ଗୁପ୍ତ ଗର୍ଭବସ୍ଥା କ’ଣ?, କାହିଁକି ଗର୍ଭବତୀ ମହିଳାଙ୍କଠାରେ ନଥାଏ କୌଣସି ଲକ୍ଷଣ….

ଭୁବନେଶ୍ବର: ଗର୍ଭଧାରଣର ଅଭିଜ୍ଞତା ପ୍ରତ୍ୟେକ ମହିଳାଙ୍କ ପାଇଁ ବହୁତ ଖାସ୍ ହୋଇଥାଏ । କିନ୍ତୁ କ’ଣ ଏମିତି କେବେ ହୁଏ କି, ଯେତେବେଳେ ଜଣେ ମହିଳା ଗର୍ଭବତୀ ଥିବେ, ଆଉ ନିଜେ ଏହା ବିଷୟରେ ଆଭାସ ବି ପାଇନଥିବେ? ଏହା ଆଶ୍ଚର୍ଯ୍ୟଜନକ ନୁହେଁ କି? କିନ୍ତୁ ଏବେ ବିଶ୍ୱରେ ଏପରି ଅନେକ ଘଟଣା ଘଟିଛି ଯେଉଁଠାରେ ମହିଳାମାନେ ଜାଣି ହିଁ ନଥିଲେ ଯେ ସେ ଗର୍ଭବତୀ ଅଛନ୍ତି କିମ୍ବା ସେମାନଙ୍କୁ ବହୁତ ଡେରିରେ ଏହା ଜଣାପଡିଥାଏ । ଏହାକୁ ଡାକ୍ତରୀ ଭାଷାରେ କ୍ରିପଟିକ୍ ପ୍ରେଗ୍ନେନ୍ସି କିମ୍ବା ଗୁପ୍ତ ଗର୍ଭଧାରଣ ମଧ୍ୟ କୁହାଯାଏ । ଏହା ଏପରି ଏକ ଅବସ୍ଥା ଯେଉଁଥିରେ ମହିଳାଙ୍କଠାରେ ଗର୍ଭଧାରଣର କୌଣସି ଲକ୍ଷଣ ଦେଖାଯାଏ ନାହିଁ ।

ତେବେ ସାଧାରଣତଃ ମହିଳାମାନେ ଗର୍ଭବତୀ ହେଲେ, ୪ ରୁ ୧୨ ସପ୍ତାହ ମଧ୍ୟରେ ଗର୍ଭଧାରଣ ଅନୁଭବ କରନ୍ତି । କିନ୍ତୁ ଗୁପ୍ତ ଗର୍ଭଧାରଣରେ ମହିଳା ଗର୍ଭଧାରଣର କୌଣସି ଅନୁଭବ କରନ୍ତି ନାହିଁ । ଏମିତିକି କେତେକ ସମୟରେ ଜଣେ ମହିଳା ପ୍ରସବ ଯନ୍ତ୍ରଣା ଆରମ୍ଭ ହେବା ପର୍ଯ୍ୟନ୍ତ ଜାଣିପାରନ୍ତି ନାହିଁ ଯେ ସେ ଗର୍ଭବତୀ ଅଛନ୍ତି । ତେବେ ଗୁପ୍ତ ଗର୍ଭଧାରଣ ସାଧାରଣ ଗର୍ଭଧାରଣଠାରୁ ଭିନ୍ନ କାରଣ ଏଥିରେ ଗର୍ଭଧାରଣର ସାଧାରଣ ଲକ୍ଷଣ, ଯେପରିକି ଋତୁସ୍ରାବ ବନ୍ଦ ହେବା, ପେଟ ବଢ଼ିବା କିମ୍ବା ଗର୍ଭଧାରଣ ପରୀକ୍ଷାରେ ସକାରାତ୍ମକ ଫଳାଫଳ ବହୁତ ହାଲୁକା ଜଣାପଡେ କିମ୍ବା ଲକ୍ଷଣ ଜଣା ହିଁ ପଡେ ନାହିଁ ।

ଗୁପ୍ତ ଗର୍ଭଧାରଣର ଅନେକ କାରଣ ହୋଇପାରେ, କିନ୍ତୁ ସବୁଠାରୁ ବଡ଼ କାରଣ PCOD କିମ୍ବା PCOS ରୋଗ ହୋଇପାରେ। ଏପରି ମହିଳାଙ୍କର ନିୟମିତ ଋତୁସ୍ରାବ ହୁଏ ନାହିଁ କିମ୍ବା ସେମାନଙ୍କର ଋତୁସ୍ରାବ ଦୁଇରୁ ତିନି ମାସ ବିଳମ୍ବ ହୁଏ। ଏହି ପରିସ୍ଥିତିରେ, ଏପରି ମହିଳାମାନେ ଏହାକୁ ଏକ ସାଧାରଣ ସମସ୍ୟା ଭାବି ଅଣଦେଖା କରନ୍ତି। କିଛି ମହିଳାଙ୍କର HCG (ହ୍ୟୁମାନ୍ କୋରିଓନିକ୍ ଗୋନାଡୋଟ୍ରୋପିନ୍) ହରମୋନର ସ୍ତର କମ୍ ଥାଏ, ଯାହା ଗର୍ଭଧାରଣ ପରୀକ୍ଷାକୁ ପ୍ରଭାବିତ କରେ। ଏହି କାରଣରୁ, ପରୀକ୍ଷା ନେଗେଟିଭ୍ ରହୁଥିବାରୁ ମହିଳା ଜାଣିପାରନ୍ତି ନାହିଁ ଯେ ସେ ଗର୍ଭବତୀ ଅଛନ୍ତି। କେତେକ ସମୟରେ ୪୦ ବର୍ଷ ବୟସ ପରେ, ମହିଳାଙ୍କଠାରେ ମେନୋପଜର ଲକ୍ଷଣ ଆରମ୍ଭ ହୁଏ, ଏପରି ପରିସ୍ଥିତିରେ ମହିଳାମାନେ ସନ୍ଦେହରେ ରୁହନ୍ତି ଯେ ଏହି ବୟସରେ ଗର୍ଭଧାରଣ ସମ୍ଭବ ନୁହେଁ, କିନ୍ତୁ ସେମାନେ ଗର୍ଭଧାରଣ କରନ୍ତି ।