ନୂଆଦିଲ୍ଲୀ: ଡିଜିଟାଲ୍ ଯୁଗରେ ସ୍ମାର୍ଟଫୋନ୍ ଆମ ଦୈନନ୍ଦିନ ଜୀବନର ଏକ ଅବିଚ୍ଛେଦ୍ୟ ଅଙ୍ଗ ପାଲଟିଛି । ଆଉ ଯେତେବେଳେ ସ୍ମାର୍ଟଫୋନ୍ କଥା ଉଠେ, ସେତେବେଳେ ଆଣ୍ଡ୍ରଏଡ୍ ଏବଂ ଏହାର ‘ସବୁଜ ରୋବଟ୍’ ଲୋଗୋ ଆମ ଆଖି ସାମ୍ନାକୁ ଆସିଯାଏ। କିନ୍ତୁ ଆପଣ କେବେ ଭାବିଛନ୍ତି କି, ବିଶ୍ୱର ଏହି ଲୋକପ୍ରିୟ ଅପରେଟିଂ ସିଷ୍ଟମ୍ର ଲୋଗୋ କାହିଁକି ଏକ ସବୁଜ ରଙ୍ଗର ରୋବଟ୍ ହୋଇଛି? ଏହା ପଛରେ ଏକ ଅତ୍ୟନ୍ତ ରୋଚକ କାହାଣୀ ଲୁଚି ରହିଛି ।
୨୦୦୭ ମସିହାର କଥା। ଗୁଗଲ୍ ଯେତେବେଳେ ନିଜର ଆଣ୍ଡ୍ରଏଡ୍ ଅପରେଟିଂ ସିଷ୍ଟମ୍ ବଜାରକୁ ଆଣିବାକୁ ପ୍ରସ୍ତୁତି ଚଳାଇଥିଲା, ସେତେବେଳେ ଏହା ପାଇଁ ଏକ ସ୍ୱତନ୍ତ୍ର ଏବଂ ଆକର୍ଷଣୀୟ ଲୋଗୋର ଆବଶ୍ୟକତା ପଡ଼ିଥିଲା। ଏହି ଗୁରୁଦାୟିତ୍ୱ ଗୁଗଲର ଗ୍ରାଫିକ୍ ଡିଜାଇନର୍ ଇରିନା ବ୍ଲକ୍ ଏବଂ ତାଙ୍କ ଟିମ୍କୁ ଦିଆଯାଇଥିଲା। ସେମାନଙ୍କୁ କେବଳ ଗୋଟିଏ ସର୍ତ୍ତ ଦିଆଯାଇଥିଲା ଯେ, ‘ଲୋଗୋରେ ଏକ ରୋବଟ୍ ରହିବା ଆବଶ୍ୟକ’ ।
ଇରିନା ଏହି ଲୋଗୋ ଡିଜାଇନ୍ କରିବା ପାଇଁ ଅନେକ ସାଇନ୍ସ-ଫିକ୍ସନ୍ ଫିଲ୍ମ ଏବଂ ଖେଳନା ଆଦିରୁ ଅନୁପ୍ରେରଣା ଖୋଜିବା ଆରମ୍ଭ କରିଥିଲେ। କିନ୍ତୁ ଆଶ୍ଚର୍ଯ୍ୟଜନକ ଭାବେ ତାଙ୍କୁ ପ୍ରକୃତ ଆଇଡିଆ ଏକ ସାଧାରଣ ସ୍ଥାନରୁ ମିଳିଥିଲା- ତାହା ଥିଲା ପବ୍ଲିକ୍ ଟଏଲେଟ୍ ବା ଶୌଚାଳୟର ସାଇନ୍ ବୋର୍ଡ । ଶୌଚାଳୟ ବାହାରେ ପୁରୁଷ ଓ ମହିଳାଙ୍କ ପାଇଁ ଲାଗିଥିବା ସାର୍ବଜନୀନ ଚିହ୍ନକୁ ଦେଖି ତାଙ୍କ ମନରେ ଏକ ରୋବଟ୍ର ଚିତ୍ର ଆସିଥିଲା । ସେହି ସାଧାରଣ ଆକାରରେ କିଛି ପରିବର୍ତ୍ତନ କରି, ମୁଣ୍ଡରେ ଦୁଇଟି ଆଣ୍ଟେନା ଏବଂ ସବୁଜ ରଙ୍ଗ ଦେଇ ସେ ଆଣ୍ଡ୍ରଏଡ୍ ଲୋଗୋର ନକ୍ସା ପ୍ରସ୍ତୁତ କରିଥିଲେ । ଏହି ରୋବଟକୁ ଅଧିକ ବନ୍ଧୁତ୍ୱପୂର୍ଣ୍ଣ ଏବଂ ସରଳ ଦେଖାଇବା ପାଇଁ ଏହାର ରଙ୍ଗ ସବୁଜ ରଖାଯାଇଥିଲା, ଯାହାକି ବିକାଶ ଓ ପ୍ରଗତିର ପ୍ରତୀକ ।
ଏହି ଲୋଗୋର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ‘ଓପନ୍ ସୋର୍ସ’ ନୀତି । ଆପଲ୍ ଭଳି କମ୍ପାନୀ ନିଜ ଲୋଗୋକୁ ସମ୍ପୂର୍ଣ୍ଣ ସୁରକ୍ଷିତ ଏବଂ କପିରାଇଟ୍ ଅଧୀନରେ ରଖୁଥିବା ବେଳେ, ଇରିନା ଏବଂ ଗୁଗଲ୍ ଆଣ୍ଡ୍ରଏଡ୍ ଲୋଗୋକୁ ସମସ୍ତଙ୍କ ପାଇଁ ଖୋଲା ଛାଡ଼ିଦେଇଥିଲେ । ଅର୍ଥାତ୍ ଯେକେହି ମଧ୍ୟ ନିଜ ଇଚ୍ଛା ଅନୁସାରେ ଏଥିରେ ପରିବର୍ତ୍ତନ କରି ନୂଆ ରୂପ ଦେଇପାରିବେ । ପ୍ରାରମ୍ଭିକ ପର୍ଯ୍ୟାୟରେ ଏହା କେବଳ ଡେଭେଲପର୍ମାନଙ୍କ ପାଇଁ ଉଦ୍ଦିଷ୍ଟ ଥିଲା, କିନ୍ତୁ ଖୁବ୍ ଶୀଘ୍ର ଏହା ସାଧାରଣ ଲୋକଙ୍କ ମଧ୍ୟରେ ଅତ୍ୟନ୍ତ ଲୋକପ୍ରିୟ ହୋଇପାରିଥିଲା ।
ଗୁଗଲ୍ ଡେଭେଲପର୍ମାନେ ଏହି ସବୁଜ ରୋବଟ୍କୁ ଶ୍ରଦ୍ଧାରେ ‘ବଗ୍ଡ୍ରଏଡ୍’ ବୋଲି ଡାକୁଥିଲେ । ନିକଟରେ ଗୁଗଲ୍ ଏହାର ବିଧିବଦ୍ଧ ନାମ ‘ଦ ବଟ୍’ ରଖିଛି ବୋଲି ଜଣାପଡିଛି । ଗୋଟିଏ ଶୌଚାଳୟର ସାଇନ୍ ବୋର୍ଡରୁ ଆରମ୍ଭ ହୋଇଥିବା ଏହି ସାଧାରଣ ଡିଜାଇନ୍ ଆଜି ବିଶ୍ୱର କୋଟି କୋଟି ଲୋକଙ୍କ ହାତରେ ଶୋଭା ପାଉଛି ଏବଂ ବୈଷୟିକ ଜଗତରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛି ।
