ନୂଆଦିଲ୍ଲୀ/ଚେନ୍ନାଇ: ତାମିଲନାଡୁ ବିଧାନସଭା ନିର୍ବାଚନ ପରେ ସରକାର ଗଠନକୁ ନେଇ ସୃଷ୍ଟି ହୋଇଥିବା ଅଚଳାବସ୍ଥା ଏବେ ସୁପ୍ରିମକୋର୍ଟରେ ପହଞ୍ଚିଛି। ଅଭିନେତା ବିଜୟଙ୍କ ନୂତନ ଦଳ ତାମିଲଗା ଭେଟ୍ରି କାଝାଗମ୍ (TVK) ର ଜଣେ ସଦସ୍ୟା ସର୍ବୋଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଛନ୍ତି। ତାମିଲନାଡୁ ରାଜ୍ୟପାଳଙ୍କୁ ତୁରନ୍ତ ବିଜୟଙ୍କୁ ସରକାର ଗଠନ ପାଇଁ ନିମନ୍ତ୍ରଣ କରିବାକୁ ନିର୍ଦ୍ଦେଶ ଦେବା ପାଇଁ ଏହି ପିଟିସନରେ ଦାବି କରାଯାଇଛି।
ଟିଭିକେ (TVK) ସଦସ୍ୟା ତଥା ଆଡଭୋକେଟ୍ ଇଝିଲାରାସି ପି. ଏହି ଆବେଦନ କରିଛନ୍ତି। ତାଙ୍କ ଯୁକ୍ତି ଅନୁଯାୟୀ, ୨୦୨୬ ବିଧାନସଭା ନିର୍ବାଚନରେ ବିଜୟଙ୍କ ଦଳ ୧୦୮ଟି ଆସନ ଜିତି ସର୍ବବୃହତ ଏକକ ଦଳ (Single Largest Party) ଭାବେ ଉଭା ହୋଇଛି। ଏଥିସହିତ କଂଗ୍ରେସ ଏବଂ ବାମପନ୍ଥୀ ଦଳଗୁଡ଼ିକର ସମର୍ଥନ ପରେ ବିଜୟଙ୍କ ପାଖରେ ମୋଟ ୧୧୯ ଜଣ ବିଧାୟକଙ୍କ ସମର୍ଥନ ରହିଛି, ଯାହା ସରକାର ଗଠନ ପାଇଁ ଆବଶ୍ୟକ ୧୧୮ ବହୁମତ ସଂଖ୍ୟାରୁ ଅଧିକ।
ଆବେଦନକାରୀ ଦର୍ଶାଇଛନ୍ତି ଯେ, ସମସ୍ତ ଆବଶ୍ୟକୀୟ ଦଲିଲ ଏବଂ ସମର୍ଥନ ପତ୍ର ପ୍ରଦାନ କରାଯାଇଥିଲେ ସୁଦ୍ଧା ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଅର୍ଲେକର ବିଜୟଙ୍କୁ ଶପଥ ଗ୍ରହଣ ପାଇଁ ଡାକୁନାହାଁନ୍ତି। ଏହା ସାମ୍ବିଧାନିକ ନିୟମର ଉଲ୍ଲଂଘନ ବୋଲି ପିଟିସନରେ କୁହାଯାଇଛି।
ସୂଚନାଯୋଗ୍ୟ ଯେ, ଏହି ନିର୍ବାଚନରେ ଶାସକ ଡିଏମକେ (DMK) ଏବଂ ମୁଖ୍ୟ ବିରୋଧୀ ଏଆଇଏଡିଏମକେ (AIADMK) ବହୁମତ ପାଇବାରେ ବିଫଳ ହୋଇଛନ୍ତି। ବିଜୟଙ୍କ ଦଳ ସର୍ବାଧିକ ଆସନ ପାଇଥିବା ବେଳେ ତାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ତାଙ୍କ ସମର୍ଥକମାନେ ଉତ୍କଣ୍ଠାର ସହ ଅପେକ୍ଷା କରିଛନ୍ତି।
ଏବେ ସୁପ୍ରିମକୋର୍ଟ ଏହି ମାମଲାକୁ ଶୁଣାଣି ପାଇଁ ଗ୍ରହଣ କରୁଛନ୍ତି କି ନାହିଁ ଏବଂ ରାଜ୍ୟପାଳଙ୍କୁ କି ନିର୍ଦ୍ଦେଶ ଦେଉଛନ୍ତି, ତାହା ଉପରେ ସାରା ଦେଶର ନଜର ରହିଛି।
