କେନ୍ଦ୍ରାପଡ଼ା: କେନ୍ଦ୍ରାପଡ଼ା ଜିଲ୍ଲା ଅନ୍ତର୍ଗତ ରାଜନଗର ଅଞ୍ଚଳରେ ଶନିବାର ଦିନ ଏକ ୬ ଫୁଟ୍ ଲମ୍ବର ଲୁଣି ପାଣି କୁମ୍ଭୀର ମାଛ ଧରା ଜାଲରୁ ଉଦ୍ଧାର କରାଯାଇଛି। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଥିଲା।
ବନ ବିଭାଗ ଅଧିକାରୀଙ୍କ ସୂଚନା ଅନୁଯାୟୀ, ବ୍ରାହ୍ମଣୀଖୋଳ ଗ୍ରାମର ଜଣେ ବାସିନ୍ଦା ନିଜ ଚାଷ ଜମିରେ ମାଛ ଧରିବା ପାଇଁ ଜାଲ ପକାଇଥିଲେ। ଏହା ପରେ ସେଥିରେ ଫସିଯାଇଥିଲା କୁମ୍ଭୀର। ଶନିବାର ସକାଳେ ମାଛ ସଂଗ୍ରହ କରିବାକୁ ଯାଇଥିବା ବେଳେ ଜଣେ ବ୍ୟକ୍ତି ଜାଲରେ ଫସି ରହିଥିବା କୁମ୍ଭୀରକୁ ଦେଖିବାକୁ ପାଇଥିଲେ। ସେ ତୁରନ୍ତ ସ୍ଥାନୀୟ ଲୋକ ଏବଂ ବନ ବିଭାଗକୁ ଏବିଷୟରେ ଜଣାଇଥିଲେ।
ଅଧିକାରୀଙ୍କ କହିବାନୁସାରେ, ଖବର ପାଇବା ପରେ ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି କୁମ୍ଭୀରକୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ଚାଷ ଜମିରେ କୁମ୍ଭୀରର ଉପସ୍ଥିତି ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଥିଲା।
Comments are closed.