ଓଡ଼ିଶା ସମ୍ବାଦ ବ୍ୟୁରୋ: ଆପ୍ ଆଧାରିତ କ୍ୟାବ ସେବାରେ ବେଳେ ବେଳେ ଭୁଲ ବିଲ୍ ଆସିଯାଏ। ଏପରି ମାମଲା ସୋସିଆଲ ମିଡିଆରେ ପ୍ରାୟତଃ ସାମ୍ନାକୁ ଆସିଥାଏ। ନିକଟରେ ସମାନ ମାମଲାର ଏକ ଉଦାହରଣ ଦେଖିବାକୁ ମିଳିଛି। ଜଣେ ବ୍ୟକ୍ତିଙ୍କୁ ୧୫ ମିନିଟ୍ ଯାତ୍ରା କରିବା ମହଙ୍ଗା ପଡିଥିଲା। ବ୍ୟକ୍ତିଙ୍କ ୧୫ ମିନିଟ୍ ଯାତ୍ରାରେ ଯେତେ ଟଙ୍କାର ବିଲ ଆସିଲା ତାହା କଳ୍ପନା କରିବା ଅସମ୍ଭବ। ଯାତ୍ରୀଙ୍କ ନାମରେ ୧୦୦ କିମ୍ବା ୨୦୦ ଟଙ୍କା ନୁହେଁ ବରଂ ୩୨ ଲକ୍ଷ ଟଙ୍କାର ବିଲ୍ ଆସିଥିଲା।
ନ୍ୟୁୟର୍କ ପୋଷ୍ଟରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଜଣେ ବ୍ରିଟିଶ ବ୍ୟକ୍ତି ତାଙ୍କ ବ୍ୟାଙ୍କ ଆକାଉଣ୍ଟ ଯାଞ୍ଚ କରିବା ବେଳେ ତାଙ୍କର ପାଦ ତଳେ ଜମି ଖସିଗଲା ଭଳି ମନେ ହେଲା। ସେ ଦେଖିବାକୁ ପାଇଲେ ଯେ ଉବର କ୍ୟାବ ମାତ୍ର ୧୫ ମିନିଟର ଯାତ୍ରା ପାଇଁ ପ୍ରାୟ ୩୯,୩୧୭ ଡଲାର୍ ବା ପ୍ରାୟ ୩୨ ଲକ୍ଷ ଟଙ୍କା ଚାର୍ଜ କରିଛି। ଏହି ଘଟଣାଟି ହେଉଛି ବ୍ରିଟେନର। ଏଠାରେ ରହୁଥିବା ୨୨ ବର୍ଷିୟ ଅଲିଭର କପ୍ଲାନ ଅଫିସରୁ ତାଙ୍କ ସାଙ୍ଗମାନଙ୍କ ପାଖକୁ ଯିବା ପାଇଁ କିଛି ଦିନ ପୂର୍ବରୁ ଏକ ଉବର କ୍ୟାବ ବୁକ୍ କରିଥିଲେ। ତାଙ୍କ କାର୍ଯ୍ୟାଳୟରୁ ସେହି ସ୍ଥାନର ଦୂରତା ମାତ୍ର ୧୫ ମିନିଟ୍ ଥିଲା। ଏହି ସମୟରେ ସେ ଏକ କ୍ୟାବରେ ବସିବା ପରେ ନିଜ ଗନ୍ତବ୍ୟ ସ୍ଥଳକୁ ଚାଲିଗଲେ। ସେଠାରେ ପହଞ୍ଚିବା ପରେ ସେ ଅନଲାଇନରେ ବିଲ୍ ପୈଠ କରିଥିଲେ। ପରଦିନ ସକାଳେ ଉଠିବା ପରେ ଯେତେବେଳେ ସେ ତାଙ୍କର କ୍ରେଡିଟ୍ କାର୍ଡ ବିଲ୍ ଯାଞ୍ଚ କଲେ, ସେତେବେଳେ ସେ ଆଶ୍ଚର୍ଯ୍ୟ ହୋଇପଡିଲେ।
ଉବର ତାଙ୍କ କ୍ରେଡିଟ କାର୍ଡ ବିଲରେ ସେହି କ୍ୟାବ ବୁକିଂ କରିବା ପାଇଁ ତାଙ୍କଠାରୁ ୩୨ ଲକ୍ଷ ଟଙ୍କା ଆଦାୟ କରିଥିଲେ। ରିପୋର୍ଟ ଅନୁଯାୟୀ, ଅଲିଭର ନିଜର ଗନ୍ତବ୍ୟ ସ୍ଥଳକୁ ଯିବା ପାଇଁ ବ୍ରିଟେନର ମୈଞ୍ଚେଷ୍ଟର ସ୍ଥାନ ପରିବର୍ତ୍ତେ ଭୁଲରେ ଅଷ୍ଟ୍ରେଲିଆର ମଞ୍ଚେଷ୍ଟର ସ୍ଥାନ ଚୟନ କରିଦେଇଥିଲେ। ଅଷ୍ଟ୍ରେଲିଆର ଦୂରତା ଅନୁଯାୟୀ ଉବର ୩୨ ଲକ୍ଷ ଟଙ୍କାର ବିଲ୍ ତିଆରି କଲା। ତେବେ ବିଲ ଦେଖିବା ପରେ ଓଲିଭର ତୁରନ୍ତ କମ୍ପାନୀର ଗ୍ରାହକଙ୍କ ସହ ଯୋଗାଯୋଗ କରିଥିଲେ ଏବଂ ତାଙ୍କର ସମସ୍ୟାର ସମାଧାନ ହୋଇଥିଲା। ଏହି ବିଲ୍ ସଂଶୋଧନ କରିବାବେଳେ କମ୍ପାନୀ ପରେ ତାଙ୍କୁ ସଠିକ୍ ବିଲ୍ ପଠାଇଥିଲା ଯାହା ୯୦୦ ଟଙ୍କା ଥିଲା।