ବ୍ରଜରାଜନଗର: ସୁରକ୍ଷା ଏଜେନ୍ସିକୁ ଧମକପୂର୍ଣ୍ଣ ଇମେଲ୍ ପଠାଇବା ଅଭିଯୋଗରେ ବ୍ରଜରାଜନଗର ଥାନା ପୁଲିସ ଜଣେ ଯୁବକଙ୍କୁ ଗିରଫ କରିଛି। ଏହି ଇମେଲରେ ଦାବି କରାଯାଇଛି ଯେ ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ପୁନରାବୃତ୍ତି ହେବା ନିଶ୍ଚିତ।
ଅଭିଯୋଗକୁ ଭିତ୍ତି କରି ପୁଲିସ ଯୁବକଙ୍କୁ ଇ-ମେଲ୍ ଠାବ କରି ପଚରାଉଚରା ପାଇଁ ଆଣିଥିଲା। ପଚରାଉଚରା ବେଳେ ସେ ନିଜେ ଇ-ମେଲ୍ ପଠାଇଥିବା ସ୍ୱୀକାର କରିଛି।
ଅଭିଯୁକ୍ତ ହାଜତରେ ରହି କୋର୍ଟ ଚାଲାଣ କରୁଥିବା ବେଳେ ବ୍ରଜରାଜନଗର ପୁଲିସ ତା’ର ଉଦ୍ଦେଶ୍ୟ ନେଇ ତଦନ୍ତ ଚଳାଇଛି। ଯୁବକ ଜଣକ ଏକୁଟିଆ ନା ଅନ୍ୟ କାହା ପ୍ରଭାବରେ କାର୍ଯ୍ୟ କରିଛନ୍ତି ସେ ନେଇ ଏସଡିପିଓ ଚିନ୍ତାମଣି ପ୍ରଧାନ ତଦନ୍ତ ଚଳାଇଛନ୍ତି।
ଝାରସୁଗୁଡ଼ା ଏସପି ସ୍ମିତ ପରମାର କହିଛନ୍ତି, ଜଣେ ବ୍ୟକ୍ତି ଅନେକ ସୁରକ୍ଷା ଏଜେନ୍ସିକୁ ଧମକପୂର୍ଣ୍ଣ ଇମେଲ୍ ପଠାଇଥିବା ସୂଚନା ପାଇଥିଲୁ। ସେ ଏକ ଫେସବୁକ୍ ଆକାଉଣ୍ଟ ତିଆରି କରି ଅନ୍ୟମାନଙ୍କୁ ଫସାଇବା ପାଇଁ ଏଭଳି ଧମକପୂର୍ଣ୍ଣ ଇମେଲ୍ ପଠାଇଥାଇପାରେ।
ଏସପିଙ୍କ କହିବାନୁସାରେ, ପ୍ରାଥମିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତମାନେ ବିଭିନ୍ନ ସୁରକ୍ଷା ଏଜେନ୍ସିକୁ ଧମକପୂର୍ଣ୍ଣ ଇମେଲ୍ ପଠାଇ ଏଜେନ୍ସିଗୁଡ଼ିକ ମନରେ ଆତଙ୍କ ସୃଷ୍ଟି କରିଥିଲେ।
ତଦନ୍ତ ଜାରି ରହିଛି ଏବଂ ପ୍ରାଥମିକ ତଦନ୍ତ ପରେ ଅଭିଯୁକ୍ତ ଈର୍ଷା ଓ ଶତ୍ରୁତାରୁ ଏପରି କରିଥିବା ଜଣାପଡ଼ିଛି। ଆଇପିସି ଧାରା ୫୦୫, ୫୦୬ ଏବଂ ୬୬(ସି) ଆଇଟି ଆକ୍ଟ ଅନୁଯାୟୀ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି।