ଶାହିନବାଗ୍ ମାମଲା: ଚତୁର୍ଥ ଦିନରେ ମଧ୍ୟ ମଧ୍ୟସ୍ତି ଟିମର ହାତ ଖାଲି

ନୂଆଦିଲ୍ଲୀ: କେବେ ଖୋଲିବ ଶାହିନବାଗ ରାସ୍ତା । ସିଏଏ ଏବଂ ଏନଆରିସିକୁ ନେଇ ଶାହିନବାଗରେ ଆନ୍ଦୋଳନ ଜାରି ରହିଥିବା ବେଳେ ଏହାର ସମାଧାନ ପାଇଁ ସୁପ୍ରିମ୍ କୋର୍ଟଙ୍କ ପକ୍ଷରୁ ମଧ୍ୟସ୍ତି ଟିମ୍ ନିଯୁକ୍ତ କରାଯାଇଛି । ଲଗାତର ତିିନି ଦିନ ହେଲା ଆନ୍ଦୋଳନକାରୀଙ୍କ ସହ ମଧ୍ୟସ୍ତି ଟିମ ଆଲୋଚନା କରିିଥିଲେ ମଧ୍ୟ ଏହାର ସମାଧାନର ବାଟ ବାହାରି ପାରୁନାହିଁ ।
ଆଜି ଚତୁର୍ଥ ଦିନରେ ମଧ୍ୟସ୍ତି ଟିମ୍‌ର ସଦସ୍ୟ ସାଧନା ରାମଚନ୍ଦ୍ରନ ଆନ୍ଦୋଳନକାରୀଙ୍କ ସହ ସାକ୍ଷାତ କରି ଅଲୋଚନା କରିଛନ୍ତି । ରାସ୍ତା ଖୋଲିବାର ବାଟ ବାହାର କରିବା ପାଇଁ ଆନ୍ଦୋଳନକାରୀଙ୍କୁ ବୁଝାଇଛନ୍ତି । ତେବେ ଆନ୍ଦୋଳନକାରୀ ମଧ୍ୟସ୍ତି ଟିମଙ୍କ ପାଖରେ ଅନେକ ଦାବି ରଖିଛନ୍ତି । ପୋଲିସ ନୁହେଁ ସୁପ୍ରମକୋର୍ଟ ଲିଖିତ ଆକାରରେ ଆମକୁ ସୁରକ୍ଷା ପ୍ରତିଶୃତି ଦିଅନ୍ତୁ ବୋଲି ସେମାନେ ଦାବି କରିଛନ୍ତି । ଏଥିସହ ଶାହିନବାଗ ଏବଂ ଜାମିଆର ଲୋକଙ୍କ ବିରୋଧରେ ରୁଜୁ ହୋଇଥିବା ମାମଲା ଫେରାଇ ନିଆଯାଉ । କେବଳ ସେତିକି ନୁହେଁ ଯେଉଁମାନେ ଶାହିନବାଗର ଲୋକଙ୍କ ବିରୋଧରେ କହିଛନ୍ତି, ସେମାନଙ୍କ ଉପରେ କାର୍ଯ୍ୟାନୁଷ୍ଟାନ ଗ୍ରହଣ କରାଯାଉ ବୋଲି ଆନ୍ଦୋଳନକାରୀମାନେ ଦାବି କରିଛନ୍ତି ।
ଲଗାତର ଦୁଇ ମାସରୁ ଅଧିକ ଦିନ ହେଲା ଶାହିନବାଗରେ ସିଏଏକୁ ବିରୋଧ କରି ଆନ୍ଦୋଳନ ଜାରି ରହିଛି । ଏଥିଯୋଗୁଁ ଶାହିନବାଗ୍ ରାସ୍ତା ବନ୍ଦ ପଡ଼ିଛି । ଫଳରେ ଯାତାୟତ ସମ୍ପୂର୍ଣ୍ଣ ଠପ ହୋଇପଡିଛି । ଏନେଇ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ ।