ଉମରକୋଟରେ ତିନି ଦିନିଆ ସଟଡାଉନ ଘୋଷଣା କଲେ ଜିଲ୍ଲା ପ୍ରଶାସନ

ନବରଙ୍ଗପୁର: ନବରଙ୍ଗପୁର ଜିଲ୍ଲା ପ୍ରଶାସନ ପକ୍ଷରୁ ଉମରକୋଟ୍ ବ୍ଲକରେ ତିନି ଦିନିଆ ସଟଡାଉନ ଘୋଷଣା କରାଯାଇଛି । ସ୍ଥାନୀୟ ଅଞ୍ଚଳର ଲୋକେ ସାମାଜିକ ଦୂରତା ନିୟମ ଉଲଂଘନ ସହ ମାସ୍କ ପିନ୍ଧି ନାଥିବା ପ୍ରଶାସନ ପକ୍ଷରୁ କୁହାଯାଇଛି । ଶୁକ୍ରବାର ମଧ୍ୟରାତ୍ରିରୁ ଏହି କଟକଣା ଲାଗୁ କରାଯାଇଛି ଏବଂ ରବିବାର ମଧ୍ୟରାତ୍ର (ଜୁନ୍ ୨୯) ପର୍ଯ୍ୟନ୍ତ ଏହା ବଳବତ୍ତର ରହିବ ବୋଲି ନବରଙ୍ଗପୁର ଜିଲ୍ଲାପାଳ ଅଜିତ କୁମାର ମିଶ୍ର ଏହି ସୂଚନା ଦେଇଛନ୍ତି। ଜିଲ୍ଲାପାଳ ଦେଇଥିବା ସୁଚନା ଅନୁସାରେ, ପ୍ରଶାସନ ଏହି ବନ୍ଦ ସମ୍ପର୍କରେ ଲୋକଙ୍କୁ ଅବଗତ କରାଇଛି ଏବଂ କର୍ଫ୍ୟୁ ଭାଙ୍ଗୁଥିବା ଲୋକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ। “ମେଡିକାଲ ଜରୁରୀକାଳୀନ ଏବଂ ଦୁଗ୍ଧ ବିକ୍ରିକୁ ଅନୁମତି ଦିଆଯିବ” ବୋଲି ଜିଲ୍ଲାପାଳ କହିଛନ୍ତି ।
ସଟଡାଉନ ସମୟରେ ବାହାରେ ବୁଲାବୁଲି ନକରିବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି । ଶୁକ୍ରବାର ଦିନ ନବରଙ୍ଗପୁର ଜିଲ୍ଲାରେ ଜଣେ କରୋନା ପଜିଟିଭ ଚିହ୍ନଟ ହୋଇଥିଲେ । ବର୍ତ୍ତମାନ ଏହି ଜିଲ୍ଲାରର ସାତଟି ସକ୍ରିୟ ମାମଲା ରହିଛି।