ନୂଆପଡା ଜିଲ୍ଲା ବୋଡେନ ବ୍ଲକ ବୁଢାପଡା ସ୍କୁଲରେ ଛାତ୍ର ମୃତ୍ୟୁ ଘଟଣାରେ ଆକ୍ସନ । ଦୁଇ ଜଣ ଶିକ୍ଷକ ଓ ଦୁଇ ଜଣ ଶିକ୍ଷୟିତ୍ରୀଙ୍କୁ ନିଲମ୍ବିତ କରାଯାଇଛି । ଏହି ୪ ଜଣଙ୍କୁ ନିଲମ୍ବନ କରିଛନ୍ତି ବ୍ଲକ ଶିକ୍ଷା ଅଧିକାରୀ । ଗତକାଲି ସ୍କୁଲ ପାଖ ଏକ ନାଳରେ ବୁଡି ଜଣେ ତୃତୀୟ ଶ୍ରେଣୀ ଛାତ୍ରର ମୃତ୍ୟୁ ଘଟିଥିଲା । ଘଟଣା ଘଟିବା ପରେ ବିଦ୍ୟାଳୟରେ ଦୀର୍ଘ ୧୦ ଘଣ୍ଟା ଧରି ଉତ୍ତେଜନା ଲାଗି ରହିଥିଲା । ମୃତ ଛାତ୍ର ବୁଢାପଡାର କେଶବ ଜଗତ ବୋଲି ଜଣାପଡିଛି ।
ଗତକାଲି ମଧ୍ୟାହ୍ନ ଭୋଜନ କରିବା ପରେ କେଶବ ବାହାରେ ବୁଲାବୁଲି କରିବା ସମୟରେ କୁକୁର ମଳରେ ଗୋଡ ପକାଇଦେଇଥିଲା । ବିଦ୍ୟାଳୟର ଶିକ୍ଷକ ନଦୀରେ ଗୋଡ ଧୋଇ ଆସିବାକୁ କହିଥିଲେ । ପରେ କେଶବ ନଦୀକୁ ଯାଇ ସେଠାରେ ବୁଡି ଯାଇଥିଲା । ଖବର ପାଇ ଶିକ୍ଷକ ଜଣକ ଘଟଣାସ୍ଥଳକୁ ଯାଇଥିଲେ । ହେଲେ କେଶବକୁ ଉଦ୍ଧାର କରିନଥିଲେ । ଦୁଇ ଜଣ ଛାତ୍ରଙ୍କୁ ନିର୍ଦ୍ଦେଶ ଦେଇଥିଲେ । ହେଲେ ଏହାରି ମଧ୍ୟରେ କେଶବର ମୃତ୍ୟୁ ଘଟିଥିଲା । କେଶବର ପରିବାର ଲୋକେ ଏମିତି କିଛି ଅଭିଯୋଗ ଆଣିଥିବା ଜଣାପଡିଛି ।