ଭୁବନେଶ୍ୱର: ଯକ୍ଷ୍ମା ରୋଗ ଏବେ ମଧ୍ୟ ଏକ ସମସ୍ୟା ହୋଇ ରହିଛି । ଏହା ଆମ ପାଇଁ ଏକ ବଡ଼ ଆହ୍ୱାନ ଏବଂ ଏହାକୁ ସ୍ୱୀକାର କରି ଯକ୍ଷ୍ମା ନିରାକରଣ ଦିଗରେ କାର୍ଯ୍ୟ କରିବାକୁ ପଡ଼ିବ ବୋଲି ଓଡ଼ିଶାର ସରକାରଙ୍କ ଡାଇରେକ୍ଟର ଅଫ୍ ମେଡିକାଲ୍ ଏଜୁକେସନ୍ ଆଣ୍ଡ ଟ୍ରେନିଙ୍ଗ୍ (ଡିଏମ୍ଇଟି) ପ୍ରଫେସର (ଡାକ୍ତର) ସଚିଦାନନ୍ଦ ମହାନ୍ତି କହିଛନ୍ତି ।
ଦେଶରେ ଯକ୍ଷ୍ମା ଭଳି ବ୍ୟାଧିକୁ ୨୦୨୫ ସୁଦ୍ଧା ସମ୍ପୂର୍ଣ୍ଣ ମୁଳୋତ୍ପାଟନ କରିବା ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନ ପରିପ୍ରେକ୍ଷୀରେ ପୂର୍ବାଂଚଳ ନିମନ୍ତେ ଜାତୀୟ ଟିବି ନିରାକରଣ କାର୍ଯ୍ୟକ୍ରମର ଦୁଇ ଦିନିଆ ଜୋନାଲ୍ ଟାସ୍କଫୋର୍ସ ବୈଠକ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ରେ ଗୁରୁବାର ଆରମ୍ଭ ହୋଇଛି । ଏହାର ଉଦ୍ଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ପ୍ରଫେସର ମହାନ୍ତି ଏଭଳି ବୈଠକକୁ ସ୍ୱାଗତ କରିବା ସହ ପୂର୍ବାଂଚଳରେ ଟିବି ରୋଗୀଙ୍କ ଚିହ୍ନଟ ସଂଖ୍ୟା ଖୁବ୍ କମ୍ ରହିଛି ତଥା ନିରାକରଣ ନିମନ୍ତେ ଅଧିକ ପ୍ରଚେଷ୍ଟା ଆବଶ୍ୟକ ବୋଲି ମତ ପ୍ରକାଶ କରିଥିଲେ ।
ଉତ୍ତମ ଭିତିଭୂମୀ, ଯକ୍ଷ୍ମା ରୋଗୀଙ୍କ ଚିହ୍ନଟ ଓ ପରୀକ୍ଷଣ ବ୍ୟବସ୍ଥା, ବିଶେଷଜ୍ଞଙ୍କ ଦ୍ୱାରା ଉତମ ଚିକିତ୍ସା ଉପଲବ୍ଧ ହେଲେ ହିଁ ପୂର୍ବାଂଚଳ ଟିବିମୁକ୍ତ ହୋଇପାରିବ ବୋଲି ସେ ଏହି ଅବସରରେ କହିଛନ୍ତି । ତେବେ ରାଜ୍ୟରେ ଅନେକ କ୍ଷେତ୍ରରେ ଟିବି ରୋଗୀଙ୍କ ଚିହ୍ନଟକୁ ନେଇ ଭୁଲ ତଥ୍ୟ ଆସିବା ଓ ଲୋକେ ଟିବି ରୋଗୀଙ୍କ ୱାର୍ଡକୁ ଯିବା ପାଇଁ ଅନିଚ୍ଛା ପ୍ରକାଶ କରିବା ନିରାକରଣ କ୍ଷେତ୍ରରେ ବାଧା ସୃଷ୍ଟି କରୁଛି ବୋଲି ସେ କହିଥିଲେ ।
