନ,
ପାଠ ପଢ଼ାରେ ଲାଗିବ ମନ
ହେବସେ ବୁଦ୍ଧିମାନ ।
ସୁନା ପିଲାଟେ ପରିକେ ମତେ
କହିବ ସତ ସତ,
କାଲିଠୁ ବ୍ୟାୟାମ କରିବ କିଏ
ଆଗ ଟେକରେ ହାତ ।
ପାଇଲୋ, କେନ୍ଦ୍ରାପଡା