ଟ୍ରେନ୍ ନା ବିମାନ: ଭାରତରେ କେଉଁ ଯାତ୍ରା ଅଧିକ ସୁରକ୍ଷିତ? ଲୋକସଭା ରିପୋର୍ଟରୁ ଆସିଲା ବଡ଼ ତଥ୍ୟ
ନୂଆଦିଲ୍ଲୀ: ଦୂର ସ୍ଥାନକୁ ଯାତ୍ରା କରିବା ବେଳେ ସାଧାରଣତଃ ଯାତ୍ରୀମାନଙ୍କ ମନରେ ଏକ ବଡ଼ ପ୍ରଶ୍ନ ଉଠିଥାଏ ଯେ ଟ୍ରେନ୍ ନା ଫ୍ଲାଇଟ୍, କେଉଁଥିରେ ଯିବା ଅଧିକ ସୁରକ୍ଷିତ ହେବ? ଲୋକେ ସମୟ ବଞ୍ଚାଇବା ପାଇଁ ବିମାନ ଯାତ୍ରା କରୁଥିବା ବେଳେ ଆରାମଦାୟକ ଓ ଶସ୍ତା ଯାତ୍ରା ପାଇଁ ଟ୍ରେନ୍କୁ ବାଛିଥାନ୍ତି। କିନ୍ତୁ ସୁରକ୍ଷାକୁ ନେଇ ନିକଟରେ ଲୋକସଭାରେ ଉଡ୍ଡୟନ ଏବଂ ରେଳ ମନ୍ତ୍ରଣାଳୟ ଦ୍ୱାରା ଉପସ୍ଥାପିତ ହୋଇଥିବା ଆକଳନ ଏକ ସ୍ପଷ୍ଟ ଚିତ୍ର ପ୍ରଦାନ କରୁଛି।
ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟର ତଥ୍ୟ ଅନୁଯାୟୀ, ଗତ କିଛି ବର୍ଷ ମଧ୍ୟରେ ବିମାନଗୁଡ଼ିକରେ ବୈଷୟିକ ତ୍ରୁଟି ମାମଲା ଯଥେଷ୍ଟ ବୃଦ୍ଧି ପାଇଛି। ୨୦୨୧ ମସିହାରେ ମୋଟ ୫୧୪ଟି ତ୍ରୁଟି ରେକର୍ଡ କରାଯାଇଥିବା ବେଳେ, ୨୦୨୫ ମସିହାରେ ଏହା ୮୮୯ରେ ପହଞ୍ଚିଛି। ସେହିପରି ୨୦୨୫ ଏବଂ ୨୦୨୬ (ଏପ୍ରିଲ୍ ସୁଦ୍ଧା) ରେ ମୋଟ ୧୬ଟି ବିମାନ ଦୁର୍ଘଟଣାଗ୍ରସ୍ତ ହୋଇଥିବା ବେଳେ ଏଥିରୁ ୮ଟି ଘଟଣା ପ୍ରାଣଘାତୀ ଥିଲା।
ଅନ୍ୟପକ୍ଷରେ ଭାରତୀୟ ରେଳବାଇ ନିଜର ସୁରକ୍ଷା ବ୍ୟବସ୍ଥାରେ ବ୍ୟାପକ ସୁଧାର ଆଣିଥିବା ଦେଖିବାକୁ ମିଳିଛି। ୨୦୧୪-୧୫ ବର୍ଷରେ ଦେଶରେ ୧୩୫ଟି ରେଳ ଦୁର୍ଘଟଣା ଘଟିଥିବା ବେଳେ ୨୦୨୫-୨୬ ସୁଦ୍ଧା ଏହା ୮୮ ପ୍ରତିଶତ ହ୍ରାସ ପାଇ ମାତ୍ର ୧୬ରେ ସୀମିତ ରହିଛି। ରେଳବାଇ ସୁରକ୍ଷା ପ୍ରତି କେତେ ଗମ୍ଭୀର, ତାହା ବଜେଟ୍ରୁ ହିଁ ଜଣାପଡୁଛି। ସୁରକ୍ଷା ବାବଦ ଖର୍ଚ୍ଚକୁ ୨୦୧୩-୧୪ର ୩୯,୪୬୩ କୋଟି ଟଙ୍କାରୁ ବୃଦ୍ଧି କରି ୨୦୨୬-୨୭ ପାଇଁ ୧,୨୦,୩୮୯ କୋଟି ଟଙ୍କା କରାଯାଇଛି। ଏହା ସହିତ ଦୁର୍ଘଟଣା ରୋକିବା ପାଇଁ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ଆଣ୍ଟି-କୋଲିଜନ୍ ସିଷ୍ଟମ୍ ‘କବଚ’ର ସମ୍ପ୍ରସାରଣ ଦ୍ରୁତ ଗତିରେ ଚାଲିଛି।
ମୋଟାମୋଟି ଭାବେ ଦେଖିଲେ ରେଳବାଇ ପକ୍ଷରୁ ଭିତ୍ତିଭୂମି ବିକାଶ ଏବଂ ଟ୍ରାକ୍ର ସୁରକ୍ଷା ପାଇଁ କରାଯାଉଥିବା ନିରନ୍ତର ପ୍ରୟାସ ବେଶ୍ ଫଳପ୍ରଦ ହୋଇଛି। ଅନ୍ୟପଟେ ବିମାନ କ୍ଷେତ୍ରରେ ବୈଷୟିକ ତ୍ରୁଟି ବଢ଼ିବାର ଅର୍ଥ ନୁହେଁ ଯେ ବିମାନ ଯାତ୍ରା ଅସୁରକ୍ଷିତ; ବରଂ ଡିଜିସିଏର କଡ଼ା ନଜରଦାରୀ ଓ ଅଡିଟ୍ ଯୋଗୁଁ ଛୋଟବଡ଼ ସବୁ ତ୍ରୁଟିକୁ ଗମ୍ଭୀରତାର ସହ ନିଆଯାଉଛି। ଏଣୁ ଉଭୟ ବିଭାଗ ନିଜ ନିଜ ସ୍ତରରେ ଯାତ୍ରୀଙ୍କ ନିରାପଦ ଯାତ୍ରା ପାଇଁ ଉଦ୍ୟମ ଜାରି ରଖିଛନ୍ତି।