ଏହି ଅବସରରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର ପୁଷ୍ପରାଜ ସାମନ୍ତସିଂହାର ହସ୍ପିଟାଲ୍ରେ ଯକ୍ଷ୍ମାରୋଗକୁ ନେଇ ଅଧିକ ଯତ୍ନ ନିଆଯାଉଥିବା କହିଛନ୍ତି । ସାଧାରଣତଃ ରୋଗୀଙ୍କ ଛାତିରେ ଉପୁଜୁଥିବା ଯକ୍ଷ୍ମା ରୋଗର ହିଁ ଚିକିତ୍ସା କରାଯାଇଥାଏ । ମାତ୍ର ଛାତି ବ୍ୟତୀତ ମସ୍ତିଷ୍କ, ହାଡ଼, ପେଟ ଏବଂ ଶରୀରର ଅନ୍ୟାନ୍ୟ ଅଂଗରେ ମଧ୍ୟ ଯକ୍ଷ୍ମା ରୋଗ ଦେଖାଯାଇଥାଏ ।
ଏହାକୁ ଏକ୍ସଟ୍ରା ପଲ୍ମୋନାରୀ ଟିବି କେସେସ୍ ବୋଲି କୁହାଯାଇଥାଏ । ତେବେ ସମ୍ ହସ୍ପିଟାଲ୍ରେ ଥିବା ମଲ୍ଟି ସ୍ପେଶିଆଲିଟି ଡିପାର୍ଟମେଂଟ ଓ ବିଶେଷଜ୍ଞ ଡାକ୍ତରଙ୍କ ଉପଲବ୍ଧି ଯୋଗୁଁ ଏକ୍ସଟ୍ରା ପଲ୍ମୋନାରୀ ଟିବି ରୋଗୀଙ୍କ ଚିହ୍ନଟ ଓ ଚିକିତ୍ସା ମଧ୍ୟ ହୋଇପାରୁଛି ବୋଲି ସେ କହିଥିଲେ । ଓଡ଼ିଶାରେ ଏଭଳି ରୋଗୀଙ୍କ ଚିହ୍ନଟ ପ୍ରକ୍ରିୟାରେ ସମ୍ ହସ୍ପିଟାଲ୍ ସର୍ବାଗ୍ରେ ରହିଛି ବୋଲି ପ୍ରଫେସର ସାମନ୍ତସିଂହାର କହିଥିଲେ ।
ଏହି କାର୍ଯ୍ୟକ୍ରମରେ ପୂର୍ବାଂଚଳର ଜୋନାଲ୍ ଟାସ୍କଫୋର୍ସର ଅଧ୍ୟକ୍ଷ ଡାକ୍ତର ଏସ୍.କେ. ସାହି ଅତିଥିମାନଙ୍କୁ ସ୍ୱାଗତ କରିବା ସହ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ୨୦୨୫ ସୁଦ୍ଧା ଭାରତକୁ ଟିବିମୁକ୍ତ କରିବା ଲକ୍ଷ୍ୟରେ କାର୍ଯ୍ୟ କରିବାକୁ ପଡ଼ିବ ବୋଲି କହିଥିଲେ ।
ସେହିପରି ଓଡ଼ିଶାର ସ୍ପେଶାଲ ଟାସ୍କ ଅଫିସର ଡାକ୍ତର ପ୍ରଶାନ୍ତ କୁମାର ହୋତା କାର୍ଯ୍ୟକ୍ରମରେ ଯୋଗ ଦେଇ ଟିବି ନିରାକରଣ ଦିଗରେ ମେଡିକାଲ୍ କଲେଜଗୁଡ଼ିକ ପଦକ୍ଷେପ ନେବା ଉଚିତ୍ ବୋଲି କହିବା ସହ ଏଦିଗରେ ଜିଲ୍ଲା ପ୍ରଶାସନ ଓ ମେଡିକାଲ୍ କଲେଜଗୁଡ଼ିକ ମଧ୍ୟରେ ସମନ୍ୱୟ ରକ୍ଷା କରିବାର ଆବଶ୍ୟକତା ଅଛି ବୋଲି କହିଥିଲେ ।
କାର୍ଯ୍ୟକ୍ରମରେ ନ୍ୟାସ୍ନାଲ୍ ଟାସ୍କଫୋର୍ସର ଅଧ୍ୟକ୍ଷ ଡାକ୍ତର ଅଶୋକ ଭରଦ୍ୱାଜ ଯୋଗ ଦେଇ କହିଥିଲେ ଯେ ୨୦୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟିବିମୁକ୍ତ ଭାରତର ଆହ୍ୱାନ ଦେଇଥିବା ବେଳେ ୨୦୨୩ରେ ସେ ଏହି କାର୍ଯ୍ୟକ୍ରମର ଅନୁଧ୍ୟାନ କରିଥିଲେ ଏବଂ ୨୦୨୫ ସୁଦ୍ଧା ଏହାକୁ କାର୍ଯ୍ୟକ୍ଷମ କରିବାକୁ ଆହ୍ୱାନ ଦେଇଥିଲେ । ଏଥି ନିମନ୍ତେ ଆମକୁ ଏକତ୍ରିତ ହୋଇ କାର୍ଯ୍ୟ କରିବାକୁ ପଡ଼ିବ । ଦେଶରେ ପୂର୍ବାଂଚଳ ଟିବି ଚିହ୍ନଟ ଓ ନିରାକରଣ ଦିଗରେ ପଛୁଆ ଥିବାବେଳେ ଏ ଦିଗରେ ଅଧିକ ତ୍ୱରାନ୍ୱିତ ହୋଇ କାର୍ଯ୍ୟ କରିବାକୁ ପଡ଼ିବ ବୋଲି ସେ କହିଥିଲେ ।
