ଆରା: ରବିବାର ପ୍ରତ୍ୟୁଷରେ ଦାନାପୁର ରେଳ ଡିଭିଜନ ଅନ୍ତର୍ଗତ ଆରା ଜଙ୍କସନରେ ଏକ ବଡ଼ ରେଳ ଦୁର୍ଘଟଣା ଘଟିଛି। ନୂଆ ଜଳପାଇଗୁଡ଼ିରୁ କଟିହାରର ଆରା ଜଙ୍କସନ ଦେଇ ନୂଆଦିଲ୍ଲୀ ଯାଉଥିବା ମହାନନ୍ଦ ଏକ୍ସପ୍ରେସର ଦୁଇ ରୁ ୩ଟି ବଗି ଲାଇନଚ୍ୟୁତ ହୋଇଥିବା କୁହାଯାଉଛି।
ଘଟଣାଟି ସକାଳ ପ୍ରାୟ ୪:୧୦ ସମୟରେ ଘଟିଥିବା ଜଣାପଡ଼ିଛି। ପ୍ରାଥମିକ ସୂଚନା ଅନୁଯାୟୀ, ଇଞ୍ଜିନ ସଂଲଗ୍ନ ଜେନେରାଲ କୋଚର ଦୁଇଟି ବଗି ଲାଇନଚ୍ୟୁତ ହୋଇଥିଲା।
ପୂର୍ବ କେନ୍ଦ୍ରୀୟ ରେଳବାଇର ସିପିଆରଓ ସରସ୍ୱତୀ ଚନ୍ଦ୍ର କହିଛନ୍ତି ଯେ ଏହି ଘଟଣାରେ କୌଣସି ମୃତାହତ ସୂଚନା ମିଳିନାହିଁ। ସକାଳ ୭:୨୩ ରେ ଟ୍ରେନ୍ ଗନ୍ତବ୍ୟସ୍ଥଳକୁ ଯାତ୍ରା କରିଥିଲା।
ଦୁର୍ଘଟଣା ଖବର ପାଇବା ପରେ ରେଳ ପ୍ରଶାସନ ପରିସ୍ଥିତିର ଆକଳନ କରିବା ପାଇଁ ରେଳ ଅଧିକାରୀ ଏବଂ ବୈଷୟିକ କର୍ମଚାରୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଦୁର୍ଘଟଣା ପରେ ଦିଲ୍ଲୀ-ହାୱଡା ମୁଖ୍ୟ ରେଳ ଲାଇନରେ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଛି। ଏନେଇ ରେଳବାଇ ମହାପ୍ରବନ୍ଧକ ଡିମ୍ପି ଗର୍ଗ ଏବଂ ଡିଆରଏମ ବିନୋଦ କୁମାରଙ୍କ ନିର୍ଦ୍ଦେଶରେ ଦୁର୍ଘଟଣାର ତଦନ୍ତ ଆରମ୍ଭ କରାଯାଇଛି। ବଗି ଲାଇନଚ୍ୟୁତ ହୋଇଥିବା ସ୍ଥାନରେ ତଦନ୍ତ ଚାଲିଛି। ରକ୍ଷଣାବେକ୍ଷଣଠାରୁ ଆରମ୍ଭ କରି ବୈଷୟିକ ଦିଗ ପର୍ଯ୍ୟନ୍ତ ସମସ୍ତ ଦିଗକୁ ନେଇ ଯାଞ୍ଚ କରାଯାଉଛି।
ଲାଇନଚ୍ୟୁତ ବଗିଗୁଡ଼ିକୁ ହଟାଇବା ଏବଂ ସ୍ୱାଭାବିକ ଟ୍ରେନ୍ ଚଳାଚଳକୁ ପୁନଃସ୍ଥାପିତ କରିବା ପାଇଁ ରେଳବାଇ ଉଦ୍ଧାର ଏବଂ ବୈଷୟିକ କାର୍ଯ୍ୟ ଆରମ୍ଭ କରିଛି। ସମ୍ପୃକ୍ତ ବିଭାଗର ଦଳଗୁଡ଼ିକ ଘଟଣାସ୍ଥଳରେ ପହଞ୍ଚି ଟ୍ରାକ୍ ଏବଂ ଲାଇନଚ୍ୟୁତ ଟ୍ରେନ୍ ର ତଦନ୍ତ କରୁଛନ୍ତି। ତେବେ କେଉଁ କାରଣରୁ ବଗି ଲାଇନଚ୍ୟୁତ ହେଲା ସେ ନେଇ ସ୍ପଷ୍ଟ ସୂଚନା ମିଳିନାହିଁ।