କଟକ: ଓଲିଉଡ ଦୁନିଆ ପାଇଁ ଆଉ ଗୋଟିଏ ଦୁଃଖ ଖବର । ପରଲୋକାରେ ଓଡ଼ିଆ ସଙ୍ଗୀତ ନିର୍ଦ୍ଦେଶକ ଶାନ୍ତିରାଜ ଖୋସଲା । କଟକ ବକ୍ସିବଜାର ସ୍ଥିତ ବାସଭବନରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ତାଙ୍କୁ ୫୩ ବର୍ଷ ବୟସ ହୋଇଥିଲା । ଶାନ୍ତିରାଜ ଖୋସଲାଙ୍କ ଦେହାନ୍ତ ଖବର ଶୁଣି ସ୍ତବ୍ଧ ହୋଇଛି ଓଡ଼ିଆ ଚଳଚ୍ଚିତ୍ର ଦୁନିଆ । ବହୁ ବିଶିଷ୍ଟ ବ୍ୟକ୍ତି ଶାନ୍ତିରାଜଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ।
କିଛି ଦିନ ତଳେ କରୋନାରେ ସଂକ୍ରମିତ ହୋଇଥିଲେ ଶାନ୍ତିରାଜ ଖୋସଲା । ହୋମ୍ ଆଇସୋଲେସନରେ ଥିଲେ । ଆଜି ହଠାତ୍ ଦେହ ଅଧିକ ଅସୁସ୍ଥ ହୋଇଥିଲା । ମେଡିକାଲରେ ପହଞ୍ଚିବା ପୂର୍ବରୁ ପ୍ରାଣବାୟୁ ଉଡ଼ି ଯାଇଥିଲା । ବହୁ ଆଲବମ୍ ଓ ଓଡ଼ିଆ ଫିଲ୍ମରେ ତାଙ୍କ ସଙ୍ଗୀତର ଯାଦୁ ଛାଡ଼ିଛନ୍ତି ଶାନ୍ତିରାଜ ଖୋସଲା ।
ସିନେ ଓ କଳାପ୍ରେମୀ ଦର୍ଶକଙ୍କୁ ବହୁହିଟ୍ ଗୀତ ଭେଟି ଦେଇଛନ୍ତି । ତୋର ମୋର ଯୋଡ଼ି ସୁନ୍ଦର, ଫେରିଆ, ଧନରେ ରଖିବୁ ଶପଥ ମୋର, ବାଇଶି ପାହାଚେ ଖେଳିବ ମୀନ ଭଳି ଏକାଧିକ ଫିଲ୍ମରେ ସେ ସଙ୍ଗୀତ ନିର୍ଦ୍ଦେଶନା ଦେଇଥିଲେ । ତାଙ୍କ ବିୟୋଗ ଓଲିଉଡ ପାଇଁ ଏକ ଅପୂରଣୀୟ କ୍ଷତି । ନିକଟରେ ସଙ୍ଗୀତ ନିର୍ଦ୍ଦେଶକ ଅମରେନ୍ଦ୍ର ମହାନ୍ତି କରୋନାରେ ସଂକ୍ରମିତ ହୋଇ ଆଖି ବୁଜିଥିଲେ ।
Comments are closed.