ରାଜ୍ୟ ଟାସ୍କଫୋର୍ସର କାର୍ଯ୍ୟଧାରାକୁ ଅନୁଧ୍ୟାନ କରିବା, ଅଧିକ ରୋଗୀ କିଭଳି ଚିକିତ୍ସା ପାଇଁ ଆସିବେ ସେ ବିଷୟରେ ପଦକ୍ଷେପ ନେବା, ଏଲ୍ଟିବିଆଇ ମ୍ୟାନେଜମେଂଟ ଭଳି ନୂତନ ନିୟମକୁ ଲାଗୁ କରିବା ଏବଂ ଜନସ୍ୱାସ୍ଥ୍ୟ କେନ୍ଦ୍ର ଏବଂ ମେଡିକାଲ୍ କଲେଜଗୁଡ଼ିକ ମଧ୍ୟରେ ଟିବି ରୋଗୀଙ୍କ ଚିହ୍ନଟ ଏବଂ ଚିକିତ୍ସା ନେଇ ସମନ୍ୱୟ ରଖିବା ଏହି ଦୁଇ ଦିନିଆ ବୈଠକର ମୁଖ୍ୟ ଉଦ୍ଦେଶ୍ୟ ବୋଲି ଏହି ଅବସରରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ପଲ୍ମୋନାରୀ ମେଡିସିନ୍ ବିଭାଗର ମୁଖ୍ୟ ପ୍ରଫେସର ବନାନୀ ଜେନା କହିଥିଲେ ।
କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ପ୍ରଧାନମନ୍ତ୍ରୀ ଟିବିମୁକ୍ତ ଭାରତ ଅଭିଯାନ କାର୍ଯ୍ୟକ୍ରମ ପରିପ୍ରେକ୍ଷୀରେ ଟିବିର ମୂଳୋତ୍ପାଟନ ନେଇ ଅନେକ କାର୍ଯ୍ୟ ଜାରି ରହିଥିବା ପ୍ରଫେସର ଜେନା କହିଥିଲେ । ସେହିପରି କାର୍ଯ୍ୟକ୍ରମରେ ସିଟିଡିର ଆଡିସ୍ନାଲ ଡିଜି ଡାକ୍ତର ସଞ୍ଜୟ ମାଟୁ ମଧ୍ୟ ବକ୍ତବ୍ୟ ରଖିଥିଲେ ।
ଉଦ୍ଘାଟନୀ କାର୍ଯ୍ୟକ୍ରମ ଶେଷରେ ସ୍ପେଶାଲ୍ ଟାସ୍କଫୋର୍ସ, ଓଡ଼ିଶାର ଅଧ୍ୟକ୍ଷ ଡାକ୍ତର ମନୋରଞ୍ଜନ ପଟ୍ଟନାୟକ ଟିବିମୁକ୍ତ ଭାରତ କାର୍ଯ୍ୟକ୍ରମରେ ଗଣମାଧ୍ୟମର ଅନେକ ଭୂମିକା ରହିଛି ବୋଲି କହିବା ସହ ଧନ୍ୟବାଦ ଅର୍ପଣ କରିଥିଲେ ।
ଏହି ବୈଠକଟି ସେଂଟ୍ରାଲ୍ ଟିବି ଡିରେକ୍ଟରେଟ, ଜୋନାଲ୍ ଟାସ୍କଫୋର୍ସ (ପୂର୍ବାଂଚଳ), ସ୍ପେଶାଲ୍ ଟାସ୍କ ସର୍କଲ୍ ଓଡ଼ିଶା, ସ୍ପେଶାଲ ଟାସ୍କଫୋର୍ସ ଓଡ଼ିଶା ଓ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ ପକ୍ଷରୁ ମିଳିତ ଭାବେ ଆୟୋଜନ କରାଯାଇଛି ।